Kumwendelezi wanyimbo. Lwimbo lwa Devidi. ¹ Majulu wambilizya bulemu bwa Leza, alimwi mulenga lenga uzibisya mulimo wamaanza akwe! ² Buzuba abuzuba zilambuula; busiku abusiku zitondezya luzibo. ³ Taakwe nikuba mulumbe naa majwi awambuulwa; jwi lyazyo talimvwigwi pe. ⁴ Pesi majwi anzizyo amvwigwa munyika yoonse, alimwi mulumbe wanzizyo ulamwayika kusikila kumamanino aanyika. Wasimpa tente lyazuba akati kazyo. ⁵ Izuba lilimbuli sibwiinga uzwa mung'anda mwaalede alimwi mbuli mwalumi singuzu ubalika elyo nachijana ntamo yakwe. ⁶ Izuba lilabbuda kuzwa kumagolelo amwi alimwi kalyenda mumulenga lenga kuyosika kumagolelo aamwi; takwe nikuba chisitika kupya kwalyo. ⁷ Mulawu wa Jehova uliluleme, ulabukulusya nguzu, bukamboni bwa Jehova bulasyomeka, bulabasungwazya batakubwene. ⁸ Malayilile a Jehova aliluleme, apa kuti moyo usungwate; mulawo wa Jehova ulasalala, upa kuti menso ajulike. ⁹ Kuyoowa Jehova kulasalala, kunoliwo lyonse mane kukabe kutamani; imbeta zya Jehova nzyamasimpe alimwi kubikka amwi zyoonse zililuleme! ¹⁰ Zilayandikana kapati wkinda ngolide, alubo kwinda ngolide mbotu; zilanona akwinda buchi alimwi sanzya buchi buzwa muchinkuli. ¹¹ Iyii, mubelesi wako wakasigwa anzizyo; mukuzisyoma muli mpindu mpati loko. ¹² Ngwani unga ulakonzya kubona kulubizya kwakwe mwini? Kondilekelela zibi nzindichita chakutaziba. ¹³ Komulesya mubelesi wako kuzibi zyakulisumpula; utayilekeli kuti indendelezye. Aboobo ndiyolulama, alimwi ndiyolulama kumilandu myiingi. ¹⁴ Nzendaamba amulomo wangu alimwi amiyeezyo yamoyo wangu azikatambulike kunembo lyako Jehova, bbwelyangu alimwi omuvuni wangu.