¹ Nokwakezya kuba kuti ee Jesu aha shamana kuraera abarutiwa bekumi nibobile akunanuku kuya buruta noku kutaza mu minzi yabo. ² Cware Johani aha shashuwa muntorongo kezi panga za Kiresite, akutuma mashwi ne barutiwa bakwe ³ noku musumwi nee, "Mane Ndiwe akezya, kapa kwena zyumwinya omuntu tuswanera ku tonderera?" ⁴ Jesu akutaba nokubata ee, "Muyende muka musumwine Johani ezi shimwaboni no kushuwa. ⁵ E zibofu zikwesi zibona, zihore za matende shezikwesi ziyenda, be mbingwa shebanawani e nceneso, bena ba sinkite mwatwi sheba shuwa hape, bena bantu nebafwa bakwesi ba buswa, bena bantu bashebete bakwesi basumwinwa mazywi marotu. ⁶ Zywina ka maninwi ntumero kwangu ena ne ntohonoro." ⁷ Mi ba bakwame aha kaba kayenda munjira yabo, Jesu akutanga kuamba ku cikwata ca bantu kaza Johani. "Cinji nemwayendera kabona muharaupa--o rutaka runyanganiswa ku moya? ⁸ Kono cware cinji ne mwayendera kabona--o mukwame a zwesi zizwato zitoretore? Mane mbobulyaho, bena bazwata zizwato zitoretore bahara mu mazyuo aba nfumu. ⁹ Kono cware cinji nomwayendera kabona, o muporofita? Eni, ndimisumwina, mi caha kuhita omuporofita. ¹⁰ Zyunu ndomwini wezi zi ñoretwe, 'Mubone, ndituma mutumwa wangu habuso bwe cifateho cako, ozyu shaka kurukiseze enjira yako.' ¹¹ Ndimisumwina ko buniti, kwaba bonshwe neba retwa ku mukentu kwaazya munene kuhita Johani Mukorobezi. Kono cware omunini kubo butokwa mu mubuso we wiru munene ku muhita. ¹² Kuzwa ku mazyuba a Johani mukolobezi kureta hanu, o mubuso we wiru ukabire mu manyando, mi abantu bo buhali bauhapa. ¹³ Ba porofita bonshe no murao kaba kwesi ba porofita mane kezya kuhura ha Johani. ¹⁴ Mi heba mutabera ku citambura, ozyu nde Elija, ozyu kena no kukezya. ¹⁵ Ozywa kwesi mwatwi, mu musiye ateeze. ¹⁶ Kunji ndiora kuswanisa oru rusika? Ruswana mbwee mbance ba zanina mu cibaka co musika, aba bakara nebakikuwaura ¹⁷ mi nebata ee, 'Twa milizezi kapyororo, kono kamwazani. Twa mizyimbili o ruzyimbo rwa maliro, kono kamwalili.' ¹⁸ Johani naakezya nashali enkoko kapa kuywa e waine, mi bata kuti ee, 'Akwesi a demona.' ¹⁹ Mwana o Muntu naakezya nalya hape naywa, mi bata ee, 'Ngamubone muntu o mulibu ne cidakwa, mulikani wa batelisi na bena batenda zibi!' Kono butali bubikirwe bulyo banabo." ²⁰ Cware Jesu akutatika ku kalimera e ntoropo mwina ka kaabupanga bungi bwe zintu zinene, kebaka lyo kuta ee kali neba bakira zibi zabo. ²¹ Okwesi bumai we, Korazini, okwesi bumai we, Betisaida. Nali e makazo zinene ezi zapangahara munu mwetu kuti nali ne zapangahara mwa Tire ne Sidoni hanu nali neba kinyaza kare ko zwata masaka no ku kitusaira etwe. ²² Cware enkoto ya Tire ne Sidoni neinaba e ntore kuhita yenu ha zyuba lye nkaturo. ²³ Ewe, Kapenauma, ewe hinda kuti no nonatwina mu wiru? Aa, no nobooziwa mane ku kusurumunwa hanzyi. Nali kuti ee emakazo enene ezi neza pangahara mwa Sodoma nzezo nezi naa pangahara kwako, neshunu hano nali zi shizyimene. ²⁴ Kono ndikusumwina kuti ee nokunaba butore ku naha ya Sodoma ha zyuba lye nkaturo kuhita we." ²⁵ Keyina enako Jesu akuta ee, "Ndi kurumba we, Tata, Nyambe we wiru ne fasi, kebaka lyo kuta kuti newa zwisa zi zintu ku batali nabena bashuwisisa, mi nukuzibonahaza kwabena baazya entuto, mbwe mbance badana. ²⁶ Ee, Tata, eco ceco necakutabisa habuso bwako. ²⁷ Zintu zonshe nezahewa kwangu kuzwiilira kwa Tata. Hape kwazya ozyu azyi o Mwana mbita Tata, hape kwazya ozyo azyi Tata mbita Mwana, nabena bamwi Mwana enentakazo yokutee bamuzyibe. ²⁸ Mukezye kwangu, menshe nwe mukwangite nenwe muremenwe, mbondi mihe e mpumuro. ²⁹ Mukulike coko yangu, mi mukitute kwangu, kebaka lyo kuta kuti eme ndikwesi cishemo no mozyo mutore, hape ne mioya yenu iora kuwana e mpumuro kwangu. ³⁰ Kebaka lyo kuta kuti e coko yangu njintore ne ciputu cangu cihuba."