¹ Paulo, ohoigyemani l’Ojok karik ohifak lo Yesu Kristo d’eruhon n’ohothing h’Ojok honyimuni karik atehan n’eladiri neruk h’elajok, ² h’eyihina nesu namanya mak, neruhok Ojok laang odwala dihithemi hoperi fodok h’orii. ³ D’omiru hobis, ethalyehi ocame lonyong th’anyahina thananya ithafothohini donang th’efahit thon’Ojok ohoithalwahani lohothai. ⁴ Do Tito, olonyi ladiri l’eruhon nelulung nahothai. Alwahio karik elihan th’Ojok Omonye, karik Kristo Yesu Ohoithalwahani lohothai. ⁵ Aca, th’arami thohune, edehi nang iye di Krete, dihuhumahinere iye asang hakabong, ingohunu karik dithandefyo ohobolok ordine, iring nanyahinerek nang iye. ⁶ Ohoboloni tholiboro, onde l’afure aboithe, h’okalifinok hoiruk karik ethaningye arami. ⁷ Owak othulo loingengelak karik lendafaitho ahang n’Ojok, tholiboro. Thaang hoithadarai, ingerejyethe, iboithoyithe, thoiriboithe karik thaang hoiwona ara othulo audoroni. ⁸ Kombwo thoiwona ara othulo loifothu ohothing, lomuno ayiji, lotek, lobis, lodwa karik lotek karik ayinik endafaitho ahwan nanyong. ⁹ Thowethai ara losiru hocame lathuhi etyenio, disarahini homok thothiforo isong d’etyenio nadiri karik ethabisahini ohothing hoida inyong. ¹⁰ Aca, owoni ohothing olwarai hoida, ohocamak ija karik odwalak, kereki ohothing h’abosio. ¹¹ Owak ithawejye isong. Isong hodithalongojyo ahangithek bukulung th’etyenio dirimahina ayiji nethorohojyo ofure lothulo, aning naang oirahi ityenio. ¹² Athuk lobo th’ohocorok hosong ajaran, “Ohothing ho Krete juui odwalak, oicangi h’amonyori karik ofathak oudorok.” ¹³ Obis ocame lya. Iring na, ithabisyethek isong thanako, diruhi diri ditha heruhon. ¹⁴ Hoithaningyethek oyendok h’ebokwo h’Ojudei dia efahitha h’ohothing heloithoro adi th’eladiri. ¹⁵ D’ohothing oliborok, olibori asang bukulung. Ti, d’ohothing hamuyak karik haang iruk, awang aning nalibo, ti, ahosi karik arami hothothaja hosong, athuhi amuyahi. ¹⁶ Iruhohini hijan otek isong Ojok, ti, aang owahi Ojok thegyemitha thohosong. Ongica isong hulo, aang ithaningye arami karik aang alwahuni aning naboling degyema nayyu.