¹ परमेश्वर नूह अउर जेतना जंगली पशु अऊर घरेलू पशु ओनकरे साथे जहाज में रहलन, ऊ सब क सुधि लेहलन: अउर परमेश्वर धरती पे पवन बहइलन, अउर पानी घटअ लगल। ² गहरा समुंदर क सोता अउर आकाश क झरोखा बंद हो गयल; अउर ओसे जवन बारिश होत रहल ऊ भी रुक गयल। ³ अउर एक सौ पचास दिन के बाद पानी धरती पे से लगातार घटअ लगल। ⁴ सतवे महीना के सत्रहवां दिन के, जहाज अरारात नामक पहाड़ पे टिक गयल। ⁵ अउर पानी दसवां महीना तक घटत चल गयल, अउर दसवें महीना के पहिले दिन के पहाड़न क चोटी दिखाई देहलेस।

⁶ फिर अईसन भयल की चालीस दिन के बाद नूह अपने बनावल जहाज क खिड़की खोल के, ⁷ एक कऊवा उड़ा देहलन: जब तक पानी धरती पे से सुख न गयल, तब तक कऊवा इधर-उधर घुमत रहल। ⁸ फिर ओन अपने लग्गे से एक कबूतर उड़ा देहलन की देखी धरती पे से पानी घट गयल हव कि नाही। ⁹ ऊ कबूतरी के टिकअ बदे कउनो अधार ना मिलल, त ऊ ओनके लग्गे जहाज में लउट आइल: काहे की सब धरती के ऊपर पानी ही पानी छायल रहल, तब ओन हाथ बढ़ा के ओके अपने लग्गे जहाज में ले लेहलन। ¹⁰ तब अऊर सात दिन रुक के, उहअ कबूतरी के जहाज में से फिर उड़ा देहलन। ¹¹ अउर कबूतरी सांझ के समय ओनके लग्गे आ गईल, त का देखलन की ओकरे चोंच मे जैतून क एक नया पत्ता हव; एसे नूह जान लेहलन की, पानी धरती पे घट गयल हव। ¹² फिर ऊ सात दिन अउर ठहर के ओही कबूतरी के उड़ा देहलन; अऊर ऊ ओनके लगे फिर कब्भो लउट के ना आईल।

¹³ नूह के उमर के छः सौ एक साल के पहिला महीना के पहिला दिन धरती पे से पानी सुख गयल। तब नूह जहाज क छत खोल के का देख लन की धरती सुख गइल हव। ¹⁴ अउर दूसरा महीना के सत्ताईसवां दिन के धरती पूरा रीति से सुख गईल।

¹⁵ तब परमेश्वर नूह से कहलन, ¹⁶ तू अपन लड़का, पत्नी अउर बहुवन सहित जहाज में से निकल आवा। ¹⁷ का पक्षी, का पशु, का सब भांति क रेंगवाला जंतु जवन धरती पे रेंगलन; जेतना शरीरधारी जीव जंतुवन तोहरे साथे हयन, ऊ सब के अपन संगे निकाल ले आवा की धरती पे ऊ सब से बहुत बच्चा पैदा होअ; अउर ऊ फूलअ-फलअ, अउर धरती पे फईल जांय।" ¹⁸ तब नूह अउर ओनकर लड़का अउर पत्नी अउर बहुवन, निकल अइलिन। ^{1 19} अउर सब चौपाई, रेंगवाला जंतु, अउर पक्षी, अउर जेतना जीव जंतु धरती पे चललन फिरलन, सब जाति-जाति कर के जहाज में से निकल अइलन।

²⁰ तब नूह यहोवा बदे एक वेदी बनइलन; अऊर सब शुद्ध पशुवन, अउर सब शुद्ध पक्षियन में से, कुछ-कुछ ले के वेदी पे होमबलि चढ़इलन। ²¹ एप्पर यहोवा सुखदायक सुगंध पाके सोचलन, "अदमियन के कारण हम फिर कभी धरती के श्राप न देब, यद्यपि मनुष्य के मन में बचपन से जवन कुछ पैदा होला ऊ बुरा ही होला: तब्बो जइसे हम सब जीव के अब मरले हई, ओइसे ओनके फिर कभी न मारब।