¹ मा पोयरो येशू ख्रिस्ता कृपाम तु आजी ताकतवर बोनी जो ² आने वार माहा साक्षी माहीने तु उनायो हो त्या लिन जे भोरुसा वाले माही हाय तियान होपी दया जे बिहरान हिकवा खातोर समर्थ वी ³ येशु ख्रिस्ता हारा सौनिकु इया नाताकी मा आरी दु:ख के ⁴ आंने जो सौनिका काम केहे तो जीवनाम संसारू कामा काजाम ओटकुतो नाहा, काहाका तियाल तिया वरिष्ठ अधिकाऱ्याल खुश केता आवा जोजे, ⁵ जाहा एगदो धोवडुला शर्यतिम भाग लेहे तो तियाल ताव लुग विजयु मुकूट नाहा पोवावते जाव युग तो नियम पालीन शर्यतिम भाग नाहा लेतो ⁶ खेती केनाऱ्याय मेहनत केन खेताम पेहला जोभी पाकव्यो तियाम पेहलो हीस्सो लेवुलो अधिकार हाय. ⁷ आजी आखुहू तियाप तुम्हा विचार केरा काहाका प्रभु तुम्हान बाद्दया गोठ्या होमजा खातोर क्षमता दी. ⁸ तुम्हा येशु ख्रिस्ताल इतवुता रेता काहाका जो मोई गेहलो तो फाचे जिवतो आने तो दाविद वंशा हाय इज आय तुम्हा मा सुसमाचारुम आखुहू ⁹ तीयाल त्या सुसमाचारूकी आय दु:ख सहन कि रियोहो, ओतोज नाहा ता गुन्हेगारुहोच हाकलीकी मान बांधी थोव्योहो पेन ते परमेश्वरा वचन नाय बांधी सेके. ¹⁰ इया खातोर आय परमेश्वरा निवडुला माहा खातोर दु:ख सहन किहु काहाका येशू ख्रिस्ताम मिलनारो तारण आने सर्वकालु गौरव तियाहान भि मिले, ¹¹ इ वचन विश्वासनीय हाय, की जिधी आपु वचना आरी मोया ता तिया आरी जिवताभी रिहु. ¹² पेन जाहा आपु दु:ख सहन केयो ता तेहकी आपु राज्यभी किहु आने जाहा आपु तियाल सोडी दिहु ता तेाभी आपुन सोडी दी. ¹³ पेन जाहा आपु अविश्वासु हाय पेन तो आजिभी विश्वासु हाय काहाका तो सोताल वागता आवतो नाहा. देवाल नाय पोटणारी कामे ¹⁴ लोकांहान ए गोठ्या इतवी देता आने परमेश्वराल साक्षी कीन तियान सावधान केता रेजा की गोठीकी चुलाते मा ऱ्याहा ऐहकी चुलाइन केडाज भलो नाहा वेतो, ता इ जे उनातेहे तियाल बीनारा वेहे. ¹⁵ तु खेरो वचन हारी रित्या आखणारो, आने जो काम केतोहो तिया तुल लाज वाटे एहडो केलोज कारण नाहा रे जो देवाल पोअहे एहेडो कामकरी वेरुला प्रयत्न के. ¹⁶ आने अमंगळपणा रिकामो वादविवाद केरुला टाला काहाका ते देवायने जासतिम जासती दुर लि जाहे. ¹⁷ आने एहडो वादविवाद केनारा हीकवुनू कर्करोगाहोस फेलाय, आने एहडा लोकांम हुमनाय ने फिलेत हाय. ¹⁸ जे सत्यायने दुर गियेहे ते बिजानभी सत्यायने दुर लिजाय रियेहे काहाका ते आखतेहे पुनरूत्थान ता वि गियो. ¹⁹ तियाल काय भी विजय परमेश्वराय जो पायो उभो केलो हाय तो तेहकील उभो रि तिया ओ शिक्को हाय का, प्रभु जे हाय तियान आखेहे आने जो केडोभी प्रभु नाव लेहे तियाय अनितीहीने दुर रेजा. ²⁰ मोडा कोवाम होनो आने चांदीज बासने नाहा रेते ता लाकडा आने कादु बोनवुले बासने भी रेतेहे, जे काही खास कामा खातोर ता काही साधा कामा खातोर, ²¹ तियाहाल जो माहु सोताल अनितीहीने दुर थोवीन चोखो केहे ता तो पवित्र केरा मालकुल उपयोगी पोडनारे बाद्दे हारे कामे केरूलाम तेयार री. ²² तरूणपणा वासनायने दुर रेजे आने धार्मिक जीवन, भोरुसो, प्रेम आने शांती खातोर तिया आरी रेजा आने जो चोखा मोनाकी प्रभु नाव लेहे तिया तुम्हा फाचला लागा. ²³ आने मुर्खपणा ने अज्ञाना वादविवादुयने दुर रेजा काहाका तुम्हान मालुम हाय इयामुळे भांडगे वेतेहे ²⁴ आने देवा सेवकाय चुलाया नाय जोंजे ता लोंकाहा आरी दोया की रा जोजे आने हकिवुनाम हारो ने खेटनारो रा जोजे. ²⁵ आने तियाय तिया विरोध केनाराल लीनतेने हिकवा जोजे काहाका परमेश्वर तियान भी मोन फिरवा खातोर सोकती दी आने खेरा पोणा ज्ञान वि जाय ²⁶ आने सौतानाय तिया इच्छाकी लोकाहान तिया केवुम ति थोवले हाय ते सुध्दीप आवी.