¹ Bhuku redzindza raDjesu Kirisitu, mwana wa David, mwana wa Abrahama. ² Abrahama akawe Bhabha wa Isaka; Isaka, Bhabha wa Djakob; Djakob, Bhabha wa Djuda nehama dzake; ³ Djuda akawe Bhabha wa Faresi na zara, akabharwa na Tamar. Faresi akawe Bhabha wa Esrom ; Esrom akawe Bhabha we Aroni; ⁴ Aroni akawe Bhabha wa Aminadabi; Aminadabi, Bhabha wa Nazon; Nazon, Bhabha wa Sarmom; ⁵ Sarmom akawe Bhabha wa Boaz, akabharwa na Raabe; Boaz, Bhabha wa Obedi, akabharwa na Ruti; Obedi, Bhabha wa Jese, uye ⁶ Jese akawe Bhabha wa mambo David. David akawe Bhabha wa Soromoni, akabharwa nemukadzi wa Urias. ⁷ Soromoni akawe Bhabha wa Roboao; Roboao, Bhabha wa Abiasi, Abiasi, Bhabha wa Aza. ⁸ Aza, Bhabha wa Josafa; Josafa akawe Bhabha wa Jorao, uye Jorao akawe madziteteguru wa Oziasi. ⁹ Oziasi, akawe Bhabha wa Jotao; Jotao, Bhabha wa Acaz; Acaz, Bhabha wa Ezequia; ¹⁰ Ezequia akawe Bhabha wa Manase; Manase, Bhabha wa Amom; Amom, Bhabha wa Jozia, uye ¹¹ Jozia akawe madziteteguru wa Jekonia uye ne hama dzake, panguwa yekusungwa kwawo kwenda kuBabironi. ¹² Uye, kubva pakusungwa kwawo kwenda kuBabironi, Jekonia akawe Bhabha wa Saratieri; Saratieri, akawe madziteteguru wa Zorobaber; ¹³ Zorobaber, akawe Bhabha wa Abiudi; Abiudi, Bhabha wa Eriaquim; Eriaquim, Bhabha wa Azor; ¹⁴ Azor, akawe Bhabha wa Sadoqui; Sadoqui, Bhabha wa Aquim; Aquim, Bhabha wa Eliudi; ¹⁵ Eliudi, akawe Bhabha wa Eliazar; Eliazar, Bhabha wa Mata; Mata, Bhabha wa Jako, uye ¹⁶ Jako akawe Bhabha wa Djosefa, mamuna wa Maria, akabhara Djesu, wiana unodhainzua Kirisitu. ¹⁷ Madzindza ese: kubvira kuna Abrahama dzamara David, akawe gumi nemarongomuna emadzindza; kubvira kuna David dzamara pakusungwa kwawo kuendeswa kuBabironi, akawe gumi nemarongomuna emadzindza; uye kubva pakusungwa kwenda kuBabironi dzamara Kirisitu, akawe gumi nemarongomuna emadzindza. ¹⁸ Kubharwa kwaDjesu Kirisitu kwakaitika kudhai: Maria, mai wake, ainga ari tchikomba tchaDjosefa, asi asati abhatanidzwa pamutchato, iyena akawonekwa anepamwiri pemwiya mutswene. ¹⁹ Djosefa, mamuna wake, ainge ari mwanarume wakatendeka, uye ainge asikadhi kumunyadzisa kurijinji, wakarangarira kumusia mutchibhisebhise. ²⁰ Akati etchirangarira zwiro izwi, imwe ngirozi yaIshe yakawiya kuna iyena muhope, yetchiti: "Djosefa, mwana wa David, usatye kutambira Maria semukadzi wako, nokuti zwiri muna iyena zwaizwa nokupaswa neMweya Mutswene. ²¹ Iyena utchabhara umwe mwana uye iwewe utchamudhainza kuti Djesu, nokuti Iyena utchaponesa anhu ake kuzwitema zwawo". ²² Zwese izwi zwakaitika kuitira kuti zwidzadziswe zwakabuiwa naIshe nokudha kwamuporofiti: ²³ "Zwino nbhandara itchabata pamwiri uye itchabhara umwe mwana, uye atchamudhainza Emanuer, zwinodha kubuya Mwari nesu". ²⁴ Djosefa pakupatika muhope dzake, wakaita zwaakange atongerwa nongirozi yaIshe uye akamutambira se mukadzi wake. ²⁵ Nokudharo aana kupinda mumaponde naiyena, dzamara kubhara mwana. Uye iyena akamupa zina rekuti Djesu.