Intembawuzyo yaSolomoni. ¹ Pa mwami mbeta zyako zisalala, Leza, busalali bwako kumwana mulombe wamwami. ² Ikaka ngakabeteke bantu bako abusalali abachete bako abululami. ³ Ikaka zilundu ngazikachite luumuno lwabantu; tulundu tukachite bululami. ⁴ Ikaka ngakabeteke bachete babantu; ngakafutule bana bababula alimwi akatyoloole mubusyapu sikupenzya. ⁵ Ikaka bakakulemeke aawo zuba nilichiliwo, awawo mwezi nuuchiliwo kumazyalane woonse. ⁶ Ngakaselukile aansi mbuli mvula kubwizu bulikukomena, mbuli lunywaanywa lutiliila nyika. ⁷ Basalali ngabakafwefweme mumazuba akwe, alimwi kukabekuvula kwaluumuno kusika mwezi kutachiwo pe. ⁸ Ngakabe abweendelezi kuzwa kulwizi kusika kulilumwi lwizi, akuzwa kuMulonga kusika kumagolelo aanyika. ⁹ Aabo bakkala muchimpayuma ngabakamuvundamine; basinkondonyina bakamyangute lusuko. ¹⁰ Bami baTasyisyi abatusuwa bakamukotamine; bami baSyebba aSebba bakape zipo. ¹¹ Nchobeni, ikaka bami boonse ngabakavundame kunembo lyakwe; masi woonse akamubelekele. ¹² Nkaambo ulagwasya uubula ooyo uulila amuntu muchete ooyo uutakwe uumbi mugwasyi. ¹³ Ufwida nsoni bachete ababula, ulavuna mawumi abaabo babula. ¹⁴ Uvuna mawumi aabo kuzwa kukusyonsegwa akubukali, abulowa bwabo buleebeka kumenso akwe. ¹⁵ Ikaka ngapone! Ingolide yaSyebba ngayipegwe nguwe. Bantu ngabakamukombele lyoonse; Leza amulongezye buzuba boonse. ¹⁶ Ngakukabe kuvula kwazilyo munyika; aatala lyazilundu zilyo zyabo ngazikabekeme. Muchelo wacho ukabe mbuli Lebbanoni; bantu ngabakafwefweme mbuli sokwe lyamuunda. ¹⁷ Ikaka zina lyakwe likabe kwalyoonse; zina lyakwe likiinkilile aanembo mbuli zuba; bantu ngabakalongezegwe muli nguwe; masi woonse akaambe kuti ulilongezegelwe. ¹⁸ Ikaka Jehova Leza, Leza waIzilayeli, akalongezegwe, ooyo alike uuchita zintu zipati. ¹⁹ Zina lyakwe lyabulemu likalongezegwe kwalyoonse, alimwi nyika yoonse ikazuzigwe abulemu bwakwe. Ameni aAmeni. ²⁰ Nkombyo zyaDevidi mwana mulombe waJese zyamana.