¹ फिर लाबान के लड़कन क ई बात याकूब के सुनअ में आयल, "याकूब हमरे पिता क सब कुछ छिन लहले हयन, अऊर हमरे पिता के धन के कारण ओनकर ई प्रतिष्ठा हव।" ² अऊर याकूब लाबान के चेहरा पे दृष्टि कईलन अऊर ताड़ लेहलन, कि ऊ ओनके प्रति पहिले के समान नाही हयन। ³ तब यहोवा याकूब से कहलन, "अपने पितरन के देश अऊर अपने जन्म-भूमि के लऊट जा, अऊर हम तोहरे संगे रहब।" ⁴ तब याकूब राहेल अऊर लिआ के, मैदान में अपने भेड़ - बकरियन के लग्गे बुलवाके कहलन, ⁵ "तोहरे पिता के चेहरा से हमके समझ पड़त हव, कि ऊ त हमके पहिले के तरे अब नाही देखअ लन; लेकिन हमरे पिता क परमेश्वर हमरे संगे हयन। ⁶ अऊर तू भी जानलू, कि हम तोहरे पिता क सेवा शक्ति भर कईले हई। ⁷ फिर भी तोहार पिता हम से छल कईके हमार मजदूरी दस बार बदल देहलन; लेकिन परमेश्वर ओनके हमार हानि करअ नाही देहलन। ⁸ जब ऊ कहलन, 'चित्तीवाला बच्चा तोहार मजदूरी ठहरीहन,' तब सब भेड़-बकरी चित्तीवाला ही जनअ लगलिन, अऊर जब ऊ कहलन, 'धारी वाला बच्चा तोहार मजदूरी ठहरियन,' तब सब भेड़-बकरियन धारीवाला जनअ लगलिन।" ⁹ ई रीति से परमेश्वर तोहरे पिता क पशु लेके हम के दे देहलन। ¹⁰ भेड़-बकरियन के गाभिन होवअ के समय हम सपना में का देखली, कि जवन बकरा-बकरियन के ऊपर चढ़त रहलन, ऊ धारीवाला, चित्तिवाला अऊर धब्बावाला हयन। ¹¹ तब परमेश्वर क दूत सपने में हमसे कहलन, 'हे याकूब,' हम कहली, 'का आज्ञा।' ¹² ऊ कहलन, 'आँख उठा के ऊ सब बकरन के जवन बकरियन पे चढ़त हयन, देखा, कि ऊ धारीवाला, चित्तीवाला अऊर धब्बावाला हयन; काहे कि जवन कुछ लाबान तोहसे करत हयन, ऊ हम देखले हई। ¹³ हम ऊ बेतेल क परमेश्वर हई, जहां तू एखे खम्भा पे तेल डलले रहला अऊर हमार मन्नत मनले रहला। अब चला, ई देश से निकल के अपने जन्म-भूमि के लऊट जा।" ¹⁴ तब राहेल अऊर लिआ* ओनसे कहलिन, "का हमने के पिता के घरे में अबही भी हमने क कुछ भाग अऊर अंश बचल हव? ¹⁵ का हमने ओनके नजर में पराया ना ठहरली? देखा, ऊ हमके त बेच डललन अऊर हमरे रूपा के खा बईठल हयन। ¹⁶ एहि से परमेश्वर हमरे पिता क जेतना धन ले लेहले हयन, ऊ हमार अऊर हमरे बच्चन क हव; अब जवन कुछ परमेश्वर तोहसे कहले हयन, ऊह करा।"

¹⁷ तब याकूब अपने बच्चन अऊर स्त्रियन के ऊँट पे चढ़ईलन; । ¹⁸ अऊर जेतना पशुवन के ऊ पद्दनराम में इकट्ठा करके धनवान हो गयल रहलन, सब के कनान में अपने पिता के लग्गे जाए के मनसा से, संगे ले गईलन। ¹⁹ लाबान त अपने भेड़न क ऊन कतरअ बदे चल गयल रहलन, अउर राहेल अपने पिता के गृहदेवतन के चोरा ले गईलिन। ²⁰ अतः याकूब लाबान अरामी के लग्गे से चोरी से चल गईलन, ओनके ना बतईलन की हम भाग जात हई| ²¹ ऊ आपन सब कुछ ले के भगलन, अऊर महानद के पार उतर के आपन मुँह गिलाद के पहाड़ी देश के ओर कईलन।

²² तीसरके दिन लाबान के समाचार मिलल की याकूब भाग गईलन। ²³ एहि से ऊ अपने भाईयन के संगे लेके सात दिन तक ओनकर पीछा कईलन, अऊर गिलाद के पहाड़ी देश मे ओनके जाके पकड़लन। ²⁴ तब परमेश्वर राती के सपना में लाबान के लग्गे आके कहलन, "सावधान रहा, तू याकूब से न त भला कहिया अऊर न बुरा।" ²⁵ अऊर लाबान याकूब के लग्गे पहुंच गईलन। याकूब आपन तम्बू गिलाद नामक पहाड़ी देश में खड़ा कईले रहलन; अऊर लाबान भी अपने भाईयन के संगे ओही पहाड़ी देश में तम्बू खड़ा कईलन। ²⁶ तब लाबान याकूब से कहअ लगलन, "तू ई का कईला, कि हमरे लग्गे से चोरी से चल अईला, अऊर हमरे बिटियन के अईसे ले अईला, जईसे कऊनो तलवार के बल से बन्दी बनाईल गईल हो? ²⁷ तू काहे चुपके से भाग अईला, अऊर हमसे बिना कुछ कहले हमरे लग्गे से चोरी से चल अईला; नाही त हम तोहके आनन्द के संगे मृदंग अऊर वीणा बजवावत, अऊर गीत गवावत विदा करीत? ²⁸ तू त हमके अपने बेटवा बिटिया के चूमअ तक ना देहला? तू मूर्खता कईले हया। ²⁹ तू लोगन क हानि करअ क शक्ति हमरे हाथे में त हव; लेकिन तोहरे पिता क परमेश्वर हमसे बितल रात में कहलन, 'सावधान रहा, याकूब से न त भला कहिया अऊर न बुरा।' ³⁰ भला, अब तू अपने पिता के घरे क बड़ा अभिलाषी हो के चल अईला त चल अईला, लेकिन हमरे देवता के तू काहे चोरा ले आयल हया?" ³¹ याकूब लाबान के उत्तर देहलन, "हम ई सोच के डेरा गईल रहली कि कही तू अपने बिटियन के हम से छिन न ला। ³² जे केहू के लग्गे तू अपने देवता के पईहा, ऊ जिन्दा न बची। हमरे लग्गे तोहार जवन कुछ निकलअ, ओके अपने भाई बंधुवन के सामने पहचान के ले-ला।" काहेकि याकूब ना जानत रहलन कि राहेल गृहदेवतन के चोरा ले आयल हईन।

³³ ई सुन के लाबान, याकूब अऊर लिआ अऊर दूनो दासियन के तम्बुवन में गईलन; अऊर कुछ ना मिलल। तब लिआ के तम्बू में से निकल के राहेल के तम्बू मे गईलन। ³⁴ राहेल त गृहदेवतन के ऊँट के काठ में रख के ओप्पे बईठल रहलिन। लाबान ओनके सब तम्बू में टटोल के भी ओनके ना पईलन। ³⁵ राहेल अपने पिता से कहलिन, "हे हमार प्रभु, एसे अप्रसन्न न होईया, कि हम तोहरे सामने ना उठली; काहेकि हम मासिक धर्म से हई।" अतः ओनके ढूँढ़ ढाँढ़ कईले पे भी ओनके गृहदेवता ना मिललन।

³⁶ तब याकूब गुसिया के लाबान से झगड़अ लगलन, अऊर कहलन, "हमार का अपराध हव? हमार का पाप हव? कि तू एतना क्रोधित होके हमार पीछा कईले हया? ³⁷ तू जवन हमरे सब सामग्री के टटोल के देखला, त तोहके अपने घरे क सामान मे से का मिलल? कुछो मिलल हो त ओके इहाँ अपने अऊर हमरे भाइयन के सामने रख दा, अऊर ऊ हम दूनो के बीच मे न्याय करिहन। ³⁸ इ बीस साल से हम तोहरे लग्गे रहली; एम्मे न त तोहरे भेड़-बकरियन क गर्भ गिरल, अऊर न तोहरे भेड़न क माँस हम कभो खईली। ³⁹ जेके जंगली जन्तुवन फाड़ डालत रहलन ओके हम तोहरे लग्गे ना लियावत रहली, ओकर हानि हम खुद उठावत रहली; चाहे दिन के चोरी हो जात रहल, चाहे राती के, तू हम से ही ओके ले लेत रहला। ⁴⁰ हमार त ई दशा रहल कि दिन के त घाम अऊर राती के पाला हमके खा गयल; अऊर नींद हमरे आँखी से भाग जात रहल। ⁴¹ बीस साल तक हम तोहरे घरे में रहली; चौदह साल त हम तोहरे दुनो बिटिया बदे अऊर छः साल त हम भेड़-बकरियन क सेवा कईली; अऊर तू हमरे मजदूरी के दस बार बदल देहला। ⁴² हमरे पिता क परमेश्वर अर्थात् अब्राहम क परमेश्वर, जेकर भय इसहाक भी मानअ लन, अगर हमरे ओर न होतन, त जरूर तू हमके अब खाली हाथे जाए देतअ। हमरे दुःख अऊर हमरे हाथे क मेहनत देख के परमेश्वर बीतल राती मे तोहके डटलन।"

⁴³ लाबान याकूब से कहलन, "ई बिटिया त हमार ही हईन, अऊर ई लड़का भी हमार ही हयन, अऊर ई भेड़-बकरियन भी हमार ही हईन, अऊर जवन कुछ तोहके देख पड़त हव ऊ सब हमार ही हव, लेकिन अब हम अपने ई बिटियन अउर ई सन्तानन से का कर सकिला? ⁴⁴ अब आवा, हम अऊर तू दूनो अपने मे वाचा बांधी, अऊर ऊ हमरे अऊर तोहरे बीच में साक्षी ठहरल रहअ।" ⁴⁵ तब याकूब एखे पत्थर ले के ओकर खम्भा खड़ा कईलन ⁴⁶ तब याकूब अपने भाई बंधुवन से कहलन, "पत्थर इकट्ठा करा," ई सुन के ऊ लोग पत्थर इकट्ठा करके एखे ढेर लगईलन अऊर ओही ढेर के लग्गे ऊ लोग भोजन कईलन। ⁴⁷ ऊ ढेर क नाम लाबान त जैगर सहादुथा, लेकिन याकूब गिलियाद रखलन। ⁴⁸ लाबान कहलन, "ई ढेर आज से हमरे अऊर तोहरे बीच साक्षी रही।" एहि कारण ओकर नाम गिलियाद रखल गयल, ⁴⁹ अऊर मिस्पा भी; काहेकी ऊ कहलन, "जब हम एक दूसरे से दूर रही तब यहोवा हमार अऊर तोहार देख-भाल करत रहअ। ⁵⁰ अगर तू हमरे बिटियन के दुःख देबा, या ओनके सिवाय अऊर स्री ब्याह लेबा, त हमरे संगे कऊनो अदमी त न रहीयन; लेकिन देखा हमरे तोहरे बीच मे परमेश्वर साक्षी रहीयन।" ⁵¹ फिर लाबान याकूब से कहलन, "ई ढेर के देखा अऊर ई खम्भा के भी देखा, जेके हम अपने अऊर तोहरे बीच में खड़ा कईले हई। ⁵² ई ढेर अऊर ई खम्भा दुनों ई बात क साक्षी रहियन की हानि करअ के मनसा से न त हम ई ढेर के लाँघ के तोहरे लग्गे जाईब, न तू ई ढेर अऊर ई खम्भा के लाँघ के हमरे लग्गे अईबा। ⁵³ अब्राहम अऊर नाहोर अऊर ओनकर पिता; तीनो क जवन परमेश्वर हयन, ऊहअ हम दूनों के बीच में न्याय करअ।" तब याकूब शपथ खईलन जेकर भय ओनकर पिता इसहाक मानत रहलन। ⁵⁴ अऊर याकूब ऊ पहाड़ पे बलि चढ़ईलन, अऊर अपन भाई बन्धुवन के भोजन करअ बदे बोलईलन, तब ऊ लोग भोजन कईके पहाड़ पे रात बितईलन। ⁵⁵ भोर के लाबान उठलन, अऊर अपन बेटवा-बिटियन के चूम के अऊर आशीर्वाद देके चल देहलन, अपने जगह के लऊट गईलन।