¹ Ol nem blong ol olfala bubu blong Jisas Kraes, Jisas i laen blong Deved, we Deved i laen blong Ebraham. ² Ebraham i papa blong Aesak, mo Aesak i papa blong Jekob, mo Jekob i papa blong Juda mo ol brata blong hem. ³ Juda i papa blong Peres mo Sera, we Tamara i mama blong tufala. Peres i papa blong Hesron, mo Hesron i papa blong Ram. ⁴ Ram hemi papa blong Aminadab, mo Aminadab i papa blong Nason, mo Nason i papa blong Salmon. ⁵ Salmon i papa blong Boas, mo mama blong hem Rehab, mo Boas i papa blong Obed mama blong hem Rut. Mo Obed i papa blong Jesse. ⁶ Jese i papa blong King Deved. Deved i papa blong Solomon we mama blong hem i woman blong Uraia. ⁷ Solomon i papa blong Rehoboam, mo Rehoboam i papa blong Abija. Abija i papa blong Asa. ⁸ Asa i papa blong Jehosafat, mo Jehosafat i papa blong Joram, mo Joram i laen blong Usia. ⁹ Usia i papa blong Jotam, Jotam i papa blong Ahas, Ahas i papa blong Hesikaia. ¹⁰ Hesikaia i papa blong Manase, mo Manase i papa blong Amon, mo Amon i papa blong Josaia. ¹¹ Josaia i laen blong Jekonaia mo ol brata blong hem. Long taem ya nao ol laen blong Isrel oli go wok slef long Babilonia. ¹² Nao long taem we oli stap long Babilon, Jekonaia i papa blong Sealtiel, mo Sealtiel i laen blong Serubabel. ¹³ Serubabel i papa blong Abiud, mo Abiud i papa blong Eliakim, mo Eliakim i papa blong Aso. ¹⁴ Aso i papa blong Sadok, mo Sadok i papa blong Akim, mo Akim i papa blong Eliud. ¹⁵ Eliud i papa blong Eleasa, Eleasa i papa blong Matan, mo Matan i papa blong Jekob. ¹⁶ Jekob i papa blong Josef we hemi man blong Meri, we hemi mama blong Jisas we nem blong Hem Mesaea. ¹⁷ Nao i stat long Ebraham i kam kasem King Deved, i gat fotin famle laen evriwan. Mo i stat long King Deved i kam kasem taem we ol man Babilon oli tekemaot ol laen blong Isrel oli go wok slef long kantri blong olgeta, i gat fotin laen evriwan. Mo i stat long taem ya we olgeta oli stap long Babilon, i kam kasem taem we Mesaea i bon, i gat fotin laen bakeken. ¹⁸ Hemia hemi stori blong Jisas Kraes we Hemi bon olsem wanem. Mama blong Hem Meri we i maretem Josef, we bifo olgeta oli bin mekem wan promes blong tufata i stap tugeta. Be bifo tufala i stap tugeta, Holi Spirit i mekem Meri igat bel. ¹⁹ Be Josef man blong Meri, hemi wan stret man; hemi no wantem mekem Meri i sem, hemi wantem blong lego Meri long wan kwaet fasin nomo. ²⁰ Be taem we hemi stat blong tinkbaot blong mekem olsem, wan Enjel blong Hae God i kamtru long hem long wan drim i talem se, Josef yu laen blong King Deved, yu no fraet blong tekem Meri olsem woman blong yu. Holi Spirit ya i mekem we hemi gat bel. ²¹ Bambai hemi bonem wan boe mo yu mas putum nem blong Hem se Jisas, from we Hem bambai i sevem ol man blong Hem, i tekemaot ol sin blong olgeta. ²² Nao ol samting ya i kamtru olsem, blong mekem tok ya i kamtru we Hae God i bin givim long profet we bifo i talem se ²³ Bambai wan tang gel we ino save man yet, hemi gat bel. Nao bambai hemi bonem wan pikinini boe blong hem, mo bambai olgeta oli putum nem blong Hem se Emanuel, we i minse God i stap wetem yumi. ²⁴ Nao taem we Josef i wekap, hemi mekem olsem we Enjel blong Hae God i talem long hem, hemi tekem Meri olsem woman blong hem. ²⁵ Be hemi no slip wetem Meri gogo Kasem we Meri i bonem pikinini blong hem. Mo Josef i putum nem blong Hem se Jisas.