¹ Panuma Yesu afyalwa mu Betelehemu yaku Yudea mu nshiku sha mfumu Herodi, abaume bamano ukufuma ku kabanga balifikile mu Yerusalemu balikulanda ati, ² ''Ilipi Imfumu yaba Yuda? Twalimwene ulutanda lwakwe kukabanga natwisa mukumushinshimuna.'' ³ Ulo Herodi imfumu aumfwile ifi, alisakamikilwe, pamo na bena Yerusalemu bonse. ⁴ Herodi aliletele capamo bashimapepo bakalamba bonse na bakalemba ba bantu, kabili alibepwishe ati, ''Nikwisa Kristu ali no kufyalilwa?'' ⁵ Balilandile kuli ena ati, ''Mu Betelehemu yaku Yudea, pantu ifi efyalembelwe na bakasesema, ⁶ 'Lelo webo, Betelehemu, mu calo cakwa Yuda, tauli uwacepesha muliba kateka ba Yuda, pantu muli webo emukafuma uukateka, uukacema abantu bandi abena Israeli.''' ⁷ Nolu Herodi alikutile abaume bamano mu bumfisolo no kubepusha inshita ulo ulutanda lwa monekele. ⁸ Ali batumine ku Bethlehemu, ukwebati, ''Kabiyeni muye kufwaya bwino palwa kanya. Ulo mwakasanga, mukandetele akasebo pakwebati na nebo wine ningesa no kwisa kumushinshimuna.'' ⁹ Panuma ya kumfwa amashiwi ku mfumu, balile uko bali kuya, no lutanda bamwene ku kabanga lwali batangilile mpakafye lwasuka lwaya kwiminina pa mulu apo akanya kali. ¹⁰ Ulo bamwene ulutanda, balisekelele ne nsansa nganshi. ¹¹ Balingile mu ng'anda kabili balimwene akanya na nyina Maria. Baliwile panshi no kukashinshima. Baliswile ifipao fya fyuma fyabo no kumutula ifyabupe fya golide, ububani na muri. ¹² Lesa alibasokele muciloto ati bebwelela kuli Herodi, eco balibwelele ku calo cabo ukubomfwa inshila imbi. ¹³ Panuma yakufumako, malaika wakwa Shikulu amonekele kuli Yosefe muciloto no kumwebati, ''Ima, senda akanya na nyina, no fulumukila ku Egupti. Ukekale kulya mpaka nkakwebe, pantu Herodi akofwaya ukonaula akanya kobe.'' ¹⁴ Bulya ubushiku Yosefe alimine no kusenda akanya na nyina ukuya ku Egupti. ¹⁵ Alikele kulya mpaka nemfwa yakwa Herodi. Uku ekwali ekufikilisha kwa mashiwi Shikulu alandile ukupitila muli kasesema, ukwebati, ''Ukufuma mu Egupti emo nakutile Umwana wandi Umwaume.'' ¹⁶ Nolu Herodi, ulo amwene ati ba mupumya kubaume mano, alifulilwe sana. Alitumine abakwipaya abana banono abaume mu Betelehemu na muli cilya citungu conse abali ne myaka ibili no kwisa panshi, ukulingana ne nshita iyo aumfwile ku baume bamano. ¹⁷ Nolu califikilishiwe icalandilwe ukupitila muli Yeremia kasesema, ukwebati, ¹⁸ ''Ishiwi lyalyumfwikile mu Rama, ukulilishika no kulosha kukalamba, Rakele akolila pa bana bakwe, kabili alikene ukumutalalika, pantu abana balifwile.'' ¹⁹ Ulo Herodi afwile, moneni, malaika wakwa Shikulu alimonekele mu ciloto kuli Yosefe mu Egupti no kulanda ati, ²⁰ ''Ima senda akanya na nyina ulekuya ku calo ca Isreali, pantu abo abalikufwaya umweo wa kanya balifwile.'' ²¹ Yosefe alimine no kusenda akanya na nyina nokwisa mu calo ca Isreali. ²² Lelo ulo aumfwile ukwebati Arkelasi akoteka mu Yudea mwipunda lya kwa wishi Herode. Alyumfwile umwenso ukuya kulya. Panuma yakumusoka kuli Lesa mu ciloto, alile ku citungu ca Galili ²³ kabili alile no kuya kwikala mu Nasareti. Ici cafikilishe ifyalandilwe ukupitila muli bakasesema, ukwebati akakutwa umwina Nasareti.