¹ Kha sa devu khece na vikwa kwe qusa qei vakharogocia kha tlia na rorogo kha odakhi dra domo na le wara mai lomalagi kha ra covakhinia no, "Aliluya! na cola, na vakharokhorokho qa na qwaqwa me leya na Khalou. ² Na leya vakhatulewa khei du qa dodonu, ni kho khoya kha sa lewa devu na dau tagwane levu khko khoya kha vakhacakhacania na vuravura ina leya dautagwane. Kha sa qei saumia dra dra na leya tamata mai e lima." ³ Kha ra sa tata leqwa i na i kwa rua ni gauna: "Aliluya! Khei na levu na kheya khobulu qa tamu mudu." ⁴ Kha ru khoruva na ruasagavulukhava na tuqwaqwa qei koru na kwa cola khei va qa ru qwaravia na Khalou, kho khoya kha gatule tu i na nono vakhatunaga. Kha ra kwaya, "Emeni. Aliluya!" ⁵ Kha sa qei rogo mai na i nono vakhaturaga kha tlia na domo, kha kwaya, "Me vakhavinavina vua na Khalou, kho mu khece na leya tamata, kho mu na dau matakhuci khoya, kho khora ruarua na tamata tamu yaga qa na tamata qwaqwa." ⁶ Qu sa qei varogocia kha tlia na rorogo kha odakhi dra domo na tamata kha ra le wara, odakhi na rorogo ni wai drodro, qa odakhi na rorogo ni lutu ni yaseyase , kha ra kwaya, "Aliluya! Me viliutakhi no ga na leda Khalou qwaqwa. ⁷ Me da marau qa vakharokhorokhotakhini khoya! ni sa yaco mai kwe na gauna ni vakhawati ni Lami, qa sa vakharau tu na yalewa me vakhawati. ⁸ Kha sa soli vua me vakhaisulu i na lineni matayasewa qa savasava," (na lineni matai yasenia savasava na Khalou.) ⁹ Kha sa qei kwaya va khe au na agilosi, "Mo vola, sa khalougata kho khora na lei suneti i na khanavata ni vakhawati ni Lami," Kha kwaya muni vekhe au, "A kwe na leya tata du na Khalou." ¹⁰ Qu sa qei khoruva mequ qwaraviya, sa qei kwaya vakhe yau kho khoya, "Mo khua ni odakhi tara kwe! Kho yau na dauniviqwaravi odakhi muni kho ikho qai khora na viwekhani da qulu khata tu na i tukhutukhu baleti Jisu. Mo qwaravia na Khalou, na i tukhutukhu khi Jisu no na yalo ni parofisai." ¹¹ Qu sa qei tolavia ni tadola na lomalagi, qa qu tolavia kha tlia na ose sesevu. Khokhoya kha vodocia no kha nia e yaca kha dodonu qa na du. Kha sa dau lewa vakhadodonu kho khoya kha dau tara na i valu. ¹² E yalokha ni mata kha odakhi na mamaudre vakhamatakhu, qa wara na i sala vakha turaga ie ulu. Kha sa wara na yaca kha sa volai tu vua kha tikhai tlia leqwa kha khilatia, kho khoya tatlia ga. ¹³ Kha sa vakhaisulutakhi i na tlia na i sulu balavu kha luvui i na dra, qa sa leicovi ina yaca "Tata ni Khalou". ¹⁴ Na sotia khece ni lomalagi kha ra takhuci khoya i na ose sesevu, kha ra vakhaisulu ina lineni matayasewa, sesevu qa savasava. ¹⁵ Kha sa la mai e gusu kha tlia na i sseleiwau gare kho khoya kha vakhayagatakhinia me vakhamate ni khora khe na vimatanitu, qa na lewai khora i na khaukhamea. Kha sa sikhitia kho khoya na waini ni leya yaloca na Khalou qwaqwa. ¹⁶ Kha sa volai no e yaca i na luya i sulu qa e khalava: "Tui ni Tui qa na Turaga ni vi Turaga." ¹⁷ Qu sa qei tolavia kha tlia na agilosi kha dune tu i na matarusiga. Kha sa coco ina domo i levu i vuara khece na manumanu khei vukha i na maliwa lala, "Me la mai, mu mai sogoni vata i na khana vata levu ni Khalou. ¹⁸ Mu mai khania na viakho ni dra yago na tui, vicikho ni dra yago na turaga ni valu, na vicikho ni drayago na tamata qwaqwa , dra vicikho na ose qai khora na vodocia, qa dra vicikho na tamata khece, kho khora na qwalala qa na bobula, khora na tikhai dra bete qai khora na qwaqwa." ¹⁹ Qu qei tolavia na manumanu levu qa i khora na tui ni vuravura qa na ledra mataivalu. ²⁰ Kha sa qei sobe na manumanu vakhamatakhu levu vata qaya na Parofita rewarekwa, kho khoya kha dau tara no na cakhacakha mana i e mata. Na vi cakhacakhamana kwe kha dau vakhacala ni khora no khe kho khora sa volai tu vuara na i vakhatakhei ni manumanu qai khoya khei qwaravia na leya matakhau. Kharu sa viritakhi ruarua ina drano ni quto makha. ²¹ Kho khora na kheya vo kha ra lei vakhamate i na i seleiwau kha la mai e gusu li khoya kha vodocia no na ose. Kha ra sa qei khania dra vicikho kho khora khece na manumanu vukhe.