Njamwendelezi wanyimbo. Intembawuzyo ya Devidi, mubelesi wa Jehova, eelyo wakiimbila Jehova majwi alwimbo oolu buzuba Jehova nakamuvuna kuzwa kujanza lyaba sinkondonyina boonse alimwi kuzwa kujanza lya Sawulu. Wakiimba: ¹ Ndilakuyanda webo, Jehova, nguzu zyangu. ² Jehova ndibbwe lyangu, mampangala aangu, alimwi oyo undivuna; ngu Leza wangu, ibbwe lyangu; ngochiyubilo changu. Nintobo yangu, ndwija lwalufutuko lwangu, mayubilo aangu aakwabililidwe. ³ Ndiyoyita Jehova oyo uyelede kutembawulwa, alimwi ndiyofutulwa kuli basinkondoma. ⁴ Intambo zyalufu zyaka ndizyunguluka, alimwi maanzi ayenda abuyo akandiyoosya. ⁵ Ibuulyu bwantambo zyachikkalilo chabafwa zyakandi zyunguluka; tukole twalufu twakali ndijisi. ⁶ Mumapenzi aangu ndakayita Jehova; ndakakumbila lugwasyo kuli Leza wangu. Wakamvwa ijwi lyangu kuzwa muntempele; kwiita kwangu kwakiinka kunembo lyakwe; alimwi kwakamvwikka kumatwi aakwe. ⁷ Mpawo nyika yakatanguna kuteketa alimwi akuzungaana; intalisyo zyamalundu azilazyo zyakazuungaana alimwi zyakateketa nkambo Leza wakali wanyema. ⁸ Busi bwakawunta kuzwa mumpemo zyakwe, alimwi awulawo mulilo wachakumaninina wakazwa mumulomo wakwe. Makkala ayaka akayokoloka. ⁹ Wakajula majulu alimwi wakaseluka, alimwi kunsi amawulu aakwe kwakali mudima. ¹⁰ Wakatanta Kkelubbi alimwi wakawuluka; wakatanta ajulu amababa achitenge chamuuya. ¹¹ Mpawo wakapanga mudima aatente lyakali anguwe, mvula mpati ilamayoba mumulengalenga. ¹² Chivulamabwe alimwi amakkala amulilo akawa kuzwa mukalabi kunembo lyakwe. ¹³ Jehova wakazumya majulu! Ijwi lya Mupati kampatila lyakaambula. ¹⁴ Wakawaala ng'umba zyakwe alimwi wakaba nyongania andabi nyingi zyakaba mwaya. ¹⁵ Mpawo manzi atulonga akalibonia; intalisyo zyanyika zyakaba aatuba akambo kakukalalilwa anduwe, Jehova, kwinda mumuuya wakazwa mumpemo zyako. ¹⁶ Wakasaluka kuzwa kujulu; wakandijata! Wakandinununa mumanzi malamfu. ¹⁷ Wakandivuna kuzwa kuli basinkondoma singuzu kuzwa kuli baabo bakandisulide, nkambo bakali kundiinda nguzu. ¹⁸ Bakandilwana buzuba nindakali mumapenzi pesi Jehova nguwakali mugwasyi wangu! ¹⁹ Wakandangununa akundeeta mubusena bukwabilidwe. Wakandivuna nkambo wakandi kkomanina. ²⁰ Jehova wakandilumbula nkambo kabululami bwangu; wakandibwedezya nkambo maanza aangu akali kusalala. ²¹ Nkambo ndakabamba nzila zya Jehova alimwi tendayezya kufutatila Leza wangu. ²² Nkambo imbeta zyakwe zyoonse zili kunembo lyangu; nkambo kamilawu yakwe takwepe nindakifutatila. ²³ Alubo ndilezya kululama kunembo lyakwe, alimwi ndakalihwisya lwangu kuzwa kuchibi. ²⁴ Aboobo Jehova wakandipa nkambo kabululami bwangu; wakandipa kwelana nkambo maanza akali kusalala kunembo lyamenso aakwe. ²⁵ Kuliyoyo usyomeka, iwebo lwako utondezya kuba alusyomo; kumuntu utakwe kampenda, ilwako utondezya kutaba akampenda. ²⁶ Kumuntu usalala, ilwako utondezya kusalala, pesi kuli ooyo upilingene, iwebo lwako utondezya kuchenjele. ²⁷ Nkambo iwebo ulavuna bantu bapengede, pesi ulafwiinsya aabo balisumpula, bali amenso alajulu! ²⁸ Nkambo ulapa mumuni kulampi lyangu; Jehova Leza wangu ulamunika mudima wangu. ²⁹ Nkambo mukwinda mukugwasigwa anduwe ndilakonzya kutandania; mukwinda muli Leza wangu ndilakonzya kutanta bulambo. ³⁰ Mbuli Leza - nzila yakwe ililuleme! Ijwi lya Jehova lilasalala! Nintobo kuli boonse aabo bayuba muli nguwe. ³¹ Nkambo nsakuli uumbi Leza kunze kwa Jehova. Ngwani ibbwe uteensi Lerza wesu? ³² Ngu Leza ubikka manguzu mulindime mbuli bbanti, ngubikka bantu batakwe kampenda munzila yakwe. ³³ Uupa kuti mawulu angu abembuli ansya alimwi undipa kwimikila kumasena alaajulu! ³⁴ Ulayiisya manza kukulwana alimwi amaanza angu alakonzya koongomeka kaanta kamukuba. ³⁵ Wakandipa ntobo yalufutuko. Janza lyako lyakululyo lyakandigwasya, alimwi kuli chesya kwako kulandisumpula. ³⁶ Wakasanzabula busena bupati mwiinda mawulu aangu aboobo kuchitila kuti takatezemuki pe. ³⁷ Ndakaba tandania basinkondoma akubeenzya; tendakaboola musule pe kusikila banyonyoonwa. ³⁸ Ndakapwachuula zyakuti tebakakonzya pe kubuka; bakawida munsi lyangu. ³⁹ Nkambo wakabikka nguzu muli ndime mbuli bbanti lyankondo; wakapa basinkondoma bangu baganyukide munsi amawulu aangu. ⁴⁰ Wakandipa sule lyansingo zyaba sinkondoma; ndakabanyonyoona aabo bakandisulide. ⁴¹ Bakakwiita kuti bagwasigwe, pesi taakwe wakaba gwasya pe; bakiita kuli Jehova, pesi takabavwiila pe. ⁴² Ndakabawuma mane babambuli lusuko lwamuluwo; ndakabasowa mbuli matope mumadolopo. ⁴³ Wakandivuna kuzwa kumatanga abantu, wakandichita mupati wachisi; bantu mbintazi bakandibelekela. ⁴⁴ Eelyo nibandimvwa, balandiswilila; mazwakule bakangilwa kundifugamina. ⁴⁵ Mazwakule bakasika kabakankama kuzwa mumampangala aabo. ⁴⁶ Jehova muumi; ngalitembawulwe ibbwe lyangu. Asumpulwe Leza walusumpuko lwangu. ⁴⁷ Ngu Leza mwini wanchonzyo oyo ngubabwedezya chibi basinkondoma, nguwombya zisi munsi lyangu. ⁴⁸ Ndaangununwa kuli basinkondoma! Wandisumpula aatala abaabo bandilwana! Wakandinununa kuzwa kumuntu sinkondo. ⁴⁹ Aboobo ndiyolumba kuli nduwe, Jehova, aakati kazisi; ndiyoyimba kanditembawula izina lyako! ⁵⁰ Leza nguupa milimu mipati yalufutuko kumwami wakwe, alimwi ulatondezya luyando lutamani kumunanike wakwe, kuli Davida alimwi akulunyungu lwakwe mane kukabe kutamani.