¹ Bafalisayo na Basadukayo, bachuilile Yesu uumtonda, bamsambile kabamonye isaka ya uhuma hekulu.

² Yesu kubakaile na ubasambila “Yahuba ikolo, benywe boti hali luenge yulu kulu ii likachichu. ³ Na haluelo, benywe Hoti, Lino habi mnaka; yulu kulu lia biuwa likachichu, na matimba mali gulu liose. Benywe ba lububa umeso, mulihumana bisukiata mengo mose ma kulu; na isaka ya ala mushi na imana?” ⁴ Ibushi ibii na ya Lusengu ilihubenja isaka; naba bashiihewa isaka, nambo isaka ya Yona. Noo ubashika na ulikila.

⁵ Nabo bakikiwa badabuile m'bwala, bakibilile mikati, ⁶ Yesu kubasambile, Lolwe, m'be meso na mshimi kwa Bafalisayo na Basadukayo.

⁷ Babele na paa boo wa boo, bakanine. Ii yulu tusaswala mikati.

⁸ Yesu kumanine, kubasambile, paa ii kiyai benywe wa benywe, benywe ba buwasha bucho, yulu mushi na mikati? ⁹ Bino mushihumana na uengelecha kiya mikati kitano ubatu mauki matano, na bitanga binga biongwelwe? ¹⁰ Iyaka mikati njwii ubatu mauki mana, na bitanga binga biongwelwe? ¹¹ Biaba wii musamana ishi yulu ya mikati nabo huusambila? M'be meso na mshimi kwa Bafalisayo na Basadukayo. ¹² Haho noo habamanine ukana kushibasambile babe meso yulu ya mshimi kwa mikate, bibele yulu ya lukikio lwa Bafalisayo na Basadukayo.

¹³ Yesu kukile lubi lwa Kaisalia-Filipi, kubabudiche bakikiwa bake, batu bali hukana Mwana kwa Adamu ii nanyi?

¹⁴ Bakanine, bamwe balihukana uli Yohana Mchunji, bange uli Eliya, bange uli Ylemia, bange boti kumwe kwa mbua.

¹⁵ Kee noo ubabucha na benywe mulihunkana nene ni nanyi?

¹⁶ Simoni Pedelo kumkaile nuukana, kokwe noo Kilishito, Mwana kwa Abetcha Pungu alii mweko.

¹⁷ Yesu kumkaile na umsambila, Luhanga oli Simeoni-Bal-Yona; bululi mashi na nyama bisabululilwa ino, Tata kuli hekulu kubululila. ¹⁸ Na nene nihusambila, kokwe wii Pedelo na hekulu ha liwe nikubaa lubunga luanyi. Na michango kia usinda kishilihima. ¹⁹ Niuha kokwe ahongolo a buolo bwa hekulu. Yoyose yolohamba hano hasii yiihambwa hekulu, yoyose yolisula hano hasii isulwa na hekulu. ²⁰ Yesu kubahaninye bakikiwa bake bashisambile mtu kekese ukana kee noo kilisto.

²¹ Utula mamo mengo Yesu kutulile ubasambila bakikiwa bake ukana utaka ushiutaka kuikia Yelusalema na niususulwa asusu engi uu baulu na bataa ba bibuli, na bakochi, na uhakwa, na uchuwa lusuku lwa butatu. ²² Pedelo kumkuhile, na utula um'becha, kukanine, Nangu, Mlume, ushiisua bibio.

²³ Kee nuebua, kusambile Pedelo, “kiwila unyuma wanyi Ihingili; uli ibambacha wandi; bululi ushi luhanga bia Abeca Pungu, ulihutanga bia batu.

²⁴ Mamo mengo Yesu kubasambile bakikiwa bake, mtu kekese kwibenja undama, kalihanye kee mine, na kalisuie msalaba kwake nundama. ²⁵ Bululi mtu mine kwibenja uhonya mtima kwake kwikuchiminya; na mtu mine kwichiminya mtima yulu yanyi, kwikuhonya. ²⁶ Mtu kubi na alambwe nai uba na ino ibalo yose na uchiminya mtima kwake? na mtu kunahanana hii yine inaba nahi mtima kwake. ²⁷ Yulu mwana kwa Adamu kuichwa na buhaha bua Sake hamwechi na bamalaika bake, haho noo helimma kila mtu ulamana na bikilanywa biake ²⁸ Bibe bibio, nihumsambila, hali batu bakimanyu hano, babi bashi naawa bimmona Mwana kwa Adamu uchwa mnda mwa buolo bwake.