¹ Lwiimbo lwakutansya. Jehova, akaambo kaDeviti koyeya mafwabi aakwe woonse. ² Koyeya mbajakonkezya kuliJehova, mbuli mbutwakasomezya kuli Singuzu Umwi waJakkobbu. ³ Wakati, ''Nsikoyonjila mung'anda yangu na kulala abulo bwangu, ⁴ Nsikoyoopa ng'onzi kumenso angu na kulyookezya kuzikowe zyangu ⁵ kusikila ndajanina Jehova busena, chipayililo chaSinguzu Umwi waJakkobbu.'' ⁶ Bona, twakazimvwa muEfulata; twakazijana munkuba zyaJaa. ⁷ Tuyoyinka muchikombelo chaJehova; tuyolumbayizya kumawulu akwe. ⁸ Buka, Jehova, kunika yako yakulwanina, iwe abbokesi lyanguzu zyako! ⁹ Bapayizi bako ngabasamikwe anguzu zyabululami; nkabela basyomekede bako boompololo chalukondo. ¹⁰ Kuchitila mulanda wako Deviti, utafutalili mwami wako unanikidwe. ¹¹ Jehova wakakonka chikonke kuli Deviti, chikonke chini nchatakatyole pe: ''Ndiyobika umwi walunyungu lwako achuuno chako. ¹² Na bana bako balombe babamba chizuminano changu amilawu njesikabayisye, bana babo alubo bayookkala aachuuno chako chabwami kwalyoonse.'' ¹³ Nchobeni Jehova wasala Zayoni, wamuyandisya kuchuuno chakwe. ¹⁴ ''Eechinchilyookezezyo changu lyoonse. Ndiyopona aano nkaambo ndamuyandisya. ¹⁵ Ndiyomulongezya kapati azijatika. Ndiyokutya bachete bakwe achinkwa. ¹⁶ Ndiyozwatika bapayiza bakwe alufutuko, basyomekede bakwe bayowompololisya chakukondwa. ¹⁷ Ooko ndiyochita kuti lwija lukasyuukile Deviti akubika lampi lyamunanike. ¹⁸ Ndiyovumba basinkondonyina bakwe abweeme, pesi alinguwe musini wakwe uyobekema.''