¹ Afta long ol samting ya,Jisas i wokbaot long Galili.Hem i no wantem wokbaot long Judea,from we ol Jiu oli stap lukaotem hem blong kilimded hem. ² Nao i stap kam klosap long taem blong lafet blong ol Tent,we hemi wan lafet blong ol Jiu. ³ Mo ol stret brata blong Jisas oli talem long hem se, ''Yu aot long ples ya,yu go long Judea,blong ol disaepol blong yu bae oli save luk ol wok we yu stap mekem. ⁴ Spos wan man i wantem blong ol man oli save-gud hem,hem i no stap haedem ol wok blong hem.Taem yu stap mekem ol samting ya,yu mas soemaot yu wan long wol.'' ⁵ From ol brata blong hem tu ol no biliv long hem. ⁶ Jisas i talem long olgeta se, ''Taem blong mi i no kam yet,be taem blong yufala i redi oltaem nomo. ⁷ Wol oli no save hetem yufala.Be oli hetem mi,from we mi givim witnes se ol wok ya oli rabis. ⁸ Yufala igo fastaem long lafet;Bae mi no go long lafet naoia,from taem blong mi ino kam fulwan yet.'' ⁹ Afta we hem i talem ol samting ya long olgeta,hem i stap long Galili. ¹⁰ Be taem ol brata blong hem oli go antap long ples blong lafet,nao hem tu igo antap,hem i no soemaot hem be i haed nomo. ¹¹ Ol Jiu oli stap lukaotem hem long ples blong lafet mo oli talem se, ''Wemem man ya?'' ¹² Mo plante man oli stap tokbaot hem fulap.Samfala oli talem se, ''Hem hemi wan gudfala man.'' Ol narafala man oli talem se, ''No,hem i stap trikim ol man.'' ¹³ Be i nogat man i tok stret,from oli fraet long ol Jiu. ¹⁴ Nao long medel blong lafet ya,Jisas igo antap long tempol mo hem i stat blong tij. ¹⁵ Nao ol Jiu oli sapraes,mo oli talem se, ''Man ya i save rid olsem wanem?Hem i neva skul.'' ¹⁶ Nao Jisas i ansa long olgeta se, ''Ol doktrin blong mi oli no blong mi,be oli blong man ya we i sendem mi ¹⁷ Spos wan man i jusum blong mekem plan blong God,bae hem i save se doktrin ya,we i kamaot long God, o mi nomo mi stap Toktok. ¹⁸ Man we i toktok hem wan,hem i stap luakaotem glori blong hem wan nomo.Be man we i stap lukaotem glori blong hem we i bin sendem hem,man ya i tru mo i nogat wan ivel long hem. ¹⁹ Be Moses i bin givim loa long yufala?Be yet i nogat wan long yufala we i folem loa ya?From wanem nao yufala i stap traem blong kilimded mi?'' ²⁰ Ol man oli ansa se, ''Yu yu gat wan devel.Huia i stap traem blong kilimded yu?'' ²¹ Jisas i ansarem olgeta se, ''Mi bin mekem wan wok nomo,be yufala evriwan i sapraes. ²² Mi talem olsem from we long loa,Moses i bin givim kastom blong sekomsaes long yufala (i no from we i kamaot long Moses,be i kamaot long ol bubu).Mo long sabat blong dei,yufala i mekme sekomsaes long wan boe. ²³ Spos wan boe i mas tekem sekomsaes long sabat blong i no brokem loa blong Moses ,from wanem nao yufala i kros long mi from we mi bin hilim wan man long sabat? ²⁴ Yufala i no sud jajem ol samting folem lukluk nomo,be yufala i mas jaj wetem stret jajmen.'' ²⁵ Nao sam man Jerusalem oli talem se, ''Be hem i no man ya we oli stap traem blong kilimded hem? ²⁶ Be,yu luk,hem i toktok i no fraet,mo oli no tok long hem.Ol haeman oli ting se hemia stret Mesaea? ²⁷ Taem Mesaea i kam,bae inogat man i save ples blong hem.Be yumi save ples blong man ya.'' ²⁸ Taem Jisas i stap tij long tempol ,hem i singaot se,Yufala i save mi,mo yufala i save ples blong mi.Be mi no kamaot long mi wan,be man ya we i sendem mi,hem i tru,mo yufala i no save hem. ²⁹ Be mi mi save hem from we mi kam aot long hem,mo hem nao i sendem mi.'' ³⁰ Nao oli traem blong holemtaet hem,be i nogat man i holem hem,from we taem blong hem i no kam yet. ³¹ Mo fulap man oli biliv long hem,mo oli talem se, ''Taem Mesaea ikam,bae hem i no save mekem moa merikol bitim hemia we man ya i mekem finis?'' ³² Nao ,ol farasis oli harem se ol man oli stap tokbaot hem olsem.Ale,ol farasis mo ol jif pris oli sendem ol ofisa blong tekem hem. ³³ Jisas i talem long olgeta se, ''Mi gat smol taem nomo blong stap wetem yufala,mo bae mi go bak long man ya we i sendem mi mi kam ya. ³⁴ Bae yufala i lukaotem mi be bae yufala i no save fainem mi;ples we mi stap go long hem yufala ino save kam wetem mi.'' ³⁵ Nao ol Jiu oli askem ol narawan se, ''Hem i stap go long weaples,we bae yumi no save faenem hem?Hem i stap plan blong go long ol man Jiu we oli stap wetem ol Jentael?Mo bae hemi tijim ol Jentael? ³⁶ Wanem kaen toktok ya we hem i talem se , 'Bae yufala i lukaotem mi,be bae yufala i no faenem mi.' Mo 'yufala i nosave kam long ples we bae mi stap long hem'?'' ³⁷ Long las dei blong lafet ya we dei ya i impotem tumas,Jisas i stanap mo i singaot se, ''Spos eni man i tosta,letem hem i kam long mi,mo i dring. ³⁸ Man we i biliv long mi,bae hem i olsem we skripja i talem se , 'Ol springwota we i laef bae oli ronaot long hat blong hem oltaem.'' ³⁹ Be hem i stap tokbaot spirit we olgeta we oli biliv long hem,bae oli risivim.From we Holi Spirit ino kam yet,from we Jisas i no kasem ful glori blong hem yet. ⁴⁰ From ol samting ya,taem oli harem toktok ya,fulap man oli talem se, ''I tru ya .Hemia Profet ya.'' ⁴¹ Mo sam oli talem se, ''Hemia nao Mesaea.'' Be sam oli talem se, "'Yu ting se Mesaea bae i kamaot long Galili? ⁴² Skripja i talem se Mesaea bae i kamaot long famli laen blong David mo i kamaot long Betlehem,we i taon blong David.?'' ⁴³ Nao igat wan split long grup ya from hem. ⁴⁴ Mo sam oli wantem tekem hem,be i nogat wan man i holem hem. ⁴⁵ Nao ol ofisa oli go bak long jif pris mo ol farasis,mo oli talem long olgeta se, ''From wanem yufala i no tekem hem ikam? ⁴⁶ Ol ofisa oli ansa se, ''I neva gat wan man i toktok olsem man ya.'' ⁴⁷ Nao ol farasis oli ansarem olgeta se, ''Hem i bin trikim yufala yu? ⁴⁸ I nogat eni farasi o memba blong gavman we oli biliv long hem? ⁴⁹ Be olgeta nomo we oli no save gud loa.Mo bae oli kasem kes.'' ⁵⁰ Nikodimas (man ya we i bin kam long Jisas long naet ,we hem tu i wan long olgeta ya),hem i askem olgeta se, ⁵¹ Loa blong yumi i no save jajem wan man bifo we yumi lisen long hem mo yumi save wanem we hem i mekem?'' ⁵² Oli ansarem hem se, ''Yu tu,yu wan man Galili?Traem luk ,mo bae yu faenemaot se inogat wan profet we ikamaot long Galili.'' ⁵³ Nao olgeta oli go wan wan long ol haos blong olgeta.