^{1 2} डायापने देवाय निवडुली बाय फुरिया आने तियु पोयराहान खेरा सहभागी वेअला लोकाहाहोश जियाहाप माय मोया किहीव आने तुमाहाप मोया केअनारो माय एखलोज नाहा इया खेराहाकी जोअ आमहोमे हाय तोअ आमहामे सादानंकादा रिंअ. ³ देवबाहाकापेन आने तिया पोयरो प्रभु येशु ख्रिस्त इयाहापने आशीर्वाद, दोया आने शांती इअ खेराआम आने मोयाआम पावुहू आरी रेअ. ⁴ बाहाकाय आपुहून देअदली आज्ञाप्रमाणे तोअ काहीक पोयरे खेराप चालतेहे ऐहेकी माल देखाआथेा इयाहापेने माल खुब खुशी वेअयी. ⁵ आने बाय माय तुल आमी विनंती किहींव का आपुहू ऐकबिजावे मोया केअनु इअ माय तुल नवी आज्ञा किहींव ऐहेकी नाहा ताहा जीअ वेअरा सुरवातीपासुन देअवनुम आलली हाय तिअज निखुहू तुमहाल. ⁶ आने तियु आज्ञापे चालनु म्हणजे मोया केअनु हाय इज आज्ञा हाय जी तुमाआ सुरवाती पेनुज उनाले जो हाय तेहकी तुमाहान तियापरमोन चाने मिल्यो. ⁷ काहाका फसवणूक केअनारी म्हणजे शरीराहांकी आवणार रेअहे येशु ख्रिस्त इयाआल कबूल केअनारी खुबूज बेनह्या माअही जुगाआम उठले हाय फसवणूक केअणारा आने ख्रिस्ताविरोध रेहेलाज हाअय. ⁸ आमाहाय केअला कामा तुमाआ ऐहेडोज वेअरा माआ द्या तर तिया बादेाज प्रतिफळ तुमहाल मिले तियाहाल खबरदारी ल्याआ. ⁹ ख्रिस्ता हिकवनुल चिटकीन न रेअतो जो आगला आगलो जाअही तियाआल देवा मिल्योअ नाह जो ख्रिस्ताआ हिकवनुल तिईन रेअहे तियाआल बाहको आन पोयरो ईयाहा बेनह्या प्राप्ती वेअली हाय. ¹⁰ ई शिक्षण नाय देअणारो केअडो तुमाअही आलो तर तियाआल कोअमे ल्याहा नाहा आन तियाआल सलामबीअ केअरा नाहा. ¹¹ काहाका जोंट केअडो तियाआ स्वागत केअहे तोअ तियाआ दुष्कर्माहा भागीदार वेअेहे. ¹² माअल तर खुबूज गोठ्या तुमाआल निखुअला आही तेबी तेअ तुमाहाल मांय सोअय आने पेनहाकी निखावू ऐहकी नाह तर त्यापेक्षा तुमाला मिअलु ओन हूबूंरासुमूर काय बादहोंज काय गोअगू ऐहकी मोनाम थोवली हाय म्हणजे आपु आनंद तियाहांकी परिपुर्ण ऐहकी वेअरी. ¹³ देवाआय निवडी लेलल्याआ तुआ बोअही पोयरे तुमाहाल सलाम आखतेहे.