Nchamwiimbi mupati; kutulizyamiimbo twabukole. Intembawuzyo ya Deviti. ¹ Ndivwiile aawo nindayita, Leza wabusalali bwangu; ndipe busena aawo nindagomekezegwa. Uube nsoni andime alimwi uswilizye nkombyo yangu. ² Nywebo nobantu, kuyosika lili kamusanduula bulemu bwangu kubuchita mawuse? Kuyooba lili kamuyanda eecho chitakwe muulo akuyanduula manwa? Selaha ³ Pesi muzibe kuti Jehova walibikila basyomeka kumbali. Jehova uyoomvwa aawo ndaakumwita. ⁴ Teketa mukuyoowa, pesi utabisyi! Yeeya chakukomba mumoyo wako aabulo bwako chumuunizi. Selaha ⁵ Pedekezya zipayilo zyabusalali alimwi ubike kusyoma kwako kuli Jehova. ⁶ Biingi bati, ''Ngwani utakatutondeezye kufumbwa chintu chibotu?'' Jehova, nyampula mumuni wabusyu bwako aali ndiswe. ⁷ Wapa moyo wangu kubotelwa kwiingi kwinda bamwi aawo zilyo zyabo awayini mpya nizyavulisya. ⁸ Chili muluumuno kuti ndiyolala aansi akoona, kuchitila nduwe olikke, Jehova, ndichite ndifutuke alimwi nkekwabilikene.