¹ Padapena nacoema njaji Judá njite Benjamín poco njemica coanca njaji inaiki aimadan nadenji preso sho pada jiipai nacojle nadiaca tsenacja njerreta na Minalri iipanao, na Dio njaji Iraelnai. ² Niini naca Zorobabel icjaolre njite njaji njanirrinaipem iapiyawanai icjaolre tsacja. Naaco narso: ''Icadaa wadenjica iinai jliaji panti, ima caitsacja waomaca jliaji Dios ioma capishotsani, wamjaita tsacja maaficalri Lrirso lridee caojli pia fa nacjoite ajerreji jliaji Asiria italricanaa, Esar Hadón.'' ³ Mitsa Zorobabel, Jesúa njite njaji njanirrinaipem iapiyawanai naaco narso: ''Icaamitsa fa itaitalri idenjica wa Diote iipanao, cotsa jia cantja, niini fatsa idenjíi wa Minalri irso, na Diote njaji iraelitanai, cayotsaji Persia talricanaa Ciro inaa capisho.'' ⁴ Ikena njaji inaiki aimadan iofaacape nacodapi nainita namjaidataca njaji Judánai, nafietana wadee nadenji minicatsa jliaji panti. ⁵ Nacaoña njaji caconaaperri idenjicape talricanaati irso naa carro nacjoete wadee nanaitjaca cayoji nawaopia capisho nanaitjaca. Cayomitsa nanaitjacana Ciro caojli talricanaati, atee Dario jiawajli, talricanaati Persia lrico. ⁶ Njite Asuero iniita caojlina italricanaataca Persia lrico, nadana lrirso papje perra nacaitecawa maatsi nanaco njaji Judánai iofaacape Jerosalén rico. ⁷ Njite Artajerjes caojlina talricanaati Persia lrico, Bislam, Mitrídate, Tabeel njite nakitsiñape pja nadana papje paperra Artajerjes irso. Nadana jliaji paperra arameo lrico, njite namotoenati persianai iaco lricojle. ⁸ Niini jliaji comandante Rehum njite Simsai idanacaita, nadana papje paperra Artajerjes irso nacjoete njaji iofaacape Jerosalén lrico. ⁹ Niini Rehum, Simsai, pana pja nakitsiñape, jueznai, njite njaji idenjicape talricanaati irso Persia lricope, Erec lricope, Babilonia, Susa, njaji elamitanai nadana papje paperra, ¹⁰ nadana tsacja nainai njaji inaiki lridenji jiidati rico naofaa carro Samaria lrico jliaji cjaidete caconaadalri Asnapar, njite tsacja njaji inaiki iofaacapewa teeco pacoa lrico pemajle Ooni Eufrate irso. ¹¹ Icatsa jliaji papje paperra lrinacjoité dalri jliaji paperra nameenacanda Artajerjes irso, cayo lricaiteca: '' Fa pirsoperri, atsianai iofaacape Ooni Eufrate pemajle, wadana pirso cayoji: ¹² Pianjii carrotsa coanca, pjia talricanaati nanaco njaji judionai pimeenacaji idiawa Jerosalén ricojle, oopi nema wacjoete ima nanaitjaca tsenacja jliaji yacaalre maatsidalritsa. Njerretjenina lridanawa njite napecjoenina jliipocoa. ¹³ Niini panaya, pjia talricanaati, pianjintsa nataita cadaotsa namatsietaca pjiomi jliaji yacaare, njite njerreta tsenacja matsia lridaanawa, corriotsa naa carroketsa cocacan, corri tsacjaotsa nacaoñá carroketsa impoesto, icaamitsa namacaotsa ipalraatan iorrococawa. ¹⁴ Wanji capoa pjiaca icadaa warso jliaji idenjikjeti wadenjíi carro pirso anji, corri waoma pada inamacoadataca pjia wanjicayoyatsa. Cayoshopa wacaiteca pirso, pjia talricanaati coanca anji, ¹⁵ piomá carro cayecjatsa njaji paperra nadanacawa pjiomi naco njaji talricanaatinai pipjeyape, pianjíi carro ajadalrica inaiki mjeepacaperrica njaji Jerosalén ricope, nanaitjaotsa maatsi narso njaji yacaalre tsocoepe njite narso njaji talricanaatinai macacoe lricope. Icatsa njite neemacawa mana pana icjoete oopi ricotsa. Caidalri icjaote nawayaketa pia jliaji yacaalre. ¹⁶ Wacaite pjimi pianjii carrotsa, pjia talricanaati, ima nawayaketa cadaa njerretaca jliaji yacaalre njite lridanao tsacja, pianjii watsa corri ketsa cocá carroca pirso ajerreji naicajaolre kema njaji yacaalre pemajle lrirso jliaji Ooni Eufrate.'' ¹⁷ Niini jliaji talricanaati idieta iacoti Rehum irso, Simsai irso njite narso njaji nakitsiñape Samaria lricope, njite narso tsacja njaji iofaacape Ooni Eufrate pemajle: ''Imawadaca kjeti Iofaa icaolre rico.'' ¹⁸ Jliaji paperra imenacanda norso opina nalee njomi ima namotoetacani noaco lricjoiten. ¹⁹ Cayoshopa, nonaa naomaca norso noanji carro nanaco, njite naoketa nacaitecawa nanaco ajádalrica oopi ricocatsa nakerroataacawa nacjoete njaji talricanaatinai Jerosalén ricjoite niini nainoaca manawa naapiya. ²⁰ Cjaidaperri talricanatinai natalricanaata pia Jesrosalén naco, njite nanjíi piaca nanaco njaji yaacalre pemajle perri Ooni Eufrate irso. Njite nacadaa pia nacaoña carro narso impuesto. ²¹ Niini panaya, idana iacoti talricanaati nacjoite yaamí carro nadenjica njaji atsianai, wadee nadenjica jliaji yacaalre a cjerreca nodana pada iacoti narso ajaiteji. ²² Icapa matsia wadee imaodacaca lrioya jliaji nonaalri inaitjaca. Cotsa wacadaa carroca namatsietaacawa wadentja lritawiñaca jliaji maatsirri wa talricanaaca icjoete. ²³ Nalee cádanaco njaji iacoti Artajerjes idananda Rehum irso, Simsai njite njaji nakitsiñape, jlida nacotsa namoto naawa cjeyacalrim Jerosalén ricojle nanaamitá carro nadenjica jidaati rico njaji judionai. ²⁴ Cayo piatoa yaami nadenjica jliaji Dio iipana Jerosalén rico yamawalria oonia lri talricanaaca naco jliaji talricanaati Dario, Persia lricoda.