¹ Manga nouwu, panewi denganajaka hi Yehu damuritu-Na, ² ''Dudda da ahli Taurat jakka datou parihi ngodudanya tapinu galana hi Musa. ³ Jiayaka, ngara dukana napapanewida adda leakumi jiayaka wimmi kadija nounammu abbi kerikaya naha woluda. ⁴ Dudda dam ealuya nam hala hidda pabuatuya mang hidda habokunya tatou hawanguk.Hitahouda abbi makerra wainya limma wikkima widda. ⁵ Hiwolu tahoudanya kanna pikki ittama touw widda. Dapamalainya naha bayanguda mang hidda hidda pabakuluha dakoapi malaida. ⁷ tau oataja hiida tapa doungu pingi papakehang madangu, manga hikamaikaja Rabi hiwinnaja natou dangu. ⁸ Atonouana, toukanaka nyiami, Rabi dawidda magimi alanga hatou memmapana na Gurumi, mang nyiami ngara dukami mapa anguwuangu bollumi. ⁹ Abbi eimangu hatou tekka ama nahawimmingu tapinnu tana yayi, hatoupana na Amami, Dunna nam einya nou deaha ta surga. ¹⁰ Abbi eijellamanghu mapareaha mawinnagimi, hatoupana nam pareahami Dunna nou deaha nam eingu ta surga. ¹¹ Jiadinguka, agearaya napapa,akami nyiami jiadiyaka nam marommat gimmi. ¹² Gearaya nam deddikung wikkina jiaya napahawawa mang gearaya nam hawawa wikkina jiaya napadeddikungu. ¹³ Dammi marimang nyiami, ahli Taurat jakka tou parihi, tou munapik! Nyiamika nanni nam toadiya nabinna weima ringu ta surga abbi natama na oalima awimmi, toujellana nyiami dammi tama memmanya mangaka miheiru jellanya naoalimi kakku tama nam winna. ¹⁴ Dammi marimang nyiami, ahli Taurat jakka tou parihi, tou munapik! Ammi hehiha daummada dam ngoma balu mang himmi pura-pura ammi lippi habayang adoku madei oatami. Atonoukana, nyiami jiamika nam kollingu hukkung mabuat oata. ¹⁵ Dammi marimang nyiami, ahli Taurat jakka tou parihi,tou munapik! Mipaduapalaja da tahiku jakka na tana mara kanna pikki tama natou ta agamama awimmi. Manga ammi kollidinyaka himmi pajajinya tou maja,u mareihi ja,u waling lahi nyiami. ¹⁶ Dammi marimang nyiami, nam paongaha dam kaboala, hiwimmija,'gearaya nam paruwainya na umma maraba Alla, danna huddamang. Jakka agearakaya nam paruwainya na omma rara nam einya ta umma maraba Alla, jiaya hinna huddang. ¹⁷ Beinya nam reihi pabuat, ommah rara atau umma marabba Alla nam pabiahaya ommah? ¹⁸ Manga, gearaya nam paruwainya na altar, naparunguna daeimang biahana. Jiadinguka, gearaya nam paruwaingu da persembahan tapinu altar, jiaya hinna biaha napa runguna.' ¹⁹ Heh nanni nyiami tou jiri! Beinya nam reihi pabuat, da persembahan atau na altar nam pabuatu da persembahan weiga? ²⁰ Jiakadiyaka, gearaya nam paruwainya na altar, paruwainya na altar jakka ngara dukada dam eija tapinuna. ²¹ Mang, gearaya nam paruwainya na umma maraba Alla, paruwainya na umma marabba Alla jakka dam eija taroanguna. ²² Mang, gearaya nam paruwainya na surga, paruwainya na galana nam maraba Alla, jakka nam paruwainya Dunna nam ngodu tapinnu gala. ²³ Dammi marimang nyiami, he ahli Taurat jakka tou parihi, tou munapik? Nyiami miwoangu manuatungimi mawaling tama minyak, tama wou hirrit jakka tama liggih, jiadinguka dam ihilimanya napa buatu dengana na Hukum Taurat, nam lurruh, napanamung, jakka manning.Bakalang jiayah naha pahalakumi dahillu heakamayaha. ²⁴ Nanni nyiami mapareaha kaboala mata,ammi outaha daka ngo,a jakka ammi wallu habolung hapi! ²⁵ Dammi maimang nyiami, nanni ahli Taurat jakka tou parihi, tou munapik! Nanni nyiami tiddi warahdanya taha bali hiddu da kaa jakka da ta,ungimi, jiakayaka na taroangumi dokku porrat oataya mang buhha oatang pahehi oalimi. ²⁶ Nanni nyiami, tou parihi nam kaboala wua matana! Baha pawarah lettuha daroangu kaa jakka da ta,ung, jiaya peala hidda warah jella ta habali hiddu. ²⁷ Dammi marimang nyiami, ahli Taurat jakka tou parihi, tou munapik! Nanni nyiami , mearana na ko,ang napa taungu cet kaka, taha bali hiddu mang aittakayaka hinna dehha oata, jiadinguka na roanguna nabinnu ri mamati jakka mamanyarik. ²⁸ Tonou jellami nyiami, awaingu haittakamika magga matiddi oatami tahaga tourara. Jiadinguka na taroangumi darekka jurrakmaya ammi wolluya dam jinyak. ²⁹ Dammi marimang nyiami, ahli Taurat jakka tou parihi, tou munapik! Jiamika nyiami nanni, nam woluja watu rati da nabi mang himi padoawidaja watu hoadida datou dam eingu halada. ³⁰ jakka hi wimmi, Amma morrik memmapang yannag aeijah da ama peanguma, datoumamah nou amma hagaungu maihhuwaingu weirada da nabi. ³¹ Jakka atonoukanaka, nyiami mihakhing wikkimi anna anagimi tou maha mati nabi. ³² Jiayaka, pahupuyaya napa langa rawida dabokumi. ³³ Nyiami, maddu ommang, ana maleagu latta, gikki neikamika ammi luput waling ta neraka! ³⁴ Jiayaka, pateting, Nouwa Kupaleawaha da nabi, datou maringu ati, jakka da ahli Taurat lahi nyiami. Dam toumapirrah him peala mihamatiha mang himi harikkaha, hawangu mipaluha ta umma habayangumi, mang mipagarija ta hangi padoungo hangi padoungu, ³⁵ kapikki boangu bolluda da raada datou tiddi tapinu tana mang kan pikki kerimi waling na raana hi Habel, natou nam tiddi weiga, lappak ta raana hi Zakaria, na anana hi Berekhya, napa hamatimi ta uma maraba Alla tapadua altar. ³⁶ Jiaya hiwiggumemagimi, enga jaji bolunaha nei lappak adda kangetinya da anamurimi baru. ³⁷ ''O Yerusalem, Yerusalem, nam hamatiha da nabi jakka nam kabeanaha watu dapapa leawadanya. Kuwukku hingung Nyouwa papakeha boluja da anami nyiami, mearana nabei manu anna ubbuluha da anana ta roangu kapana, jiadinguka nyiami dammi buahhamang. ³⁹ Jiakadiyaka, Nyouwa hi Kutikki memma gimminya nyiami waling ya, nyiami dammi hillu ittamawaha Nyouwa lappak peala awimmi, Nakanyuruka Dunna nam amminya ta dalu ngarana hi Moiri,'''