7 ¹ Ja̧'hua̧nö̧ ja̧'a̧nä̧ Israel ttö̧ja̧mä̧ suronä jȩpi̧nä̧tö̧, ji̧yȩtȩ jȩpö̧ tticua pä'ö 'cä'epö ku̧nä̧huo̧ttö̧. Zera ahuaruhuä Juda isotö i̧sa̧ jahuätöttö ya̧tȩ ki̧nö̧ Acan pä'ö mi̧cua̧, Carmin i̧tti̧ Zabdi ö̧do̧, suronä jȩpi̧nä̧tö̧ jȩpö̧ tticua pä'ö 'cä̧'ȩpö̧ ku̧nä̧huä̧ttö̧ ȩmö̧. Ja̧'hua̧nö̧ ja̧'a̧ttö̧ Tu̧ru̧hua̧mä̧ a̧mi̧ surächi'inäcu̧ Israel ttö̧ja̧rö̧. ² Ja̧'hua̧nö̧ ja̧'a̧ttö̧ Josuémä Jericónä kä̧nö̧ hue'inö u̧mä̧tö̧rö̧ Haira̧'a̧ tti̧'cha̧ pä'ö Bet Aven tö'cö Betettömä kä̧hua̧ räopome päte'ö. Ja̧u̧mä̧ pä'inö "Tätucui rȩjȩ topäjätucui" ja̧'hua̧nö̧ pä̧u̧ Haira'a topö 'chi̧nä̧tö̧. ³ Topö i̧huä̧ji̧ Josué ö̧jo̧mȩ ppa̧'ä̧chi̧'ö̧ pä'inätö̧ o'catoi'önärö̧mä̧ huecuä Hai ötahuiyära̧'a̧mä̧. Hue'i dos milnötäcö ja̧'hua̧nö̧ jo̧ca̧'a̧ jö̧ttö̧mä̧ tres milnö̧tä̧ huecu'anö̧ ja̧'a̧ rohuäu tti̧'cha̧ pä'ömä Hai ötähuiyära̧'a̧. Recuätörömä tturohuähua pä'ömä huecuä jahuätömä a̧'u̧cu̧nä̧tä̧ huotö ja̧'a̧. ⁴ Ja̧'hua̧nö̧ ja̧'a̧ttö̧ Su̧ro̧da̧u̧mä̧ tres milnö tö'cöhuächi'önä 'chi̧nä̧tö̧, ja̧'hua̧nö̧ ja̧'a̧ttö̧ Hai ttö̧ja̧mä̧ rohuäu juruhuinätö̧ Israel ttö̧ja̧rö̧mä̧. ⁵ Ja̧'hua̧nö̧ ja̧'a̧ Hai ttö̧ja̧mä̧ cuä'ö icuinätö̧ Israel ttö̧ja̧rö̧ treinta y seinö su̧ro̧da̧u̧ jo̧mȩnä̧ ötahuiyä äpate jubö ruttinä̧u̧, möä'ca mȩyȩhuö̧ idahuänä pättia'a cuä'ö tticuinäu̧. Ja̧'hua̧nö̧ ttahuaruhuä totte'iyä̧u̧ Israel ttö̧ja̧mä̧ tta̧mi̧ iso'qui jacuättö yettecue'omenä ttujuru'inä juiyächi'inä̧u̧. ⁶ Ja̧'hua̧nö̧ jä̧ji̧ o'ca'a Josuémä ö̧'ca̧tä̧huä̧ta̧ serocu icuinö, ja̧u̧'i̧nä̧ Israel ttö̧ja̧ttö̧ tä̧mö̧ isotö'inä, ja̧'hua̧nö̧ jȩpö̧ ttunämä ocurä i̧sa̧ppȩ huȩnä̧hui̧nä̧tö̧. Tu̧ru̧hua̧ Dios hueähuä huȩnȩ ȩco̧ca̧ ä'ca jo̧mȩ ttu ja̧rȩyu̧nö̧ pä'i'ö rȩjȩ becuächönä jȩpi̧nä̧tö̧ ja̧u̧nu̧ mo̧ro̧ ni̧pä̧ro̧mȩ jubö. ⁷ Ja̧u̧nu̧ o'ca'a Josué pä'inö: ¡Ah, chu̧ru̧hua̧ Dios! ¿Tta̧'a̧nö̧ pä'ö Jordá aje 'cuätopa'anä ja̧'a̧tä̧ to'cuinätö̧ttö̧? ¿Amorreos ttö̧ja̧ ttu̧mö̧nä̧ cuiyipätö pä'ö kä̧'chi̧nö̧jä̧ tä̧ji̧? ¡Jordá aje ya̧nä̧ ji̧jä̧ töjö'anö ja̧'a̧nä̧ 'cä̧'chö̧ icuinöjä̧. ⁸ ¿Chu̧ru̧hua̧? ¿Tta̧'a̧nö̧ pädäcua̧jä̧ttö̧ jitämä Israel ttö̧ja̧ ttabo iyotörö iyäu tticua'amä? ⁹ Jitämä Cananeos ttö̧ja̧'i̧nä̧, o'catoi'önä ja̧huä̧jä̧ rȩjȩnä̧ ka̧cuä̧tö̧mä̧ ttä̧ju̧cuä̧cuo̧tö̧ pi̧yȩ huȩnȩmä̧. Jahuätömä ujuturu suböcuächönä ttö̧jä̧mä̧dä̧cuo̧tö̧. Ja̧'hua̧nö̧ ja̧'a̧ttö̧ ujutu ti̧mi̧mä̧ si'epö tticuäcuotö. ¿Ja̧'hua̧nö̧ ja̧'a̧ tta̧'a̧nö̧ jȩ'cuä̧cua̧jä̧ttö̧ ucu böo cui̧mi̧mä̧? ¹⁰ ¿Tu̧ru̧hua̧mä̧ pä'inö Josuérö ¡Ä̧rä̧mi̧'i̧! Tta̧'a̧nö̧ pä'ö rȩjȩra̧'a̧cu̧ ja̧rȩyu̧nö̧ cu̧'a̧'a̧ttö̧? ¹¹ Israel ttö̧ja̧mä̧ suronä jȩpä̧jä̧tö̧ jahuätömä ttö huedinö jȩpo̧co̧tö̧ päjätö nä̧u̧cui̧nä̧tö̧ ji̧yȩtȩ ku̧nä̧huä̧ttö̧. Jahuätömä nä̧u̧cuä̧jä̧tö̧, ja̧'hua̧nä̧ ja̧'a̧nä̧ dajö icuäjätö suronä jȩttä̧ji̧mä̧, jitötä ttiärecu hua'adö ku̧nä̧jä̧tö̧ ttu̧nä̧u̧cuä̧ji̧mä̧. ¹² Ja̧'hua̧nö̧ ja̧'a̧ttö̧ Israel ttö̧ja̧ ttabo iyotörö ttujuruhuoca'a ja̧'a̧mä̧ ja̧'hua̧nö̧ ja̧'a̧ttö̧ ttaboiyotö ttä'ca jo̧mȩttö̧ juiyupö töttipächäcua'amä, jitötä ttamönä usäjätö tottȩ'ä̧cuä̧mä̧. Ucutumä chu̧jä̧cua̧sä̧ ja̧u̧ dajö ku̧nä̧huä̧'i̧nä̧, dajö icuätötö'inä jȩpö̧ cuicuätucu o'ca'atä. ¹³ Ä̧rä̧mi̧'i̧ jo̧mȩnö̧ ttö̧ja̧ ji'ähui ttö chumöhuäyotörö jo̧mȩnö̧ kä̧tu̧cui̧, töcähuätucui yo̧ä̧i̧ mo̧ro̧ jȩ'cuä̧tu̧cuä̧cuȩmä̧ cu̧ru̧hua̧tu̧cu̧, cuä̧nä̧hua̧tu̧cu̧ Diosmä pa̧'a̧nö̧ pä'ö: Ji̧yȩtȩ ka̧'a̧ cu̧'quȩtȩtu̧cu̧nä̧ jȩpö̧ tticua pä'ö jȩpö̧ ku̧nä̧huä̧ Israel ttö̧ja̧mä̧ ttörohuähuiya'anö ja̧'a̧ ttaboiyotörömä o'cajuiyönä jȩpö̧ tticua pä'ö 'quȩ'ȩpö̧ ku̧nä̧huä̧ jȩpö̧ cuicuätucuome jubö. ¹⁴ Yo̧ä̧i̧ mo̧ro̧ Israel ttö̧ja̧mä̧ o'catoi'önä tribus pönä ttichi'ö'anö ja̧'a̧. Tu̧ru̧hua̧ pide isotöttö pä̧u̧mä̧ o'catoi'önä ttahuaruhuäcu pönä tti̧'chi̧'ä̧cuo̧tö̧. Ttahuaruhuä Tu̧ru̧hua̧ umätö̧mä̧ o'catoi'önä ya̧tȩ pönä tti̧'chi̧'ä̧cuo̧tö̧. ¹⁵ Pojopö ku̧nä̧huo̧tö̧ 'cuättopäcuotö ttö̧nä̧u̧cuä̧ji̧ ku̧nä̧rä̧tö̧tä̧; ja̧u̧mä̧ kuhuö icuähuäcua'a, nä̧u̧cuä̧ji̧rö̧'i̧nä̧, ö̧nä̧u̧cuä̧ji̧'i̧nä̧ o'cajuiyönä u̧ju̧nä̧rö̧'i̧nä̧ Dios hueinö jȩo̧ca̧'a̧ttö̧ Israelttö suronä jȩa̧'a̧ttö̧. ¹⁶ Ja̧'hua̧nö̧ ja̧'a̧ttö̧ Josuémä mo̧ro̧ päia'a Israel ttö̧ja̧ttö̧ ttahuaruhuä pönä i'cächinö, ja̧'hua̧nö̧ ja̧'a̧ttö̧ Juda ahuaruhuä 'cotöttö pähuächina̧'a̧. ¹⁷ Josuémä 'cachinö Juda ahuaruhuättö tö'cönänö juhuätöttö Zera ahuaruhuättö pähuächina̧'a̧. Zera ahuaruhuättö 'cachinö ya̧tȩcu̧ pönä. Jahuätöttömä Zabdi ahuaruhuättö pähuächina̧'a̧. ¹⁸ Zabdi ahuaruhuättö 'cachinö ya̧tȩ pönä Zabdi i̧tti̧ Carmin, Carmin i̧tti̧ Acan, tribusttö'inä Juda sotöttö pähuächina̧'a̧. ¹⁹ Ja̧'hua̧nö̧ ja̧'a̧ttö̧ Josuémä pä'inö Acanrö: chi̧tti̧ Israel ttö̧ja̧ tö̧ä̧nä̧hua̧ Dios ä'ca jo̧mȩttö̧ jue'ö ji'ähui, ja̧u̧ru̧tä̧ ji'ähui icui cuä̧ppö̧tä̧rä̧, ji'ähuittö ¿däje jȩ'cuä̧ttö̧? Ttörömä cuä̧ppö̧tä̧rä̧. ²⁰ Acan ädätinö: "Iso päi'önätä̧ suronä jȩpä̧ji̧sä̧ Israel ttö̧ja̧ ttö̧ä̧nä̧hua̧ Dios ä'ca jo̧mȩttö̧. Pi̧yȩ ja̧'a̧ ttö jȩchä̧ji̧mä̧. ²¹ Ja̧'hua̧nö̧ ja̧'a̧ttö̧ jahuätö ttöäre tochomenä adihua'atä Babilonía i̧sa̧tä̧ Doscientonö pärätä o̧bi̧'i̧nä̧, ji'cate oro isä'ca medio kilos abonä ramädä'ca'inä pä̧huä̧ topö ȩmä̧ji̧sä̧. Ja̧u̧mä̧ chojuisode kä'co päte'ö sa'ö dajö icuähua'a pa̧'a̧ pärätä o̧bi̧mä̧ ja̧u̧ dȩa̧'a̧ pa̧'a̧. ²² Josué hue'inö yotöterö Acan ojuisodera̧'a̧ ti̧'cha̧ pä'ö, jahuätömä jopö 'chi̧nä̧tö̧ juä̧nȩtä̧ ki̧na̧'a̧ ȩmä̧ji̧mä̧. Jueötä po̧cui̧pi̧nä̧tö̧ dajö icuäjimä juä̧nȩtä̧ dea'a pi̧na̧'a̧ pärätä o̧bi̧mä̧. ²³ Jahuätömä ȩmi̧nä̧tö̧ isode jacuä kä'co päte'ittö 'cachö iyinätö Josuérömä, Israel ttö̧ja̧rö̧'i̧nä̧ ttä'ca jo̧mȩ, jahuätömä rötinätö̧ Tu̧ru̧hua̧ Dios ä'ca jo̧mȩ. ²⁴ Ja̧'hua̧nö̧ ja̧'a̧ttö̧ Josué'inä, o'catoi'önä Israel ttö̧ja̧'i̧nä̧ 'chu'ädinätö̧ Zera i̧tti̧ Acanrö̧, pärätä'inä pö̧jä̧ta̧ adihuäta̧'i̧nä̧, oro isö'ca'inä, i̧tti̧mö̧ u̧mä̧tö̧rö̧'i̧nä̧, nä̧tö̧rö̧'i̧nä̧, ä̧ji̧mö̧ pä̧cä̧yu̧rö̧'i̧nä̧, äjimö̧ mulatö̧rö̧'i̧nä̧, ä̧ji̧mö̧ ovejastö̧rö̧'i̧nä̧, ojusode'inä o'cajuiyönä u̧ju̧nä̧rö̧mä̧ ȩpi̧nä̧tö̧ Acor pä̧mä̧roppära̧'a̧. ²⁵ Ja̧'hua̧nö̧ ja̧'a̧ Josué pä'inö: ¿Tta̧'a̧nö̧ pä'ö surojö cui'cächättö ujurumä? Jitä pi̧yȩ mo̧ro̧ Tu̧ru̧hua̧ Diosmä surojö i̧'cä̧chä̧cua̧ ucurumä. O'catoi'önä Israel ttö̧ja̧mä̧ inädönä icuäö icú kuhuö icuinätö̧. ²⁶ Jahuätö inädö tticuähuomenä möä'catä päi'ina̧'a̧ juhuä'ca möä'camä jitä pi̧yȩ mo̧ro̧ jubö päi'önä ka̧'a̧. Ja̧'hua̧nö̧ ja̧'a̧ttö̧ Tu̧ru̧hua̧ ö̧ra̧huä̧rä̧ji̧mä̧ täcö juiyächi'inäcu̧. Ja̧'hua̧nö̧ ja̧'a̧ttö̧ Acor pämäroppä micuome jitä pi̧yȩ mo̧ro̧ jubö päi'önä.