Capítulo 3
Acmac'acja ta ncotnec acuetammalhca actemo wanlha ta nnelha acnem
1
Alhenquesec jata mocjom asqueltennascama lheiap eijo ta njan, acmac'o ta ncowac nnelha acnem lhmanquec jam, ncowac jata njan anmenammalhca aquiawai'a.
2
Etnanco ta enenlhet apquenmeiauquesammacpo apancawec caselha apanco'oc, wanlha ta njan etnancoc nquescama aptengiaicamoc pataccom apanco'oc, etnancoc jata njan apquelammacpo, etlhenacpoc jata njan apancawec aptaicamoc neten apancawec melhno po'oc. Eltacnewac jata njan Engiapom Neten apuesai'a, mellajec jata njan ncana'ac, metnanquec jata njan gracias ellanjoc ma'a, eltacnewac jata njan lhamacjo caselha alleniem'o Engiapom Neten.
3
Mellamelemmec, melietnajec jata njan napaqta'ac po'oc, elpaiesama ta njan apuesai'a po'oc, menmanwomec jata njan apualho'oc aliatecamoc ncollatsecama ellanancoc, meliamolhma apancawec jata etnancoc ma'a enenlhet'awoc anac, apquellammelhma lhamacjo aptemacja caselha altacmelo. 4 Eliennencasecjac jata njan apquetlhema'ac apancawe', ellanancoc jata njan caselha ncollatsecama aniem'o aliatecamoc apualho'oc coca metca atlhenaicama apualho'oc aquiaqmoiecja ncowac jata. Etnancoc jata apquellasennammacpo', ellanancoc jata njan caselha atlheianmacja la apualho'oc, metengianquec jata njan ellanancoc apmajaiacja nac Engiapom Neten.
5
Ncowac jata njan acnem apqueltaicama apancawec apquelleliejecjoc Engiapom Neten, coca
eliecpelcacpo ta m'a apquellelto niecje melleliejecjo m'a.
¡Mepalhacuom anquec lheiap ma'a enenlhet'awoc anac!
6
ncanec wanlha mota apquenmaicamoc moclhem'a aqjaiancolha nqueluana'ac la ncoliennactema nac au'alho'oc, apquenmajai'a eliennenquesec ma'a, allanei'o nac na au'alho'oc ncoliamolhma, allaianco nac na ncolliatancoc aliasponcomacja la au'alho'oc,
7
anmajai'o niecje njan ncolianwomjoc caselha altacmelo coca mancowai'ac alianweiacmo m'a acto nac jawe ngiapac anquec.
8
Ca enenlhet'awoc anac meliamolhma alheno lhquec apquellammelhma jengetlhecmoscama acto nac jawe ngiapac anquec, ca aptaiancolha lhnac nanec ma'a enenlhet apqueluesai'a Janes cacpota njan Jambres, apquellammelhmo lhnac nanec apquetlhecmoscama aplheianma Moisés, nnawec na m'a enenlhet'awoc anac nenwanlha nac aliaseianco mota lhma alquetamecamoc apualho'oc ncollatsecama, apqueliasqueiacmec na Engiapom Neten.
9
Coca nnelha ta ncotnenwomoc metlhenquesec jata, eluetacja toca njan aplhamacjo enenlhet'awoc aptaicamoc metca apqatco'oc ma'a meliamolhma nac, lhnac nanec na ntemac ma'a enenlhet'awoc apquellammelhma apquetlhecmoscama Moisés.
10
Coca lheiap Timoteo jawe aptonac lheiap ma'a ncanec apieplauquescanque asquetlhecmoscama lhta, jeieplonquec na amai, apiawec na lheiap asmac'acja la atnejec, apiawec na moi'asqueiam, metca aspecjescama, ascamelaiam, cacpota njan asiennactema asuascapma necsa asuetai'a mota aquientalhnema.
11
Apiawec na lheiap aslengaianco aquientalhnema aniem'o nema jeiaqmasecama lhta metca nnelha, ca actemo lhta asuetai'a m'a apiau'acja temma Antioquia, Iconio canjan Listra, coca Apuesque lhtoca jewonquescama mota tep ma'a.
12
Jawe ngiapac anquec ellengancoc jata nema acmenlhenaicama aplhamacjo apquellelto la apquenmajai'a ellanancoc caselha altacmelo aniem'o njan apquelleliejecjoc Cristo Jesús,
13
coca apquellelto nac meliamolhma canjan apqueliennenquescama nac po'oc, ncowenque pancoc jata apquellanecamoc caselha ncollatsecama nac, aplhaniec jata etnancoc apqueliennenquescama enenlhet'awoc, coca ncolhec jata njan aliennencasacjo m'a.
14
Lheiap coca elhenques jata mei'asqueiam aquiennactema apienweiacmo lhta, ncanec apiawec na lheiap ma'a acto jawe ngiapac anquec, ncanec na enenlhet'awoc apqueliamolhma apquetlhecmosecamo lhta lheiap.
15
Ampai'o lhta aptemacja nematca apianweiacmo lheiap ma'a waccajac anac actacmanma Engiapom Neten apaioma, acmowana njan ncotlhecmocsec lheiap ma'a actemacja apuoncasemmap tep aniem'o njan mei'asqueiam Cristo Jesús.
16
Coca lhamacjo conne waccajac anac ma'a apuatepnapma Engiapom Neten, acmowana ncotlhecmocsec acto jawe ngiapac anque, cacpota njan aluetasquescama
enenlhet'awoc apquellanenco la ncollatsecama. Acmowana njan nconnawacsec apquellanenco la caselha ncollatsecama canjan atlhecmosecamoc acto acpeiwomo nquec,
17
cacpota njan aplhamacjo Engiapom Neten apquennemolhema la'a ncolianwesquescamjoc, ncolpenacsec alianwesquescaiacmo enenlhet'awoc cacpota ellanancoc lhamacjo actemacja caselha altacmelo.