1
Mifala i raet i kam long ufala blong tokbaot man ya we i stap finis taem wol i no stap iet. Hem nao i karem tok blong laef we mifala i harem mo mifala i luk hem stret long ae blong mifala, mo mifala i lukluk gud long hem mo mifala i tajem hem.
2
Yes, laef i kam long klia ples, nao mifala i luk mo mifala i tokbaot. Mifala stap talem gud long ufala se laef ia we i no save finis, fastaem hemi stap wetem Papa blong yumi, be naia Papa blong yumi soemaot hem long mifala.
3
Mifala i stap tokbaot man ia we mifala i luk fes blong hem finis mo mifala i harem voes blong hem. Mifala i mekem olsem blong yufala tu i save joen wetem mifala. Mo yumi evriwan i save joen wetem Papa blong yumi mo pikinini blong hem, Jisas Kraes.
4
Mo mifala i raetem tok ia i kam long ufala, blong bambae oltaem nomo yumi evriwan i save glad we i glad.
15
Tok ya we mifala i harem finis long hem,mo mifala stap talemaot long yufala i olsem:"God hemi olsem delaet, i nogat tudak nating i stap long hem."
6
Be spos yumi talem se yumi joen gud wetem hem be semtaem yumi stap kontinu blong wokbaot long tudak, yumi stap kiaman nomo mo yumi no folem tru tok nating.
7
Be spos yumi stap wokbaot long delaet, olsem we God i stap long delaet, bae yumi evriwan i joen gud mo blad blong pikinini blong hem Jisas bae I stap mekem yumi klin long olgeta sin blong yumi.
8
Nao spos yumi talem se yumi no kat sin, yumi stap kiaman nomo long yumi, mo yumi no folem tru tok nating.
9
Be spos yumi talemaot ol sin blong yumi long God, yumi save bilif long hem from fasin blong hem i stret oltaem. Hem bambae i fogivim yumi from ol sin blong yumi, mo i tekemaot ol rabis fasin blong yumi, bae i mekem yumi klin.
10
Spos yumi talem se yumi neva mekem sin, tok ia i olsem we yumi stap talem se God i kiaman, mo tok blong hem i no stap nating long yumi.
1Long krik lanwis sam long olfala kopi oli raetem se, "mo mifala i stap raitem ol tingting ia long yu blong yu save harem gud mo stap glad."