पाठ 38
1
वोही दिनन में अइसन भयल की यहूदा अपने भाईयन के लग्गे से चल गईलन, अऊर हिरा नाम क एखे अदुल्लामवासी आदमी के लग्गे डेरा कईलन।
2
उहाँ यहूदा शुआ नाम क एखे कनानी आदमी के बिटिया के देखलन; अऊर ओनसे विवाह करके ओनके लग्गे गईलन।
3
ऊ गर्भवती भईलिन, अऊर ओनके एखे लड़का पैदा भयल; अऊर यहूदा ओनकर नाम एर रखलन।
4
अऊर ऊ फिर गर्भवती भईलिन, अऊर ओनके एखे अउरो लड़का पैदा भयल; अऊर ओनकर नाम ओनान रखल गयल।
5
फिर ओनके एखे अऊर लड़का पैदा भयल, अऊर ओनकर नाम शेला रखल गयल; अऊर जउने समय एनकर जनम भयल ओ समय यहूदा कजीब में रहत रहलन।
6
अऊर यहूदा तामार नाम के एखे स्त्री से अपने जेठा लड़का एर क विवाह कर देहलन।
7
लेकिन यहूदा क ऊ जेठा लड़का एर यहोवा के लेखे में दुष्ट रहलन, एहिसे यहोवा ओके मार डललन।
8
तब यहूदा ओनान से कहलन, "अपने भौजाई के लग्गे जा, अऊर ओनके संगे देवर क धर्म पूरा कईके अपने भाई बदे संतान उत्पन्न करा।"
9
ओनान त जानत रहलन की संतान हमार न ठहरी; एही से अइसन भयल की जब ऊ अपने भौजाई के लग्गे गईलन, तब ऊ भूमि पे वीर्य गिरा के नाश कईलन, जेसे अइसन न होवअ की ओनके भाई के नाम से वंश चलअ।
10
ई काम जवन ऊ कईलन एसे यहोवा अप्रसन्न भईलन अऊर यहोवा ओनके भी मार डललन।
11
तब यहूदा ई डर के मारे की कहीं अइसन न हो की अपने भाईयन के तरे शेला भी मरअ, अपने बहु तामार से कहलन, “जबले हमार लड़का शेला शयान न हो जाय तबले तू अपने पिता के घरे में विधवा में ही बईठल रहा।" एही से तामार अपने पिता के घरे जाके रहअ लगलिन।
12
बहुत समय के बितले पे यहूदा क पत्नी जे शुआ क बिटिया रहलिन, ऊ मर गईलिन; फिर यहूदा शोक क दिन बितले पे अपने मित्र हिरा अदुल्लामवासी समेत अपने भेड़ बकरीयन क ऊन कतरअ वाले के लग्गे तिम्नाह के गईलन।
13
अऊर तामार के ई समाचार मिलल, "तोहार ससुर अपने भेड़ बकरियन क ऊन कतरवावे बदे तिम्नाह के जात हयन।"
14
तब ऊ ई सोच के की शेला सयाना त हो गईलन लेकिन हम ओनकर स्त्री ना हो पईली; अपने विधवापन क पहिरावा उतरलिन अऊर घूँघट डालके अपने के ढाँप लेहलिन, अऊर एनेम नगर के फाटक के लग्गे, जवन तिम्नाह के रस्ते में हव, जा बईठलिन।
15
जब यहूदा ओनके देखलन, ऊ ओनके वेश्या समझलन; काहेकी ऊ आपन मुंह ढँपले रहलिन।
16
ऊ रस्ते से ओनके तरफ फिरलन, अऊर ओनसे कहअ लगलन, “हमके अपने लग्गे आवअ दा," (काहे की ई ओनके मालूम ना रहल की ऊ ओनकर बहु हईन।) अऊर ऊ कहअ लगलिन, “अगर हम तोहके अपने लग्गे आवअ देई त तू हमके का देबा?"
17
ऊ कहलन, “हम अपने बकरियन में से बकरी क एखे बच्चा तोहरे लग्गे भेज देब।" तब ऊ कहलिन, ”भला ओके भेजअ तक का तू हमरे लग्गे कुछ रेहन रख जईबा?"
18
ऊ पुछलन, “हम तोहरे लग्गे का रेहन रख जाई?" ऊ कहलिन, "आपन मुहर, अऊर बाजूबंद, अऊर अपने हाथ क छड़ी।" तब ऊ ओनके ऊ वस्तु दे देहलन, अऊर ओनके लग्गे गईलन, अऊर ऊ ओनसे गर्भवती भईलिन।
19
तब ऊ उठ के चल गईलिन, अऊर आपन घूँघट उतार के विधवापन क पहिरावा फिर पहिन लेहलिन।
20
तब यहूदा बकरी क बच्चा अपने मित्र ऊ अदुल्लामवासी के हाथे भेज देहलन की ऊ रेहन रखल वस्तु ओ स्त्री से छुड़ा ले आवअ; लेकिन ऊ स्त्री ओनके ना मिललिन।
21
तब ऊ ऊहाँ के लोग से पुछलन, “ऊ देवदासी जवन एनेम के रस्ते के एक तरफ बईठल रहलिन, कहाँ हईन?" ऊ लोग कहलन, "इहाँ त कऊनो देवदासी ना रहलिन।"
22
एही से ऊ यहूदा के लग्गे लऊट के कहलन, ”हमके ऊ ना मिललिन; अऊर ऊ जगह क लोग कहलन, ‘ईहाँ त कऊनो देवदासी ना रहलिन'।"
23
तब यहूदा कहलन, “अच्छा, ऊ बंधक ओही के लग्गे राहे दा, नाही त हमने तुच्छ गिनल जाई; देखा, हम बकरी क ई बच्चा भेज देहले रहे लेकिन ऊ तोहके ना मिललिन।"
24
लगभग तीन महिना बाद यहूदा के ई खबर मिलल, “तोहार बहु तामार व्यभिचार कईले हईन; वरन ऊ व्यभिचार से गर्भवती भी हो गयल हईन।" तब यहूदा कहलन, “ओके बहरे ले आवा की ऊ जलावल जाय।"
25
जब ओनके बहरे निकालल जात रहल, तब ओन, अपने ससुर के लग्गे ई कहला भेजलिन, “जउने आदमी क ई वस्तु हौ, ओही से हम गर्भवती हई," फिर ओन ई भी कहवईलिन, "पहचाना त सही ई मुहर, अऊर बाजूबंद, अऊर छड़ी केकर हौ।"
26
यहूदा ओके पहचान के कहलन, ”ऊ त हम से कम दोषी हईन; काहे की हम ओनकर विवाह अपने लड़का शेला से ना कइली।" अऊर ऊ ओनसे फिर कभी प्रसंग ना कईलन।
27
जब ओनकर बच्चा जनअ क समय आयल, तब ई जान पड़ल की ओनके गर्भ में जुड़वा बच्चा हयन।
28
अऊर जब ऊ बच्चा जनअ लगलीन तब एखे लड़का क हाथ बहरे आयल, अऊर दाई लाल सूत लेके ओनके हाथे में ई कहत के बांध देहलिन, "पहीले ईहअ पैदा भईलन।"
29
जब ऊ हाथ समेट लेहलन, तब ओनकर भाई पैदा हो गईलन। तब ऊ दाई कहलिन, “तू काहे बरबस निकल अईल ह?" एही से ओनकर नाम पेरेस रखल गयल।
30
पीछे ओनकर भाई जेकरे हाथे में लाल सूत बंधल रहल पैदा भईलन, अऊर ओनकर नाम जेरह रखल गयल।