¹ Au sa qai igavia e dua leqa a agilosi kaukauwa ni siro mai lomalagi. Ea ma vakasulumi mai e na o, qa va wavolita voli u a ona ulu e dua a drodrolagi. A ona mata e tautauvata ga a matasiga, ei a ona la, a yameyame ni bu'a ve'a. ² Tari voli o ea e dua a vola vivigi lailai qa ma sa dola tu ina ona liga. Qa biuti'a o ea a ona la i matau i waitui e i na ona la i mawi i vanua. ³ Wa mai ela waqe vadomoilevu tautauvata ni dua a laione. Ni sa taratara oti sa qai sauma mai vadomoilevu a 'uru'uru e vitu. ⁴ Ena ga edru sa vosa ina a 'uru'uru e vitu, au sa vavarau tu meu volavola. Ia qa au roga e dua a domo mai lomalagi ni aya mai vei au, "Maroroa me 'a vuni a vei'a edru sa aya 'a 'uru'uru e vitu. Mo se 'ua ni sa vola." ⁵ Sa qai doda'a ca'e i lomalagi a ona liga i matau o ea a agilosi, qai igavia ni tucake tu e na wasawasa eina vanua mamaca. ⁶ Qa sa vosa bubului e na yaca ni Alou, ia ea sa bula no'ga qa tawamudu, qa sa bula e lomalagi ei na vei'a sa no tu kina a vuravura ei na veika sa no tu 'ina, a sa' aya a agilosi, "Sa na maqa leqa a wawa. ⁷ Ia e na gauna sa uvicia ina a ona davui o ea a i 'avitu ni agilosi, e na va'acavatia ina a Alou a ona t'uvatuva vuni me tautauvata ga ni sa va'adewa ta'inia oti vei edra a ona dauniveiqaravi, o odra a parofita." ⁸ Sa qai vosa leqa vei au, a doma au a roga mai lomalagi ni sa aya "Mo la'o qa tauria a vola vivigi sa tevu'i tu ma ona liga a agilosi sa tuca'e tu e na wasawasa, e na vanua mamaca. ⁹ Au sa qai la'o waqe vei ea a agilosi qau 'aya vei ea me solia mai a i vola vivigi lailai, sa qai 'aya vei au o ea, tauria qa 'ania; e na lai vu'i me gaga i na nomu 'ete ia e 'ami'amica me tautauvata a oni i na omu gusu. ¹⁰ Au sa qai taura a i vola vivigi lailai, oya au ma 'ania mai na ona liga a agilosi, a sa 'ami'amica sara me, 'auva'a na oni e 'na noqu gusu ia sa qai ve'i me gaga i na oqu 'ete ni'u sa 'ania oti. ¹¹ Sa qai aita'i mai vei au, "Sa dodonu ve'ai mo tara va'inia ai tu'utu'u ni Alou me baleta a veimatanitu, ei na vei matatamata, ei na veimataqali vosa, ei na tai eso."