¹ Mimaromatung amipahalakuya napakerana hi Moiri tahaga tourara,kadaitawaida abiwimikangu.Jakka atonoukamika damikollimang kaheawami waling ta Amami ta Surga. ² Jiakadiyaka, amipatamakanguka riti ta umana hi Moiri abi wolumang taduk,mearangu da tou munafik kaittawaigam awidda dahalaku tauma pingi pahabayang, jakka ta wiwi larangi.Kutikkigiminya nam padening, hei datou matoungu langa kollingu daka taguda napa hadianaja hi Moiri. ³ Mang anawoakanguka nalima lawanamu abinapeamanya nalima laleimu, ⁴ hidda eingu maittagunya nahawoamu mang kajiakaya na Amamu nam einya tamakabuningu nam ittaguja dahawoamu mang hinna woagu tagumu.'' ⁵ Mang ami habayakanguk, abimearakang ta tou dam hangaja adahabayang ta uma pingi pahabayang jakka adadedi ta wiwi larangi kanapiki ittama tou awida.Ku panewimemanya nam padening lahi nyiami,langa einyaka na taguda hei dudda. ⁶ Toukan nyiami habayang awimikaka, mitama ta korungumi, toadiha da bina korung, mang him habayang lahi Ama nam einya tapadoung makabuningu, nam itta bolluh dam patodang jiaya nam woagimi kanyuru tagumi. ⁷ Mang ami habayakanguk,abi tikki bolludiya dam padening,nam hamearang nahawoluna na tou dadi mapeanya na Maraba Allah, anadangu napatikida jiaya hinna rangudaja dahabayanguda awida. ⁸ Jiakadiyaka, abi kerihoumaja dudda, na Amami lang peanajaka dahawuku adadi mikarei-Ya. ⁹ Amihabayakanguka wimmi noungu, 'Ama nam eingu ta Surga, Mapabiahagunya na ngara-Mu. Kaamikanya na jarra-Mu,kanajajika nahawuku-Mu tapinu tana katouna ta Surga. ¹¹ Woakagama nyiama, taladu yayi,paangu rekatuddana. ¹² Jakka, abinamukagamaja da halama nyiama, toujellana nyiama abimanamuha da halada datou dam wolu mahala lahi nyiama. ¹³ Jakka,abi irihkakima tam hadanga, palikaloagakima nyiama waling dam kallung. Alanga Oumemadingu na pingi jarra, jakka nam kullih, jakka nam deedi lapakung barobaru dam eingu dikkina. Amin ¹⁴ Atouna nyiami adami namudiha dahala tou hawanguku, tou jellana na Amami ta Surga dan namumagimija da halami. ¹⁵ Jakka aminamu juakahaka dahala oalimi nyiami, tanou jellana na Amami danadengamaja dahalami nyiami. ¹⁶ Jakka amipuahakaka, abikerimah datou hangaja adaheaka dangorada kaittawaigama amapuaha awida. Kutikkigiminya yanam padenig datou hei lang kolling daka taguda. ¹⁷ Atoukana nyiami,amipuahakaka, mikalapaha daloagimi jakka bahajellaha dangoarami ¹⁸ abi naittami tou amipuaha,kajiakaya na Amami nam einya tapadoung nam kabuning namaittami.Mang na Amami namaitagimija dahawolumi jiaya nam pageagiminya. V 19 ''Abutidi boaning wikkikamu omahrara tapinu tana, mawuuk jakka mapateiraranguha tapinu tana, jakka padou jellananya nam keadu anaweharuha dapadouda mang hinna keaduja. ²⁰ Jiakadiyaka muhadiang wikkimu omah rara ta Surga, da wuuk jakka napateirarangu danalimah manga nam keadu danapiakumaja anaweharuha mang hinna keaduja. ²¹ Mang abayakaja da omah rara pingi habijalmuja mutauha taatimu.'' ²² Dawuamata jiahaka da hulu dapaittawaingu. Jiayaka, adakallukanguka dawuamatami, ngaradukana naihimi nawaha bollung. ²³ Jiadinguka, jakka adadakallu kanguka dawuamatami, ngaradukana naihimi nakapetta bollung. Jiakadiyaka, jakka anakaptakanguka na hulumi, darekkanoumayaha nakapetangumi. ²⁴ Daeimangu tou mahamoiri touma dua, atonoukana peala buhha mehananyaka nam hatouna,mang hinna pajappuya nam hatouna. Nyiami dammi piakumangu amipaata lahi Maraba Allah, jakka ami pabuatuya nadedina napinu tana. V 25 ''Jiakadiyaka Nyouwa hiwigugimi, abbi mimomumangu, agananya napaami jakka napainumi. Tanoujellana na ngawu kalittumi agananya nahapakennami.Penya dajiamemadiya naha hangahu hangahu morikkuda nam moulu waling tapaangu, mang na kalittu ihida waling tangawu? ²⁶ Taiya kammi patetija dam wurug dam peangu parawing, jiadinguka na Amami ta Surga nawoaja pa'angu.Penya nyiami dareihi padeadu managimi? ²⁸ Jakka napapakennakimika,ga himi momu? Patetijah da bunga tamareda,ga hidda tubuli,dadarawimangu, dadapaullamang wuakaba, ²⁹ Jiakadiyak hiwiggugimi kagikki dehha noujellana hi Salomo napekenang ngawuna daeimang hapangu tekka mahameara denganya waling nadehada dabunga dan tubu tamareda. ³⁰ Jiayaka, jappa darutu duda dam morik ya laddu mang anawehang dapale'a ta api, napamanadaja na Maraba Allah, penyanyiami dareihi parurumanagimi, nani nyiami dam manni-Nya? ³¹ Jiayaka atanouna, 'Gannakanyaka napa'ama?, jakka 'Gannakanyaka napainuma?',jakka 'Gannakanyaka napapakenama abbi wimmikangu?' ³² Jiakadiyaka, ngara dukana natou tapinu tana jiabolluyaka napamanyerana jiadinguka na Amami ta Surga napea rehidanyaka ajiaha dahamorikwaimi, ³³ Jakka atanoukana, manyerra moulunya na jarra jakka nakallungu-Na, hinna tabagimija ngara dukkada dapakareimi. ³⁴ Jiaya,abbi momumangu natu'ana naladdu baruwehang, naladdu baruwehang eimemanguka taguna.Paturakanya taguna nam hangina naladdu.''