¹ Aku oli buhhagimi, nou a tou naka duma danyaka na li jaji nou, maidahayi kata pamurrahunya na ati da walingu ta dukkana na maribhak ihida jiaka ati da, tou na kata pinnunya na pahigilungu da tadalu ata habuatunya hi Allah. ² Pahella kigama padoungu ta atimi! Dama walu makingu nama jala langka ta ma hatou tekka, da mali hatou hingu mangu napa manau' ma lapakka da mali hatou hingu mangu ama manyerranya napa kanyuru poti waima. ³ A wiggu ka gimika kaku jajja mi da wiggu mangu, kadang weiga wiggu memmagimika, mi kollinguka padungu mi ta ati ma, hita jaji oli morrik - oli mati. ⁴ Da eimakingu napakani gugimi, ku pawahang de'a - de'a gimika, jiadinguka ku bakkul ati denga mi. Ta dalu ama liya nama haritu einya ma paddanya na pakali pahoddarung jia na egi ati gakku koku dama eingu dirrana . ⁵ Nou ama dukika ta Makedonia, da eihingu mangu nama hawangarta ihima. Biaka - biaya ma liya nama hadukka na pareggama jiapaya na pakangilang patayak ta atima einya na mangeat. ⁶ Jiadinguka hi Allah na kali hoddaruha na tou nama karaddak atina, nama pahawawa wikina na kali hoddar naka a einyaka hi Titus. ⁷ da tiddi jiapahaka a einyaka hi Titus, jiadinguka witi nguna na pakali pahoddarungu napa padda na ta paduami. Kadang alanga peka memma gimika na lara kalaura ma kangirrikumi jiaka nama hawali ati ami oli gama. Hinna ki-ki tabana na egi na na atigu. ⁸ Nou atouna langka ku pahiddujella dingu na atimu tou na na huratugu daku merrah ati dengagama, kadang ku itta na hurrat nou pahiddu ati denganguya langka dana madei dingu. ⁹ Jiadinguka nuttu na egi na atigu, da witi hadukka na na atimi, jiadinguka kadang ami liya nama hadukka toma ami haria - jarra. Kadang ana hadukka ati mi pawukku memma manya hi Allah, toma da eitekka mangu mali hakudduk ana pamanau mi witima nyiama. ¹⁰ Kadang na hadukka ati kerikayaka na pawukku na hi Allah paharia denganguya nama pamannumara jiaka da pamerrah ati denga manya, jiadinguka na hadukka ati pinnu tana pamati dengangu ya. ¹¹ Kadang mi pateti kadinya jiaya na hadukka ati keriya na pawukkuna hi Allah jia nama pahunga giminya nama pahawali ati tekka, toma a toda wikku, hukka ati, mangeat, kalaura, kerrang, na pahukkung! Tadalu matoungu patekka minyaka da eimangu pingi pa jala dengami ta ma jaji. ¹² Nou atouna aku tulih kagimika hurrat, da witi eingu ma wolu majala, annang witi eingu tou ma li ya nama malilla ati ana wolu majala nama pahawali atimi lahi nyiama mi itta ya ta hagana hi Allah. ¹³ Jia nama hawiting hina egi na atima. Higilnaka ana pakali pahoddar napa kellima, parei - reihingu kadang na egina na atina hi Titus, kadang ngara dukkani hina morrik na ati atigu. ¹⁴ Aku bakkul ati denga mi lahi dunna, a dami woluya nama pamerrah ati dengagu. Ma peka gimika gannanya nama padedeng pangalang -ngalang lahi dimmi, tou jellana tora na bakkul ati dengama ta hagana hi Titus na padenenguya. ¹⁵ Lappaka ki-ki taba na panamunguna lahi dimmi ana namu kanyaka na lara manudu atimi, ami pabuatuya tadalu ami paregga denganya ana duki. ¹⁶ Na egi na atigu kadang ku waimi a ganna - ganna kanyaka nama jaji.