¹ Na tahuna iea hurika murimuri ri valai ne Isu ri nana maea ia,"Erei i tahoka rana i dagi hateka polomeli na harikianga ne Deo?" ² Muri e Isu i galea tara koma kiroko i valai, i vakapesia na kurukurune ria, ³ Ia i ta,"Muholi hateka iau a taki mua, erei kama ge rupuru mulea ge manga koma kiroko, kama mugu dili na harikianga ne Deo. ⁴ Erei a bakovi i rupurua i manga ra koma kiroko, ra bakovi iea ia biri tahoka rana i dagi pololilo na harikianga ne Deo. ⁵ Mavonga na ragu, a bakovi tara i rata kamumu ne hurika bakovi maea manga ra koma kiroko, i maea ia i rata kamumu iau lakea ia i bole iau. ⁶ Erei a bakovi i rata e hurika koma kiroko erei ri tahoka ni luhoi tora ne nau ri boru na sin, i kamumu nigi kolo a kedo dagi na lohona nigi voroki puru na dari dagi.

⁷ Iau a dodo e hurika bakovi ngatavine vona ra malala iea na parava ni toni! I kamumu hateka ni toni i bele, a dodo hateka hurika bakovi erei ri vakabele a ni toni i rata hurika bakovi ranga ri boru na sin, ia biri hale liu. ⁸ Pali ra limamu o a vahamu i rata ioe o boru na sin, o palakudua o vorokia ge vano. I kamumu hateka ni bole a ni mahuri vakaroro turana limamu ge taku a vahamu ge taku. Pali kimi kamumu go lakea na kanono na hel turana limamu ge rua a vahamu ge rua. ⁹ Pali ra matamu ge ratoe go boru na sin, pali o rata talea o vorokia. I kamumu hateka go bole a naro kamumu ge tabuli vakaroro turana mata ge taku kunana. Kimi kamumu ni lakea na kanono na hel turana matamu ge rua. ¹⁰ Ioe o mata doko nahani matapuru ma na maka koma kiroko nga. Muholi hateka iau a takoe, na hunu virika ensel ria ri kara ni bele na matane Tata erei i made na hunu. ^{11 12} Ioe o luhoi navai vona hini nga? Ra bakovi tara ia i tahoka 100-sipsip i tabuli, tara ne ria i velu, ia biri pe purua viri ranga i 99 virika sipsip ria na lolo ia ge vano ge vorokanea ra sipsip i taku i velu o uka? ¹³ Muholi hateka iau a taki mua, ra hini ia biri puruvisia ra sipsip iea, ia biri vivi hateka vona ra sipsip i velu lakea i puruvisi mulea. ¹⁴ Na naro i palupu kunana, e Tamane mua na hunu ia kimi ngaru tara koma kiroko ge velu.

¹⁵ Pali ra turamu i ratea vomu tara sin, o bolea ge lakea na nutu miri o takia na ara potu vona ge tabuli na palane marua. Pali ia i kara ni longo mai ioe, kamumu marua bara muru bele manga a makitari tabu. ¹⁶ Pali re ia kimi ngaru ni longo mai ioe, pali o vano bole tabua tara turamu o ge ala rua rugu valai, bara ru bole kori na ngava bara moto pelekadoa ra potu ¹⁷ Pali ra hini ia ge marikoi keme ge longo mai a ngavane ria, i kamumu o bolea ge dili na sios. Pali ia keme ge longo mai a ngava na sios, o matai maea ia tara bakovi ni bole a takis kama bakovi na tara o Juda. ¹⁸ Muholi hateka iau a taki mua, ara maki mua mu kapikari koea na malala, Deo ia tara biri kapikaria na hunu, pali ara maki mu rutala kava e Deo tara biri rutala kava na hunu. ¹⁹ Pali iau a taki tabu mua, na malala iea, ra bakovi i ala rua ru tamudi taku vona tara maki lakea ru nana, pali e Tamane hita na hunu ia biri habi lobo ara maki si nanea vona. ²⁰ Na rana i ala rua o i ala tolu to vakalipopo palupu na ragu, iau bara made na palane tou.

²¹ Muri e Pita i valai i nanea e Isu,"ViriDagi, bloko riva na parava iau ga puga hini hale na turagu ia i rata sin ne nau? I kara a parava, ge polorua e?" ²² Isu i takia, iau kama taki ioe maea na parava ge polorua, uka ioe o puga voroki a halenga vona i vano ge lokovonga ge kara na tahuna ge ravulu polorua a polona i polorua tabu. ²³ Mavonga ra harikinga ne Deo i palupu manga a king i ngaru ni palakado a makoli, turana voravora vona. ²⁴ Na tahuna ia i vakatubu na ni pelekadoa ra makoli, ni bole valai tara voravora ge koli mule a 1 0000 silva a pou na moni a makoli na king. ²⁵ Pali na tahuna i uka moni ni koli mule a makoli ne vona, a matakari vona i rata ni ta tora ni rudutalea ra voravora turane girihina e tuna turana maka maki vona, nigi koli mule vona ra makoli ia i tahoka. ²⁶ Lakea ra voravora iea i tutupuru a gina na malala lakea i pasike puru na vahana Matakari vona lakea i ta maea,"Matakari, o dodo iau ga kolimule maka maki vomu. ²⁷ Lakea makakari vona i dodoa ra voravora lakea i puga voroki a potu vona lakea i ratea i malimali i vano i uka ni mava. ²⁸ Pali ra voravora iea i vano i mataia tara voravora erei i tahoka makoli vona i 100 kina. Lakea i turari vilia i nugua lohona lakea i takia,"Ioe o kolia makoli vomu ne nau? ²⁹ Pali ra voravora i tutupurua gina na vahana lakea i takia,"O dodo iau bara kolia makoli nau a tahoka vomu." ³⁰ Pali ra voravora muga iea kimi longoa ngavana. Ia i nugutatea ra voravora i vano na parava ia biri kolia makoli vona. ³¹ Na tahuna e huriki a voravora to mataia ara maki i bepe, tou koma to vivi. Ria ri valai na matakari ne ria ri takia vona virika maki i bele. ³² " Muri a matakari ne ria i gale i takia maea,'Ioe a voravora hale, Iau a dodoe pali a paga vorokia naro hale vomu na ara ioe o rupuru ioe o nanau. ³³ Navai ioe koma o dodoa voravora turamu manga Iau a dodo e? ³⁴ A matakari vona i tamudi hale pali habia ra voravoa ea i lakea na limane huriki a bakovi ni haba ni madihi vona vano vano ia ge koli lobo a makoli vona. ³⁵ Manga kunana e tata meli na hunu ia tara bari tatea naro i palupu ne matou, Nara matou koma moto paga vuroki a sin na turane matou na hatene matou."