¹ Paulo, mubetesi wa leza ambi mutumwa wa Jesu kilisito kulusyomo lwa bantu basalala ba leza mane oluzibo lwamasimpe olo lweendelana mumbunaleza. ² Kayakidwe olulangilo lobuumi butamani obo leza, uutabeji, wakashomezya kazitana sika ziindi zya mamanino zyoonse. ³ Muciindi ceelede wakayubununa ijwi lyakwe kwiinda mukukambauka omo mbuli mbundakatumwa mukulailila kwaleza mufutuli wesu. ⁴ Kuli Taitasi mwana we nchonzyo mulushomo ndotujisi. Luse oluumuno luzwa kuli leza tata ambi o kilisitu Jesu mufutuli wesu. ⁵ Nchecico ncindakakusila mukiliti, mukuti ubambulule zyoonse zintu zitanamana akusala baalu bazikombelo mumiinzi yoonse mbuli mboonyina mbundakakulailila. ⁶ Mwaalu wecikombelo abe muntu utakwe kampenda, uukwete mwanakazi omwe buyo, bana bakwe kabali bashomi batainsi badakwi naa bataswiilili. ⁷ Cilelede kumendelezi, mbwali mubanzi we ganda yaleza, uutakwe kampenda. Taelede kuba sikudantola,kutanyema-nyema kufwambana,kutaba mukolwi naa simanyongwe, ambi utainsi mwaalumi syaachvule-mwangu. ⁸ Muciindi cokuti weelede kuba sichimwa beezu ambi mweenzinyina wecibotu. Weelede kuba uulibatamika, uululeme, uusalala, ambisikulijata. ⁹ Weelede kujatisya kapati makani akasimpe akuisigwa mukuti kwakonzeka ape malailile kuli bamwi enjiisyo zibotu okusandula abo bamukazya. ¹⁰ Nkaambo mpobali bantu banji batakwe bulaye,baamba majwi abuyo akweena, kwaambisya abo basikupalulwa. ¹¹ Kulelede kubalesya. Nkaambo balalyanganisya misa yoonse eyo njibasikila cokwimaninizya mukwiiyisya zintu nzibi teelede kwiiyisya. ¹² Umwi wabo wabasinsimi wakati,"Bakiliti mbabeji ciindi coonse,mbabi mbuli banyama, mbaasinyandya bakandu." ¹³ Inkani eyi ili masimpe nkaambo kenamu, ubapatokile canguzu,mukuti bayume mulusyomo. ¹⁴ Kutamba kuti bagame kuswilila twaambo tobuyo totunsiyansiya twaba juda emilawo yabantu buyo bakaka zyamasimpe. ¹⁵ Kuli abo basalali, zintu zyoonse zilasalala. Pele kuli abo basofweede batazumuni, taakwe cisalala, pele mizeezo yabo amangezeezya abo alisofwede. ¹⁶ Balyaamba kuti bali mwizi leza pele balamutama kwiindilila mumicito yabo. Balasesemya, tabaswiilili, ambi tabaelede kucita milimo mibotu niiba buti.