¹ Mwelyo zyuba Jesu akuyenda no kuzwa hanje ye njuwo noku yenda kakara ambali ne wate. ² Eci caba cingi coku muzimburuka, haho akulizya mubwato nokakaramo. Coshe eci caba co kazyimana ha kamba. ³ Haho Jesu akuamba ezintuzingi kwa bo kenguli. Akuta ee, "Mushuwe, omukuni naayenda ku kukuna. ⁴ Hasha kuna entanga, zimwinya zo kugwira mumugwagwa, ezizyuni zo kezya kuzilya. ⁵ Entanga zimwinya zo kugwira mubu lya mabwe, omu kali nelyawana ebu lingi. Nawanguwangu haho zo kumena, kebaka lyebu li kalikwesi butungi. ⁶ Kono ezyuba ha sheli tanta, zokunyana kebaka lyokubura emisi, mi zo kuzyuma. ⁷ Zimwi entanga zoku gwira mu zishamu zeminga. E zishamu ze minga zokukura no kuzimina. ⁸ Zimwinya entanga neza gwira mubu erotu mi zokumena no kubika obweke, zimwinya zakuura mumakumi ahuura mumakumi, zimwinya zakuura mumakumi ehanja ne kumi lyonke, zimwinya makumi otatwe. ⁹ Ozyu akwesi matwi, mu musiye ateeze." ¹⁰ A barutwani bo kezya no kuamba kwa Jesu, "Cinji au ambanga ku cicaba munguri?" ¹¹ Jesu akutaba nokwamba kwa bo, "Muhetwe eciahemo co kushuwisisa ezywi lyo mubuso wo kuwiru, kono abo bazya kuhetwe. ¹² Ebaka lyokutee yenshezyu akwesi, nanahewe kobungi, abe nezintu zingi. Kono ozyu hazya nanatapiwa notu akwesi. ¹³ Ee ndiambanga na bo mwinguri, ebaka lyokutee babwene na bo, kono kaba bonisisi. Nanga nebashuwa kono kaba shuwisisi, kapa okushuwa nenja. ¹⁴ Kwa bo eci porofita ca Isaya ci zywizywireze, eci cita ee, 'Ozyu ashuwire mbwa shuwe, kono kwazya enjira ei shako shuwe; haho bwene nono bona, kono kwazya enjira eii shaka no kushuwisisa. ¹⁵ Aba bantu emyozyo yabo shiyahuli hakuzyuma, kame ba kababu kuku shuwa, kame baaritee kumesho abo, kutee basiye okubona na mesho abo, kapa okushuwa nematwi, kapa okushuwisisa nemyozyo yabo, kutee ne ba zoke kame, nendina bahoza.' ¹⁶ Kono efuyauzi nja mesho enu, abona, nematwi enu, ashuwa. ¹⁷ Zacahacaha obungi bwa ba porofita neba kwame aba barukite ba shaka oku bona ezinduzi mu bona kono kaba ziboni. Bashaka okushuwa ezintu ezi mushuwa kono kabazi shuwi bo. ¹⁸ Muteereze cware nguli yo mubyari. ¹⁹ Ozyu mwinya ashishuwa enzywi lyo mubuso na shalishuwisisi, omubbi kezya kucompora eci naca kuniwa mumozyo wa kwe. Ezyo nje ntanga naya kuniwa wa mumugwagwa. ²⁰ Ozyu na kuna mubu lyo mabwe ndonzywina a shuwa enzywi nokulisiya nawanguwangu. ²¹ Kutee hazya misi nenja azumina wangu kono munako ecenya. Ku shikabira obukababu ne mashando kebaka lye nzywi, hacunjura nawanguwangu. ²² Ozyo na kuna muzishamu ze minga, ndo muntu zyuna ashuwa ezywi, kono eye ashaka fasi no kuhomiwa ku cifumu ca kushinya ezywi, kono haho kashibiki zizyangantu. Ozyu na kukuniwa mubu erotu, ndozywina ashuwa ezywi nokulishuwisisa. ²³ Ndo muntu zywina abika ezizyangantu nokuzibabalera; nde ahola kuhura ku makumi ashuna kumakumi, ne makumi aula kumakuni eanjanekumi lyongi, nemakumi otatwe." ²⁴ Jesu akuamba enguli zimwinya kwa bo. Natee, "Omubuso wa kuwiru u fwana ne mukwame ozyu a kuna entanga ndotu mwiwa lyakwe. ²⁵ Kono a bantu ne balele, cakwe ecila na cakezya noku byala musozu amabere no kakiyendela. ²⁶ Ha zimena nokukula, nokubika obweke, haho esozu lyakezya kubonahala nelyo. ²⁷ Abeka bo mwine bu ba ku kezya nokuamba kwakwe, 'Ba, kali ne mwa kunamo entanga ndotu mwiwa lyenu? Mbuti ha shekwine esozu? ²⁸ A kuamba kwabo, 'Ecila ceco ca pangi zizi.' Abeka ba kuamba kwakwe, 'Aho oshake tuyende tukazikokele hanje?' ²⁹ Omwine webu akutee, 'Aa, kapa shaka mukokemo esozu, tema mbo mukoke ne misi yo mabele. ³⁰ Muzisiye bulyao zikulile hantu honke mbita kahula kuku shinja. He nako yo kushinja ne ndila amba kuba shinji, "Tango mukokemo esosu no kulibika masita mulihise, kono mubike amabele hantu honke no kua bika muciyongo cangu."" ³¹ Cware Jesu akuhitisa hape imwinya nguli kwabo. Akutee, "Omubuso wakuwiru ufwano no ku sharula embuto ezo mukwame no ka kuna mwiwa lyakwe. ³² Ezo ntanga ze cenya ku ntanga zo she. Kono hashezi kula ze nene kuhita ezicalano zo muluwa lyoshe. Zokuba ezishamu oko ezizyuni zo muwiru zo kezya ku zyakilako ezizumbo kumitabi." ³³ Jesu akuba sumwina hape imwinya nguli. "Omubuso wo kuwiru ufwana no mumela owo mukentu ahinda no ku shanganisa nenkomoki zotatwe zo busu mane oku zimba." ³⁴ Ezintu zoshe Jesu na zi amba ku cicaba ke nguli. Hape kwazya enguli kwazya eci naamba kwa bo. ³⁵ Ezi zi kele ke swanelo kwezi naza ambiwa kuba porofita kute necitendahare, hane kuambiwa, "Mbo ndi alure kanwa kungu ke nguli. Mbo ndiambe ezintu ezi kazi zikitwi kuzwa hamutomu we fasi." ³⁶ Cware Jesu aku siya ecicaba no ku kabila munjuwo. Abalutwani ba kezya kwakwe no kuambee, "taluse kwetu enguli ye sozu yo muluwa." ³⁷ Jesu ,akubataba no kutee, "Ozyu akuna entanga ndotu Mwana wo Muntu. ³⁸ Ewa ndifasi; cware entanga ndotu, aba mba bana be mu mubuso. Esozu mba bana bo muntu mubbi, ³⁹ cware ecira eci naca ba kuna ndi Jabulusi. Okushinja nga mamanikizo efasi, aba shinji mangiloi. ⁴⁰ Nanga bulyaho, esozu ha lishanganiswa no kulihisa no mulilo, mbo bulyaho shaka ne kube ku mamanikizo efasi. ⁴¹ Omwana wo Muntu nana tuma aba ngiloi ba kwe neba na shanganina hanje yo mubuso okuwiru ezintu zoshe ezipangite cibi, naba batente obubi. ⁴² Ne ba ba shohele mumulilo kauzimi, aho neinaba okulila no ku kwenga meno. ⁴³ Cware aba ba bacenete nebana benya bwa ndizyuba mumubuso wokuwiru we Shwabo. Ozyu akwesi matwi, mu musiye ashuwe. ⁴⁴ Omubuso we ku wiru u fwana bwe cifumu cizikete muruwa. Omu kwame hasici wana acizika. Nentabo ya kwe nakazya, kuhulisa ezintu zoshe ezi kakwesi, nokuura elyo ewa. ⁴⁵ Hape, omubuso we kuwiru ufwana bwe mukwame ozyo aulisa epelela ndontu. ⁴⁶ Hashi wana epelele yongi yobutokwa hawa, haku yenda no kaulisa zoshezi kakwesi no kayiula. ⁴⁷ Hape omubuso we ku wiru ufwana ne kanyandi na shoerwa muwate, no kushanganisa zoshe ezibumbiwa kemi futa wazo. ⁴⁸ Aha ka zyula, omuyambi nou ka kokela hakamba. Cware bo kukala hashi no ku shanganisa zo she zirotu nokuzibika mucibya, kono ezibbi zoshe ba zishoha. ⁴⁹ Mbobulyaha shaka no kube kumamaninikizo efasi. A mangiloi nana kezya kuzwisa a ba bbi mukati kaba ba cenete. ⁵⁰ Nebana shoherwa mumulilo ou kauzimi, nebana lila no ku kwenga meno. ⁵¹ Mwa shuwisisi ezozintu zo she?" A barutwani bo kuamba kwakwe, "Eni." ⁵² Cware Jesu a kwamba kwa bo, "Nanga bulyaho ozyu a zyibahala no kuba omurutwani wo ku wiru a fwana no mukwame ozyu a kwesi njuwo, ozyo akulupara ne zintu ze cifumu cakwe." ⁵³ Cware ha she kezye Jesu sha namani ezo nguli, akuyenda no kuzwa eco cibaka. ⁵⁴ Cware Jesu aku kabila mu ciralanda cakwe no kuruta abantu mu masinagoge abo. Enkalabo yokube ba kukomoka no kuamba, "O zyu mukwame kokwi na wana obu butali nezi makazo kwi zizwa? ⁵⁵ Ozyu mukwame kali ndozywina mwana wazywina omubezyi? Kali nyina ndi Mariya? Hape a bance, ba kwe kali ndi Jakobo, Josefa , Simone, ne Judasi? ⁵⁶ Hape aba nciye, kali mobena mukati ketu? Ozyu mukwame kokwi zizwa zoshe ezizintu?" ⁵⁷ Naa bafosekeza. Kono Jesu akuamba kwa bo, "Omuporofita abula ekute munaha yakwe no ku ba kwakwe." ⁵⁸ Hape kali na tenda emakazo zingi keba kee kaba zya ku zumina.