¹ एक दिन लिआ क बिटिया दीना, जे याकूब से पैदा भईल रहलिन, ऊ देश के लड़कियन से मिलअ बदे निकललिन। ² तब ऊ देश क प्रधान हिब्बी हमोर क लड़का शेकेम ओनके देखलन, अऊर ओनके ले जाके ओनके संगे कुकर्म कईके ओनके भ्रष्ट कर डललन। ³ तब ओनकर मन याकूब के बिटिया दीना से लग गयल, अऊर शेकेम ऊ लड़की से प्रेम क बात कईलन, अऊर ओनसे प्रेम करअ लगलन। ⁴ अतः शेकेम अपन पिता हमोर से कहलन, "हमके ई लड़की के हमार औरत होवअ बदे दिला दा।" ⁵ अऊर याकूब सुनलन कि शेकेम हमरे बिटिया दीना के अशुद्ध कर देहले हयन, लेकिन ओनकर लड़कन ओ समय पशुवन के संगे मैदान में रहलन, एहि से ऊ ओनके आवअ तक चुप रहलन। ⁶ तब शेकेम क पिता हमोर याकूब से बात-चीत करअ बदे ओनके लग्गे गईलन। ⁷ याकूब क लड़का ई सुनत ही मैदान से बहुत उदास अऊर क्रोधित होके अईलन; काहेकि शेकेम याकूब के बिटिया के संगे कुकर्म करके इस्राएल के घराने से मूर्खता क अईसन काम कईले रहलन, जेकर करब अनुचित रहल। ⁸ हमोर ऊ सब से कहलन, "हमरे लड़का शेकेम क मन तोहरे बिटिया पे बहुत लगल हव, एहि से ओनके ओकर पत्नी होवअ बदे ओनके दे दा। ⁹ अऊर हमने के संगे विवाह करल करा; आपन बिटिया हमने के देवल करा, अऊर हमने के बिटिया के अपने लेवल करा। ¹⁰ अऊर हमरे साथे बसल रहा; अऊर ई देश तोहरे सामने पड़ल हव; एम्मे रह के लेन देन करा, अऊर एकरे भूमि के अपने बदे ले ला।" ¹¹ अऊर शेकेम भी दीना के पिता अऊर भाईयन से कहलन, "अगर हमरे पे तू लोगन के अनुग्रह क दृष्टि हो त जवन कुछ तू हमसे कहबा ऊ हम देब। ¹² तू हमसे केतना ही मूल्य या बदला काहे न मांगा, तब्बो हम तोहरे कहले के अनुसार देब; लेकिन तू ऊ लड़की के पत्नी होवअ बदे हमके दा।" ¹³ तब ई सोच के की शेकेम हमरे बहिन दीना के अशुद्ध कईले हयन, याकूब क लड़कन शेकेम अऊर ओनके पिता हमोर के छल के संगे ई उत्तर देहलन, ¹⁴ "हम अईसन काम नाही कर सकीत की कऊनो खतना रहित अदमी के अपन बहिन देई; काहेकि एसे हमार नाम धराई होई। ¹⁵ ई बात पे त हम तोहार मान लेब की हमरे जईसन तोहरे मे से हर एक अदमीन क खतना करल जाय। ¹⁶ तब हम अपने बिटियन के तोहके ब्याह देब, अऊर तोहरे बिटियन के ब्याह लेब, अऊर तोहरे संगे बसल भी रहब, अऊर हम दुनो एक समुदाय क अदमी हो जायल जाई। ¹⁷ लेकिन अगर तू हमार बात न मानके आपन खतना न करईबा, त हम अपने लड़की के ईहाँ से लेके चल जाईब।"

¹⁸ ओनके ई बात से हमोर अऊर शेकेम खुश भईलन। ¹⁹ अऊर ऊ जवान याकूब के बिटिया के बहुत चाहत रहलन, ई काम के करअ में ऊ देरी ना कईलन। ऊ त अपने पिता के घराना मे अधिक प्रतिष्ठित रहलन। ²⁰ एहि से हमोर अऊर ओनकर लड़का शेकेम अपने नगर के फाटक के लग्गे जाके नगर वासियन के ई समझावअ लगलन; ²¹ "ऊ लोग त हमने के संग्गे मेल से रहअ चाहत हयन; अतः ऊ लोग के ई देश मे रह के लेन-देन करअ दा; देखा, ई देश ओनके बदे भी बहुत हव; फिर हमने ओनके बिटिया के ब्याह लेवल जाई, अऊर अपने बिटियन के ओनके देवल करी। ²² ऊ लोग खाली इ बात पे हमरे संगे रहअ अऊर एक ही समुदाय क अदमी हो जाए के प्रसन्न हयन की ओनके समान हमने के सब अदमियन क भी खतना करल जाय। ²³ का ओनकर भेड़-बकरी अऊर गाय-बैल वरन् ओनकर सब पशु अऊर धन सम्पत्ति हमने क न हो जाई? एतना ही करा की हमने ओनकर बात मान लेवल जाय, त ऊ हमने के संगे रईहन।" ²⁴ एहि से जेतना ऊ नगर के फाटक से निकलत रहलन, ऊ सब हमोर अऊर ओनके लड़का शेकेम क बात मनलन; अऊर हर एक अदमियन क खतना करल गयल, जेतना ऊ नगर के फाटक से निकलत रहलन। ²⁵ तीसरके दिन, जब ऊ लोग पीड़ित पड़ल रहलन, तब अईसन भयल कि शिमोन अऊर लेवी नाम क याकूब क दूनो लड़कन, जवन दीना क भाई रहलन, अपने-अपने तलवार से ऊ नगर में बेधड़क घूस के सब अदमियन के घात कईलन। ²⁶ हमोर अऊर ओनके लड़का शेकेम के ऊ लोग तलवार से मार देहलन, अऊर दीना के शेकेम के घरे मे से निकाल ले गईलन। ²⁷ याकूब क लड़कन घात कर डलले पे भी चढ़ के नगर के एहि से लूट लेहलन कि ओम्मे ओनकर बहिन अशुद्ध करल गईल रहलिन। ²⁸ ऊ लोग भेड़-बकरी, अऊर गाय-बैलन, अऊर गदहा, अऊर नगर अऊर मैदान में जेतना धन रहल ले लेहलन। ²⁹ ऊ सब के अऊर ओनके बाल-बच्चन के अऊर स्त्रियन के भी हर ले गईलन, वरन् घरे-घरे में जवन कुछो रहल, ओके भी ऊ लोग लूट लेहलन। ³⁰ तब याकूब शिमोन अऊर लेवी से कहलन, "तू जवन ई देश के निवासी कनानियन अऊर परिज्जीयन के मन में हमरे प्रति घृणा उत्पन्न करइले हया, एहि से तू हमके संकट में डलले हया, काहेकि हमरे संगे त थोड़ा ही लोग हयन, एहि से अब ऊ लोग इकट्ठा होके हमरे पे चढ़ीहन, अऊर हमके मार डलिहन, त हम अपने घराना सहित खतम हो जाब।" ³¹ ऊ लोग कहलन, "का ऊ हमरे बहिन के संगे वेश्या के समान बर्ताव करिहन?"