1
Namengaka palollukuya nei weiga hi Yehu, halakuna-Nyaka waling ta Galilea hinna toma ta Yudea, tahabali Yordan.
Jakka darekka dangumaya natou nam keri-Ya, mang natomaka noulau jiayaka hinna pategahuha dam kadauku.
3
Hawanguk datou parihi ameljaka adda tomanya hi Yehu kamma kama wainya awidda, hidda tuturu-Ya'' Penya dagikkidina jiata moani apaheawa dengaja da araweida addana patu'akaka?''
4
Jiayaka hiwinnaja hi Yehu,''Dammi bahhamayah touna Dunna nam woluha waling nakawungana, anna woluha damoani jakka dammawinni,
5
jakka nawinina nam winna, Jiakadiyaka alanga tonoumemanaka, moani najijakkuja da ama jakka da innana, hinna kahangi denganya na araweina, dahillu tou maduamahah jiadinguka hanginaka naihida?
6
Jiayak hei dudda dahillu tou maduamahah, hanginaka naihida. Atonoukanaka, agannanya napa langa kahangina hi Allah, danna bihamang appa heawanya jiata tourara.''
7
Mang widda-Nyaka hi Yehu, ''Atonoukadinna , mang gawali hi Musa hinna woawaling pareaha awolu hurat paheawa dengangu arawei?''
8
Winnaja hi Yehu,''Mula bei atiminya, jiakadiyaka hi Musa hinna pahellagimmi ammi paheawa dengaja da araweimi. Jakka jiapananya waling naka wungana datanou memamang.
9
Jakka Kakku tikki memmagiminya agearakaya nam pahewa denganya na araweina, adda laungu moani hawanguk kadinanya, manga kanna deki mawinni hawanguku, reihi halayak.''
10
Widdanyaka damuritu-Na,''Atonoukanaka, dam pa la araweingu dam langa paheawada mattanguya pahillu wolu la jakka arawei.''
11
Atonouana, winna jakka hi Yehu hei dudda damurituna,''Danna tarima bollumaya napawigungu ya natou, jiapaya natou napa langa woangu kanyuru.
12
Hiwidda noungu, einya natou dam buhang papala araweingu, alanga tanou memena waling anna jaji takabu innana, einya natou dam buhang papa la araweingu anna woluya oalina, eijelanya natou dam buhang papa la araweingu mula anna keriya nalarana na kerajaan Surga. Gearadiya nam biha patrimaya natarimakaya dunna.''
13
Manga nouwu, eija dalakeada merrah dappa maraingu lahi Yehu, hinna habayaja anna jamiha. Mangalika damuritu-Na banildajaka datou.
14
Jiaya hi winna hi Yehu, ''Pahellakadija dalakeada merrah. Abbi heirudija a'amija tahagagu, datou matoungu hei jiahaka damma milikunya na kerajaan Surga.''
15
Namengaka hi Yehu pajamiha dalakeada merrah weiga, halakunanyaka Dunna waling nouw.
16
Ammilnyaka nam hatouna anna patuttur lahi Yehu,''Guru winna-Nya, giki kallung nounaka napa wolugu kakku pikki kolling morrik malodung?''
17
Jiayaka hi winnanya hi Yehu natou nei,''Gawali himmu tutturuli-Wa Nyouwa agannanya nam kallung naha wolum? Hangikadina nam kallung. Jakka ammu buhha hingudingu pamorrik malodung, mutaat bolluha dappa reaha weiga.''
18
Nahillu tuttur jella payaha hi Yehu nei natou weiga,''ga pareahayaka?'' winna-Nya. 'Napagaping hi Yehu winnanya, abbu hamatimang oali toumu, abbu keadumang, abbu hakhi pakitumang, mupabuatuha da amamu jakka da innamu, mang munamuya naoali touraramu mearangu amunamuya naihi wikimu.''
20
Pagaping nanyaka nei weiga na buamoani winna-Nyak, Ngaradukada dahawi-Mung kutaat bolluhaka, mang ganna jellapanyaha nam kurang?
21
Winnanyaka hi Yehu, kakku sempurna hingu awimmu dingu, halakuwuya kammu dagabolluja aganaja dam eingum. Manga kapikki barimuja tatou milla, jiaya himmu kollinya naihina na Surga, maiyaya keriwaya Nyouwa.''
22
Jiadinguka, nei nabua moani dedi weiga anna rangu tanounanyaka, halakunanyaka adda rekkayaka namerrahuna na atina anna namuha daha poatina
23
Mang winnajaka hi Yehu damuritu-Na, ''Nyouwa tikki-Gunya nam padening lahi nyiami, naharuwi oata natou dedi nam poati anna tama ta Surga.
24
Kakku tikkidigiminya hadekka, reihi piakuya nam heina na unta anna tamanya na nam bowa tapadeitu walingu natou dedi anna tamanya na kerajaan Allah.''
25
Darangu tahoudanyaka damuritu-Na, kabarra dengadanyaka dudda, mang hiwidda,''Atonoukanaka, gearakayaka nam biha apahalamatuya?'' widdak.
26
Patetinajaka hi Yehu manga hinna panewi ''Tapangadang tourara, nei weiga danna jajimang, jiapaya napangadang nam wainya hi Allah nam pajajiya.
27
Mang nouw amminyaka hi Petrus winna-Nyaka, ''Ittadimma, nyiama matta bollumanyak naha woluma, keri noudaguka Ouwu. Atonoukanaka gannanya nappa kollima nyiama?
28
Jiayaka hiwinnaja hi Yehu,''Nyouwa panewigunya nam padening lahi nyiami, atoukanaka nyiami ammi keriwa Nyouwa ta morriku mabuangu,pea atomakayaka na Anana hi Moiri anna ngodunya napadoungu-Na nam dedi, nyiami eijellagimi ammi ngodu tapinu gala dam habulu dubba dannida mang him hakkija dam habulu dubbada dakabihu Israel.
29
Mang gearakaya natou nam jijjakunya naroangu ummana,da anguwuana, da annawinina, na amana, na innana, jakka da anana, tou jellada dam jijjakuja daka hibuda mulana adda keriya na Ngara-Gu enga kolinguda hangahu wuddang kanyuru tamorriku malodung.
30
Jiadinguka nim peala nadangu natou nam moulu muripananya, nam muri jiawaliya nam moulu.''