Kumwendelezi wanyimbo. Lwiimbo lwa Devidi. ¹ Mwami ukondelelwa munguzu zyako, Jehova! ² Wamupa chiyanda moyo wakwe alimwi takwe niwamwima chiyanda milomo yakwe. Selah ³ Nkambo takwe umwetela zilongezyo zilelekedwe kapati, kumutwe umuzwatike musini wangolide mbotu kapati. ⁴ Wakakumbila buumi; eelyo wakamupa bulamfu bwamazuba aakwe atamani alimwi kwalyoonse. ⁵ Bulemu bwakwe mbupati nkambo kalufutuko lwako; ulamupa bulemu alimwi abwebesi. ⁶ Nkambo ulamupa kuti kalongezegwe kwalyonse; ulamupa kuti kabotelwa akambo kalukondo lujanwa kunembo lyako. ⁷ Nkambo mwami usyoma Jehova; mukwinda muchizuminano chalusyomo lwa Mupati kampatila takoyogusigwa pe. ⁸ Janza lyako liyobajata basinkondonyokwe boonse; janza lyako lyakululyo liyojata abo bakusulide. ⁹ Muchiindi chakunyema kwako, uyobatenta mbuli bbibi lyamulilo. Jehova uyobamena mubukali bwakwe, alimwi mulilo uyobatenta chakumaninina. ¹⁰ Uyonyonyoona loonse lunyungu luli munyika alimwi abana babo kuzwa aakati kabana babantu. ¹¹ Nkambo bakakanzide kuchita chibi kuli nduwe; bakanza kuchita zintu zitazwidilili! ¹² Nkambo iwebo uyobapa kuti bakabwede musule; uyobatondeka kaanta kunembo lyabo. ¹³ Konyampulwa, Jehova, munguzu zyako; tuyoyimba alimwi tuyotembawula nguzu zyako.