¹ Yesu kubakishile bakikiwa bake umi na babili, nubaha mmano yulu ya miha, ukihunya, na uhonya basumwa bose na bisumi bia mioka kiose. ² Machina ma balami umi na babili noo mano. Kwa mtangi Simoni (kwihukiswa Petelo) na Andele mmulwake, Yakobo mwana kwa Zebedayo, na Yohana mmulwake: ³ Filipo, na Batelemi; Tomaso, na Matayo kuulipisha mlambu, Yakobo mwana kwa Alufayo, na Tadeo, ⁴ Simoni Mkananayo, na Yuda Isikalitote, mine kummanine (ukucha).

⁵ Banu umi na babili Yesu kubatumine. Nakee kubalakile, nuukana, mndala kia balangamsenge mushikie kio, na mabuka mose ma basamaria mushikingile. ⁶ Ii bisoka kukie uu mio kichimine kia ndu kia Isilaeli. ⁷ Hamwikia, lisambwe na ukana, buolo bwa hekulu bwahuhia. ⁸ Muhonye basumwa, muchule babu, muhahache ba bushondo, chigwe miha. Mwahewa bunene, muhane bunene. ⁹ Nangu uswala nolo, bitundu wala bumona. m'ndaha chenyu. ¹⁰ Nangu uswala ndaha mlwendo lwenyu, wala bisanjwa bibili, wala mikalabanda, wala lubango; bululi mkichi kwa mkilo kulingie uhewa iliwa yake. ¹¹ Mbuka kio kiose, mkoba kokose kwamwikingila, muenge mnanyi mmo kulingie mtu kwa kine, shamwe wake mpaka chuba liamuhuma. ¹² Na benywe hamwikingila mndu mukitanye, ¹³ Ndu kilingie talala kyenyu na kibe mmo, kiene kishilingie, talala kienyu mukie nakio. ¹⁴ Ubaya bene bashimma alibu na uhulicha binywa bienyu, hamwihuma ii kia ndu au mbuka, muliukumune ihwili ya makulu menyu. ¹⁵ Noo bibio nihumsambila bibi bihuhu mabuka ma Sodoma na Gomola nangu uhoda bihulo na ahia, uli kiya mbuka.

¹⁶ Lolwe, nene nihubahila nahi miyo hawingi ha mibwa-bwa; ilu m'be na bwenge naha ndoa na uhola nahi akundulu. ¹⁷ Mpe meso na batu, bimmila usamba milandu na bii mmula mmihwilo mabo. ¹⁸ Bii mmila ubata na umaolo yulu yanyi, uba mmonine wabo na batu. ¹⁹ Haho hene habiimila usamba, nangu ulangalanga biamwidokoma, bululi saa kioka kiya mwihewa biudokoma. ²⁰ Yulu bashi benywe mwidokoma, ii mtima kwa senyu kwidokoma mnda mwenyu. ²¹ Mtu kuikinwina msiwabo bululi kammake, na shibana kwihaka mwanake, na baana bihaka bibushi byabo, na ubasusula. ²² Na benywe batu bose biimmonywa yulu ya china lianyi. Mine kwiliomenenya mpaka isula noo kwihona. ²³ Mengo mabimchingo mkigi mbuka, mwasinine mkinge; wii nene nihumsambila mushisinine mmabuka mose ma Isilaeli, na mwana kwa Adamu kusinakiwila.

²⁴ Mkikiwa kushinahima mkikya kwake, na mcha kushinahima mlumiake. ²⁵ Nambo mkikiwa kuikinyua kubu nahi mkikia kwake, na mkichi nahi Mlumiake. Biabali huukita Mlume kwa ndu kya ehengili, ati bichili abisa baya ba mndu mwake ukinyua?

²⁶ Wa bibyo, nangu ubasina, yulu hashi inywa yoyose yibisama, ishibiwa hululu; na ibishilue, yine ishimanyia. ²⁷ Biandimsambila benywe mnda mdo, mubidokome uu luenge; na biamuhulicha ububisa, mubidokome hekulu ha ndu. ²⁸ Nangu ubasina balihuhaka m'bili bashi na uoma wa uhaka mtima. Sinyue kuya mine kwina uoma wa uhaka m'bili na mtima na ubitela mmahia aa milumbu. ²⁹ Je, madiba mabili mashihukulua sengi kimwechi? ata limwechi lishinakua hasi senyu kushimmane; ³⁰ Na benywe, njuli cha miswe kienyu iichibalue chose. ³¹ Nangu usena, benyue muli babenju ulimadiba mengi. ³² Wa bibio kekese mine kwiinumbula uubatu, na niimlumbula hambele ha Tata kwa hekulu. ³³ Kese mine kuipanya umeso ma batu. Na nene nii mmanya uu meso na Tata kwa hekulu.

³⁴ Langue ukana nichuile uleta talala mmibalo. Nishichuile uleta talala, ila ahilu. ³⁵ Nichuile uleta bubaka hawingi ha mwana na sake, msiha ukinuila mnake, na mwana buo ukinuila mnake buo. ³⁶ Babii ba mtu ii baya ba mndu mwake. ³⁷ Kuya kulihubenja sake au mnake uli nene kuko kushiningie. Na kulihubenja mmwalubaka au msiha ulinene kuko kushiniingie. ³⁸ Na mtu kushimsuale msalaba kwake na udokoma kushiniingie. ³⁹ Mine kwienga uhonya ichulichuli ya mweko kwake kuikuchiminya. Na mine kwichiminya mweko kwake yulu yanyi kwikuhewa.

⁴⁰ Kekese kwiikita wake kwingita nene, kekese kwingita wake, kwamkita kuya miine kutumine nene. ⁴¹ Kekese kwiiha mbuwa iliwa yulu m'mbuwa kwihewa ikinuna mkongo ya mbuwa, na kekese kwiiha mtu kwa kiine yulu ii mtu kiine kuko kwiihewa ikinuna mkongo ya mtu kwa kiine. ⁴² Kekese kiiha kuimnyuisha kumwe hawingi ha tuno tulenge, isengo ya madi ma unywa ma peho, yulu kee ii mkikiwa, Nihumsambila hulu, kwihewa alambwe ake.