¹ Ngabona silo siphuma elwandle, sasinetimphondvo letilishumi, netinhloko letisikhombisa, kuleyo nakuleyo nhloko kwakuneligama lelihlambalatako. ² Lesilo sasifanana nengwe, tinyawo taso tatifanana netelibhele, umlomo waso wawufanana newelibhubesi. Nyokangwenya wasinika emandla akhe, nesihlalo sakhe sebukhosi, nemagunya akhe lamakhulu. ³ Lenye yetinhloko taso yayilinyatwe yakhehletwa safufa, kodvwa lelinceba laso lekufa lelashwa laphola, wonkhe umhlaba wamangala wasilandzela lesilo. ⁴ Bantfu bakhonta lonyokangwenya, ngobe emandla akhe abewanike lesilo, lesilo basikhonta batsi,''Ngubani longalwa naso?'' ⁵ Lesilo saphiwa umlomo wekukhuluma emavi lamakhulu lasinengiso newekuhlambalata. Sevunyelwa kutsi sisebentise emandla aso tinyanga letingema 42. ⁶ Sahlambalata Nkulunkulu, sihlambalata libito lakhe, nalapho ahlala khona, nabo bonkhe labahlala khona ezulwini. ⁷ Savunyelwa nekutsi silwe nalabangcwele sibehlule, sanikwa nemandla etikwayo yonkhe imindeni, nebantfu, netilimi, netive. ⁸ Bonkhe labahlala emhlabeni bayawusikhonta, bonkhe labo lekwatsi umhlaba ungakasekelwa emabito abo angete abhalwa encwadzini yekuphila yeliWundlu lelahlatjwa. ⁹ Lowo lonendlebe akeve. ¹⁰ Nakukhona lofanele kutfunjwa, akatfunjwe, nakukhona lofanele kubulawa ngenkemba, akabulawe ngayo, loku kubita kucinisela nekukholwa kwalabangcwele. ¹¹ Ngase ngibona lesinye silo lesaphuma emhlabatsini, sasinetimphondvo letimbili letatifanana netelizinyane lemvu, sakhuluma njenganyokangwenya. ¹² Sasebentisa onkhe emandla esilo sekucala ngeligunya laso, saphocelela umhlaba nabo bonkhe labahlala kuwo kutsi bakhonte lesilo sekucala leselashwa saphiliswa encebeni laso lekufa. ¹³ Senta tibonakaliso letinkhulu, ngisho nekwehlisa umlilo ezulwini wehlele emhlabeni embikwebantfu bonkhe babuka. ¹⁴ Silo sesibili savunyelwa kutsi sikhohlise bonkhe bantfu labahlala emhlabeni ngaletibonakaliso lesasitenta ngeligunya lesilo sekucala. Lesilo sesibili sabatjela kutsi bakhe umfanekiso . bakhele lesilo sekucala lesasinelinceba lenkemba lelelashwa laphiliswa. ¹⁵ Silo sesibili sanikwa emandla ekuphefumulela lomfanekiso wesilo, kuze kutsi ukhulume, sente nekutsi labo labangawukhomti lomfanekiso babulawe. ¹⁶ Lesilo saphocelela bonkhe labancane nalabakhulu, ticebi netimphuya, labakhululekile netigcili, kutsi babekwe luphawu ngulowo nalowo esandleni sakhe sangesekudla nome ebuntini. ¹⁷ Loko kwentelwa kutsi kubete lotsengako nome lotsengisako ngaphandle kwekutsi abe naluphawu lekulibito lesilo nome inombolo yelibito laso. ¹⁸ Loku ke kubita kuhlakanipha. Lowo lonekucondza akabale inombolo yalesilo, ngobe lenombolo imele umuntfu. Lenombolo ingema 666.