¹ Waling lahi Paulus, witi pawukku atina hi Allah ana wai wihi - limmanya hi Kristus Yesus, jaka waling lahi Timotius anguwa da, ta lahi kaboggur huhu - anana hi Allah, jiaka dukkana na tou napalanga lihhu nyongana, napalanga papahigiluna hi Allah ta hagu'ul Akaia. ² Na pa'ayi-panamung jiaka na maga loli-haradona mawaling lahi Allah, na ama da, jiaka nama waling lahi Moiri Yesus Kristus, kana kado-iddi da, paeini - hamawa da. ³ Wuatu halinya hi Allah na ama na na Moiri da Yesus Kristus. Hi Ama ma pa'ayi - panamung, jiaka hi Allah nama pingngi kali pingngi na hoddar. ⁴ Nama kali hoddaruma ta dalu ama li ya namawilla, toma ama piaku a kali hoddaruha nama li ya mattu - mattu mawila waingu na wini kali hoddar napalanga kollima waling lahi Allah. ⁵ Kadang mearanguna nyiama a' makollinya na taguma dama keri ukku ya ta dalu mawilla napalina hi Kristus, tou jellana waling lahi Kristus ma kollinya na pakali - hoddar dama keri ukku ya. ⁶ Amali kayaka na mawilla jiaya pahawangar jiaka nama pamannumara mi, a' eikanguka makali - hoddaruma, tutu tagu jellaminya, kami piaku maddung, kami wainya na bellar ati ami li ya na hadukka mawilla mearanguna napalanga lima. ⁷ Lappaka na maddunguna ama mannigimi, witi ma penya, na hameara na mawilla na pa li da, mikolli jellanyana pakali - pahoddarangu na pakollima. ⁸ Kadang mi rangu yaka giki neima aganananya napalima ta Asia merrah. Na ngiddi deitu ngiddi tiddung na papahaila da gama duku buatu ya toma ta bata ati maka ama pangaddanya na morrikuna. ⁹ Kali kaina ama pangadolanya maga nou manyaka ta nuku mati. Jiadinguka hina jaji matounguka abi ma wainya na kullih taguna, jiadinguka ka jiapaya lahi Allah nama pakiddi balinya nama mati ¹⁰ Walingu ta mati napa mangeatdengang, na pamannumara daka. Lahi dunna ama paharainya na manninguma, jia nama hilu pamannumara. ¹¹ Witina ami gata ama waingu ami hailanya ta habayangumi kana dangu tou ma palangu ya, witi na kanyuru kanagga na pakollima witi ada hailagama ta dalu habayanguda. ¹² Ya jiaya na pabakkul ati dengangma. Kadang na panewi ta atima na pattekagama. Kadang mamorrikuma ya ta pinnu tana. Parei - parehinya na patuwu dengagimi ma hawali ati ya lappaka na murrah ati mawaling lahi ma Rabba Allah da mawaling ta manyakat pinnu tana maya jiadinguka mawaling kullihuna na pa ayi panamunguna hi Allah. ¹³ Kadang napa tou na ta hurat lahi dimmi. gannanya nama toma pabaha mi lappaka ami tauya ta atimi. Nou nammu ku manni mi, anna kaya kami tau tekkaya ta atimi, ¹⁴ Keriya napalanga pea mi hawanguku waling lahi nyiama. Ana toma kaka rahi na na ladduna hi Moiri Yesus mo pa egi gamanya na atima, tou jellakana nyiama ma egi ati denga gimi. ¹⁵ Mula na na pamannigu ya na pakabu ati gannapanya ngara na kaku patomang moulu mi, kami ka ya napa ayi panamungu na paduang waingu. ¹⁶ Nadinguka kaku pangalang pingi pahalakugu ta Makedonia lappakungu ku bali - bali lahi dimmi kami piaku tulu gataga tadalu halakugu ta Yudea. ¹⁷ Nou atouna, penya eingu pawolu gu dama padeneng tadalu aku ngananya na pakabu atigu? Anang, penya aganananya na pakabu atigu aku ngananya waingu ati tagu gu, toma kana hadekkang "o'a ya" jaka "da'a da "?. ¹⁸ Ta ngarana hi Marabba Allah na pingi pa ayi panamung, napalanga jaji ma lahi dimmi da pahadekka mangu "o'a" annang "da'a". ¹⁹ Kadang hi Yesus Kristus, ana Allah ya, jiaya napalanga pekada gimi ta padua mi tou na nyouwa, hi Silvanus jiaka mi Timotius, "o'a" anang "da'a" , da wiggu mangu, jiadinguka ta bali - balina lahi dunna (Moiri) o'a jiapaya nama einya ²⁰ Kadang lahi kristus jiaya na o'a tora dukkana na pajaji hi Allah jiayakadiyaka ta dalu ngarana, amin widda, ata wuatu balinya hi Allah. ²¹ kadang jia ya nama pamaddung gama,tou kana dimmi ta dalu Kristus, jiaya hi Allah nama pamaddunya. ²² Ana taunya tada ana huhu anada, ana hapurunya na hangahu harri na kana dounya na ati da ana padinyakunya na tora pa taguda. ²³ Tou na ku pa ounya hi Marabba Allah, nama itta ya-nama penya ,na peaganya ganna nanya nama hawiting hi daku mai ta Korintus witi namu da gimi. ²⁴ Da lara kama pareha mi a ganna nanya torana na ati wai mi, kadang madung minyaka ta dalu mannigumi. A ganna pananya kata mera kerraja kana egi na atimi.