¹ Josué 'corupä'i'inö o'ca'a, Israel ttö̧ja̧mä̧ jä'epinätö̧ TTU̧RU̧HUA̧ Diosrö, pa̧'a̧nö̧ päinätö̧: "¿Dijättö̧ ujututtö ä̧cuo̧mȩnä̧ 'chänö Cananeo ttö̧ja̧rö̧ ö̧ro̧huä̧huä̧cua̧mä̧?" ² TTU̧RU̧HUA̧ Diosmä ädätinö: "Judá jä̧cua̧'a̧ ö̧ro̧huä̧huä̧cua̧mä̧. Porö yabocumä, ja̧u̧ru̧tä̧ iyäjisä pi̧jä̧ rȩjȩ hue'ö tta̧hua̧ra̧ pä'ö". ³ Judá ahuaruhuä 'cotömä pä'inätö̧, ttö̧jä̧hua̧tö̧ Simeon ahuaröhuä 'cotörö: "Ujutucu ichätucui ji̧jä̧ rȩjȩ ujuturu iyähui'inäjä̧ra̧'a̧, ji̧nä̧ yo̧mȩtȩ päi'ö Cananeo ttö̧ja̧rö̧ turohuähuätucua. Ja̧'hua̧ta̧nö̧ ujutu'inä rohuäu ppätädäcuotöjä cui̧rȩjä̧ jö̧nä̧ iyähui'inäjä̧ra̧'a̧ 'chänö". Ja̧'hua̧nö̧ ja̧'a̧ttö̧ Simeon ahuäruhuä 'cotömä jahuätucu 'chinätö̧. ⁴ Judá ahuäruhuä 'cotömä rohuäu 'chinätö̧, TTU̧RU̧HUA̧ Diosmä Cananeo ttö̧ja̧rö̧'i̧nä̧, Ferezeo ttö̧ja̧rö̧'i̧nä̧, rohuäu iso juhuottepönä ppä'ädinö. Bezecttö Diezmilnö jo̧mȩnä̧ cuä'ö icuinätö̧. ⁵ Bezec ötahuiyättö, Adoni Bezecrö po̧cui̧pö̧, ja̧u̧cu̧'i̧nä̧ rohuähuinätö̧ ja̧hua̧ta̧nö̧ Cananeos ttö̧ja̧rö̧'i̧nä̧, Ferezeo ttö̧ja̧rö̧'i̧nä̧ rohuäu juruhuinätö̧. ⁶ Ja̧'hua̧nö̧ ja̧'a̧nä̧ Adoni Bezec töipächi̧yä̧u̧ o'ca'anä ru'hui'ö chuttädinäcu̧, 'chu'ädömä u̧mö̧pi̧yä̧ttö̧'i̧nä̧ ö̧jä̧pi̧yä̧ttö̧'i̧nä̧ ödo'chiyä u'ca jö̧ o'che 'cui'ö tticuinäcu̧. ⁷ Adoni Bezecmä pä'inö: "Setentanö ruhuotö, ttö̧mö̧pi̧yä̧ttö̧'i̧nä̧ ttö̧jä̧pi̧yä̧ttö̧'i̧nä̧ u'ca jö̧ o'che 'cui'ö tti̧cui̧nä̧u̧mä̧, Chiäre mesa isodä dȩa̧'a̧ttö̧ ca̧ca̧ti̧nä̧tö̧ ttu̧cuä̧mä̧. Diosmä ttö jȩchi̧nö̧ ta̧'a̧nö̧tä̧ jȩä̧cu̧sä̧". Ja̧u̧nu̧ o'ca'a Jerusalen ötahuiyäcu ttȩpi̧nä̧cu̧ jua'attötä 'corujuo'ächinö. ⁸ Judá ahuäruhuä 'cotömä Jerusalén ötahuiyä ttö̧ja̧rö̧'i̧nä̧ rohuäu 'cho'ipinä̧tö̧. Curä'o'chö so̧'ö̧ o'chunä turohuähuinäu̧ ja̧hua̧ta̧nö̧ ötahuiyä'inä ku icuinätö̧. ⁹ Ja̧u̧nu̧ o'ca'a, Judá ahuäruhuä 'cotömä Cananeo ttö̧ja̧ Neguev de'iyönä ka̧cuä̧tö̧rö̧'i̧nä̧, kä̧hua̧ mo̧'ä̧cha̧'a̧cu̧ möä'ca bȩi̧pä̧ro̧mȩ ka̧cuä̧tö̧rö̧'i̧nä̧ ttörohuähua pä'ö mȩjä̧hui̧nä̧tö̧. ¹⁰ Judámä yabocutä 'chinö cananeo ttö̧ja̧ Hebrón ötahuiyänä ka̧cuä̧tö̧rö̧ örohuähua pä'ö (Hebrón ä̧cuo̧mȩnä̧ i̧mi̧mä̧ Quiriat Arba pä'ö micuinome), ja̧'hua̧nö̧ ja̧'a̧ Sesairö'inä, Ahimánrö'inä, Talmairö'inä rohuäu juruhuinätö̧. ¹¹ Juoröttömä, Judá ahuaruhuä 'cotömä 'chi̧nä̧tö̧ Derbir ötahuiyä ttö̧ja̧cu̧ ttörohuähua pä'ö (Debir ä̧cuo̧mȩnä̧ i̧mi̧mä̧ Quiriat Séfer pä'ö micuinome). ¹² Caleb pä'inö: "Quiriat Sefer ötahuiyära'a̧ 'chä̧nö̧ rohuäu iso juo'epörömä, chittiju Acsarö, irecua pä'iönä chi̧yä̧cua̧." ¹³ Otoniel, Quenaz i̧tti̧mä̧, (Caleb i̧jä̧hua̧ röji i̧sa̧ ji̧na̧'a̧) Debirö chu'ädinö, ja'huanö ja̧'a̧ttö̧ Calebmä ittiju Acsarö, irecua päi'önä iyinäcu̧. ¹⁴ Recuo jo̧'ca̧'a̧tä̧ Acsamä Otonielcu ppäjächi'äji o'ca'a, kä'orö yo̧mȩtȩ rȩjȩ jäepiyaju pä'ö huȩ'ä̧ri̧nä̧ju̧. Käji mörättö ki̧mȩyȩhui̧a̧'a̧ topö, Caleb jä'epinö: "¿däje ppädädacu päcua'a jä̧ttö̧? ¹⁵ Jahuäjumä pä'inäju̧: "Adiunä ja̧tä̧ pä'ittö. Tä'cö Neguev rȩjȩ cuiyäja'attömä, aje a̧'u̧cuo̧to̧ ro̧mȩ'i̧nä̧ iyittö." Ja̧hua̧nö̧ jäjepäcu Calebmä aje a̧'u̧cuo̧to̧ ju'totocuttö'inä, dȩa̧'a̧cu̧ttö̧'i̧nä̧ iyinäcua̧. ¹⁶ Moisés i̧mi̧ya̧ ahuäröhuä 'cotö ceneottö̧ja̧mä̧, Palmas ötahuiyättö rä'opö 'chinätö̧ Judá ttö̧ja̧cu̧, Judá rȩjȩttö̧ de'a jui̧yä̧jä̧, Arad ötahuiyä tö'cönänö Judá ahuaröhuäcu ttö̧jo̧cua̧ pä'ö, juȩnȩmä̧ Neguev rȩjȩ ji̧na̧'a̧. ¹⁷ Judá ahuäruhuä 'cotömä ttö̧jä̧hua̧tö̧ Simeón ahuaruhuä 'cotöcu 'chä̧jä̧'cotö, Cananeos ttö̧ja̧ Sefatnä ka̧cuä̧tö̧rö̧ rohuäumä ya̧tȩ'i̧nä̧ ö̧ji̧pö̧ juiyönä cuä'äu icuinätö̧. Ja̧u̧ ötahuiyä i̧mi̧mä̧ Horma pä'ö o'inätö̧. ¹⁸ Judá ttö̧ja̧mä̧ Gaza ötahuiyä'inä, Ascalón ötahuiyä'inä, Ecrón ötahuiyä'inä ja̧'hua̧ta̧nö̧ ippeyenä ka̧cuä̧tö̧ tti̧rȩjä̧'i̧nä̧ 'cho'ipinätö̧. ¹⁹ TU̧RU̧HUA̧ Dios Judá ttö̧ja̧cu̧ kä̧nö̧ mö'ä'quiyu jo̧mȩ 'chottipönä ppädinäu, ja̧'hua̧nö̧ ja̧'a̧nä̧ mejiyänä ka̧cuä̧tö̧rö̧mä̧ rä'epö icuocotö pinätö̧, jahuätömä caruquiyä cuoräuttö adicuä ocä ttu̧ju̧nä̧ra̧'a̧ttö̧. ²⁰ Hebrón ötahuiyämä Caleb'rö iyähui'ina'a (Moisés päinöta'anö), ja̧u̧mä̧ juorömä Anac i̧tti̧mö̧ huämetöcuä huotörö rä'epö icuinö. ²¹ Ja̧'hua̧nö̧ ja̧'a̧nä̧ Benjamín ahuäröhuä o'cotömä rä'epö icuocotö pinätö̧ Jebuseos ttö̧ja̧ Jerusalénä ka̧cuä̧tö̧rö̧mä̧. Ja̧'hua̧nö̧ ja̧'a̧ttö̧ Jebuseos ttö̧ja̧mä̧ Benjamin ahuaröhuä 'cotöcu jitä mo̧ro̧ jubö päi'önä ka̧cuä̧tö̧ Jerusalénätä̧. ²² José ahuaröhuä o'cotömä Betel ttö̧ja̧rö̧ ttörohuähuäcua'a jo̧mȩnö̧ ki̧nä̧tö̧, TTU̧RU̧HUA̧ Diosmä jahuätucutä ki̧nö̧. ²³ Jahuätömä u̧mä̧tö̧rö̧ hue'inätö̧ Betel ötahuiyä ya̧huä̧i̧nä̧ ttusähuaja pä'ö (ja̧u̧ ötahuiyä ä̧cuo̧mȩnä̧ji̧mä̧ Luz pä'ö micuinome). ²⁴ Ya̧huä̧i̧nä̧ usähuätömä ya̧tȩ ötahuiyättö rä'o'örö topö, pä'inätö̧: "ppä'ädipö ji'ähuitö tta̧'a̧nö̧ dotächa'anö ja̧'a̧ttö̧ ötahuiyä jacuämä, jicuäuttömä rȩrö̧jö̧nä̧ to̧tä̧cua̧jä̧." ²⁵ Ja̧u̧mä̧ jahuätörö i̧jȩpi̧nö̧ ötahuiyä jacuäcu doächäcuähuome. Ja̧'hua̧nö̧ i̧jȩpä̧u̧mä̧ ttumönä curä'ochu 'chu̧huä̧rä̧nö̧ dodepu ötahuiyänä ka̧cuä̧tö̧rö̧ rohuähuinätö̧, ja̧'hua̧nö̧ ja̧'a̧nä̧ ji'ähuäjirömä ahuaruhuäcu töipächa'anä ja̧'a̧tä̧ tottinäcu̧. ²⁶ Ji'ähuäjimä Hititas tti̧rȩjä̧cu̧ tö'ipächinö jua'attömä ya'ute ötahuiyä aditinö, aditäjomemä Luz pä'ö o'inö, jitä mo̧ro̧ jubö päi'önä ja̧'hua̧nö̧tä̧ mi̧cuo̧mȩ. ²⁷ Manases ahuaruhuä 'cotömä, Bet Seán ötahuiyänä ka̧cuä̧tö̧rö̧'i̧nä̧, Taanac ötahuiyänä ka̧cuä̧tö̧rö̧'i̧nä̧, Dor ötahuiyänä ka̧cuä̧tö̧rö̧'i̧nä̧, Ibleam ötahuiyänä ka̧cuä̧tö̧rö̧'i̧nä̧, Meguido ötahuiyänä ka̧cuä̧tö̧rö̧'i̧nä̧ juȩnȩtä̧ jäyänä ötahuiyä ppo̧'ö̧nä̧ ka̧cuä̧tu̧rö̧'i̧nä̧, rä'epö icuocotö pi̧nä̧tö̧, jua'amä Cananeo ttö̧ja̧mä̧ porö ti̧rȩjä̧ttö̧mä̧ koromecumä pporächi'ocotöjä pättina'a̧ttö̧. ²⁸ Israel ttö̧ja̧ yabonö juruhuächö, Cananeos ttö̧ja̧rö̧ pä̧i̧cu̧nä̧ ttaditönä huȩttä̧ri̧nä̧u̧, ja̧hua̧nö̧ ja̧'a̧nä̧'i̧nä̧ 'cato'inärö̧mä̧ ra'epö icuocotö pi̧nä̧tö̧. ²⁹ Efrain ahuaruhuä o'cotömä rä'epö icuocotö pi̧nä̧tö̧ Cananeos ttö̧ja̧ Gezernä ka̧cuä̧tö̧rö̧mä̧, Ja̧hua̧nö̧ ja̧'a̧ttö̧ Cananeos ttö̧ja̧mä̧ jahuätucutä Gerzeer ötähuiyänä kä̧cui̧nä̧tö̧. ³⁰ Zabulón ahuaruhuä 'cotömä, Quitrónä'inä, Naalalnä'inä kä̧cui̧nä̧tö̧rö̧mä̧ rä'epö icuocotö pi̧nä̧tö̧ ja̧'hua̧nö̧ ja̧'a̧ttö̧ Cananeo ttö̧ja̧mä̧ jahuätucutä kä̧cui̧nä̧tö̧, ja̧hua̧nö̧ ja̧'a̧nä̧ Zabulón ttö̧ja̧mä̧ Cananeos ttö̧ja̧rö̧mä̧ rö̧ȩnä̧ pä̧i̧cu̧nä̧ ttaditönä huȩttä̧ri̧nä̧u̧. ³¹ Aser ahuaruhuä 'cotömä Aconä'inä, Sidónnä'inä, Ahlabnä'inä, Aczibnä'inä, Helbanä'inä, Afecnä'inä, Rehobnä'inä ka̧cuä̧tö̧rö̧mä̧ rä'epö icuocotö pi̧nä̧tö̧. ³² Ja̧hua̧nö̧ ja̧'a̧ttö̧ Aser ahuaruhuä 'cotömä ka̧cui̧nä̧tö̧ Cananeos ttö̧ja̧cu̧tä̧ (juȩnȩtä̧ ttö̧ji̧na̧'a̧ttö̧), jahuätörö ra'epö tticuoca'a ji̧na̧'a̧ttö̧. ³³ Neftali ahuaruhuä 'cotömä Bet Semesnä'inä, Bet Anatnä'inä ka̧cui̧nä̧tö̧rö̧mä̧ rä'epö icuocotö pi̧nä̧tö̧. Ja̧'hua̧nö̧ ja̧'a̧ttö̧ Neftali ahuaruhuä 'cotömä ka̧cui̧nä̧tö̧ Cana̧neos ttö̧ja̧cu̧tä̧ (Ja̧huä̧jä̧nä̧ ka̧cui̧nä̧tu̧cu̧). Ja̧hua̧nö̧ ja̧'a̧nä̧, Neftalí ahuaruhuä 'cotömä Bet Semes ttö̧ja̧rö̧'i̧nä̧, Bet Anat ttö̧ja̧rö̧'i̧nä̧ pä̧i̧cu̧nä̧ ttaditönä huȩttä̧ri̧nä̧u̧. ³⁴ Amorreos ttö̧ja̧mä̧ Dan ahuaruhuä 'cotörömä möä'quiyu jo̧mȩtä̧ ttö̧jo̧cu̧nä̧ huȩtti̧nä̧u̧ meje'ca jo̧mȩcu̧ tti̧mȩyȩu̧ juiyönätä̧. ³⁵ Ja̧hua̧nö̧ ja̧'a̧ttö̧ Amorreo ttö̧ja̧mä̧ Heres rȩjȩnä̧'i̧nä̧, Ajalón ötahuiyänä'inä, Saalbim ötahuiyänä'inä ka̧cui̧nä̧tö̧, ja̧hua̧nö̧ ja̧'a̧nä̧ José ahuaruhuä 'cotö su̧ro̧da̧u̧mä̧ rohuäu 'cho'ipinätö̧, 'cho'ipö̧mä̧ pä̧i̧cu̧nä̧ ttaditönä huȩttä̧ri̧nä̧u̧. ³⁶ Amorreos tti̧rȩjä̧ ko̧ro̧jä̧cu̧ beipomemä Acrabim pä̧mä̧rä'cattö kä̧mä̧da̧'a̧mä̧, Sela ötahuiyänä 'cuä'o'ö möä'quiyu jo̧mȩ jubu ji̧na̧'a̧.