¹ Ya̧tȩ Micaía pä'ö mi̧cua̧ Efraín pä'ö micu mö̧ä̧'quiyunä̧ ki̧nö̧. ² jua̧u̧ jȩä̧ji̧mä̧ ja̧ju̧ru̧ ji'äu icuinö̧: "Pärätä o̧bi̧, mil jo̧mȩnä̧ ttö̧nä̧u̧cuä̧cua̧sä̧ pä’ö, jua̧u̧ nä̧u̧cuä̧ji̧rö̧mä̧ surojutä 'cuäoparöjä̧ päcua’a chä̧ju̧cuä̧ji̧mä̧, ttötä chu̧ju̧nä̧rö̧, jua̧u̧ nä̧u̧cuä̧ji̧mä̧ ttötä ja̧’a̧. Päcua ja̧ju̧mä̧ päjinä̧cu̧: "¡Jua̧u̧nu̧mä̧, Diostä ppä̧dä̧cua̧jä̧!" ³ Ja̧'hua̧nö̧ pä̧'ä̧ji̧'ca̧ ja̧ju̧ru̧ ppa̧'a̧di̧nö̧ pärätä o̧bi̧mä̧ mil-nö̧ jo̧mȩnä̧; ja̧'hua̧nö̧ ja̧'a̧ ja̧ju̧mä̧ pä'inä̧ju̧, isopäi'önä̧ pärätämä̧ Chu̧ru̧hua̧ Dios-rö chiyinö̧ chi̧tti̧ jähuänä̧ tta̧'cua̧juä̧ isä'ca ttaditiyattö pä'ö, ja̧'hua̧nö̧ ja̧'a̧ttö̧ ppa̧dä̧dä̧cu̧jä̧. ⁴ Ja̧'hua̧nö̧ ja̧'a̧ ki̧tti̧ ppa̧huä̧dä̧ji̧ pärätättömä̧ doscientos-nö̧ o̧bi̧tä̧ ȩmo̧po̧'ö̧ jua̧u̧juei kuhuö adicuä i̧sa̧rö̧ iyinä̧ju̧, tta̧'cua̧juä o'ca ‘co̧’ö̧ pärätättö aditiyaju pä'ö. Ja̧'hua̧nö̧ huejäji o'camä̧ ki̧tti̧ Micaías ojusodera̧'a̧ ȩpö̧ ttu̧niniyä̧cua. ⁵ Jua̧u̧ Micaías ojusodenä̧mä̧ tätähuä o’ca’i̧nä̧ sacerdote ö̧’ca̧tä̧huä̧ta̧’i̧nä̧ jȩpö̧ rü̧nö̧ ja̧’hua̧ta̧nö̧ jitütä ttö̧ä̧nä̧hua̧rö̧’i̧nä̧ aditö ku̧nö̧ kä̧nö̧ i̧tti̧mö̧ttö̧ ya̧tȩrö̧ sacerdote jö̧nä̧ ku̧ninö̧. ⁶ Jua̧u̧nu̧ pä̧nä̧ Israel ttö̧ja̧mä̧ ttu̧ru̧hua̧ presidenterömä̧ to'inä̧tö̧, ja̧'hua̧nö̧ ja̧'a̧ttö̧ jiturutä pä̧huä̧rö̧ja̧'a̧nö̧tä̧ jȩpö̧ ka̧cui̧nä̧tö̧. ⁷ Jua̧u̧nu̧tä̧ pä̧nä̧ ya̧tȩ mö̧ä̧ya̧ Leví isotö i̧sa̧ Juda idepiyu jinome Belén ötahuiyänä̧ kö̧mä̧̧, aditähuä jä̧’i̧jö̧ aditö ki̧’i̧pi̧nö̧. ⁸ Jua̧mä̧ koromȩ ö̧ja̧ pä'ö usu 'chä̧nö̧ rä'opä̧ji̧'ca̧, Efraín mö̧ä̧'quiyunä̧ rȩbȩhui̧pö̧, Micaías ojusodenä̧ 'chä̧hui̧'iö̧rö̧. ⁹ ¿Torö cuichäjättö? pä'ö Micaías jä'epö ä̧ju̧cuä̧cu̧. "Juda idepiyu jinome Belén ötahuiyättö ichäjisä" "ja̧’hua̧ta̧nö̧ Leví isotö i̧sa̧sä̧ chö̧jä̧cuo̧mȩ ususä —pä'ö ädätinö̧ jua̧u̧ mö̧ä̧ya̧mä̧." ¹⁰ Ja̧’hua̧nö̧ päiyäcu Micaías-mä̧ päinä̧cu̧ —Jua̧u̧nu̧mä̧ ttötäcu ki̧'i̧, Sacerdote cuäcua'anö̧, chä'o jö̧nä̧. Ya'ute a̧'ȩnä̧mä̧ pärätä o̧bi̧mä̧ to̧mu̧re jähuä jo̧mȩnä̧ ja̧’hua̧ta̧nö̧ cu̧cuȩ'i̧nä̧, cu̧'ca̧tä̧huä̧ti̧yu̧'i̧nä̧ chiyäcua̧jä̧ päcu jua̧̧u̧mä̧ Micaías ojusodenä̧ do’ächö kä̧mä̧di̧nö̧. ¹¹ Jua̧u̧ mö̧ä̧ya̧ Leví isotö i̧sa̧mä̧, Micaíascu kä̧nö̧mä̧ rö̧ȩnä̧ esehua’attö̧ i̧tti̧mö̧ jö̧'a̧nö̧tä̧ juoepinä̧cu̧. ¹² Ja̧’hua̧nö̧ ja̧’a̧ Micaías, Leví isotö i̧sa̧rö̧mä̧ ro̧ö̧ jähuätä aditö Sacerdote jö̧nä̧tä̧ juoepinä̧cu̧, jua̧u̧ mö̧ä̧ya̧mä̧ MIcaías ojusodenä̧ ki̧nö̧. ¹³ Ja̧'hua̧nö̧ ja̧'a̧ Micaías-mä̧, Leví isotö i̧sa̧ sacerdoterö chu̧ju̧nä̧ra̧'a̧ttö̧ Dios-mä̧ adiutä̧ jö̧nä̧ ppä̧dä̧cua̧sä̧cö̧ pä'ö a̧mu̧cuädinö̧.