Yamupati wabasikwiimba. Malembe aabana balombe baKkola. ¹ Mbuli nsya mbiilombozya tulonga twamanzi, aboobo ndikumvwida nyota, Leza. ² Ndimvwida nyota Leza, Leza uupona, ndiilili nendiyolibonia kunembo lyaLeza? ³ Misozi yangu yakaba chakulya changu sikati amansiku; eelyo basinkondoma nibaamba lyoonse kulindime, ''Ulikuli Leza wako?'' ⁴ Eezi zintu ndilaziyeeya aawo netila muuya wangu: mbuli mbundayinka amakkamu mukkamu akubazulwida kung'andad yaLeza ajwi lyakubotelwa antembawuzyo, inkamu ilikupobola pobwe. ⁵ Nkaambonzi nokoteme, muuya wangu? Nkaambonzi nobijilidwe mukati kangu? Langilila muliLeza, nkaambo alubo ndilamutembawula ooyo uli lufutuko lwangu alimwi kali Leza wangu. ⁶ Leza wangu, muuya wangu ulikoteme mukati kangu, aboobo ndakuyeeya kuzwa kunyika yaJodani, kuzwa kumpela zyotatwe zyaChilundu Hemoni, akuckalundu kaMiza. ⁷ Kunika kwiita kunika kumisindo yamajenga aako awa maanzi; mayuwe aako amakkwinsili aako andilimba. ⁸ Pesi Jehova uyoolayilila chizuminano chakwe mukusyomeka isikati; mansiku lwiimbo lwakwe lunooli andime, inkombyo kuliLeza wabuumi bwangu. ⁹ Kuli Leza, mwaala wangu, ndiyowamba kuti, ''Nkaambonzi niwandiluba? Nkaambonzi neyinka bulila akaambo kakupenzegwa abasinkondoma?'' ¹⁰ Mbuli apanga mumafuwa angu, basinkondoma balandituka aawo lyoonse kabswini kulindime, ''Ulikuli Leza wako?'' ¹¹ Nkaambonzi nokoteme, muuya wangu? Nkaambonzi nobijilidwe mukati kangu? Langilila muliLeza, nkaambo alubo ndilamutembawula ooyo uli lufutuko lwangu alimwi kali Leza wangu.