Pasal 3

Yesus Menyembuhkan Pada Hari Sabat

1 Yesus baüngketiti lopopopa kékalëte kébaüng neloüng pa. 2 Tébamei té Yesusïng tékarëte, ténaneïng kébanejate kéléko eféfété Kewebängtete, lema tejuko nekekéwe féngtemeninite. 3 Yesus kékléko kebanéjate mekapë "ru langhoiwe." 4 Péaïang kalete febaïa "Bängtéténe jahilëlë; jahefënilëlëna jafënilelena? Péapateme roropame. 5 Kekalëfë tébameïng tahape kehütefe tehüpaläng tëme. Peaiäng kelete kebaiäng, "nomeme kamépëte." Nokëkewelete kaïngpa nokëke efëng. 6 Péaiäng téba Parisi tëte pihatëtë téba Herodian pitewako Kétéjajaté. 7 Yesus Kepatebapoha tete pato, teba Galilea pa Yudea tela Kea, 8 Anaïngra Yerusalem, pa Idumea, pakaüng Yordan, pa anaïngra Tirus, Tebanawo tété janawo Kéléi tete Kea. 9 Tébanawo tëe peäiang Kelëngko Bapuhängke tangu tetepikokoko, ne kékewe Tejapépéka. 10 Tebanawo kélëko nehae, peaïang tebanawofata tétéko tera kélëkotera Nekéké netélau. 11 Kébatéfa bapohängke Yesus tekare, témeho Kékepa hitéwae, "Me Tata Oke". 12 Peaïang Yesus kelënte tebameïng Batikéke talalaka. 13 Yesus keetipekara teba Kepule, Kelepa tetepae Kea. 14 Kéteba hapaüng kékeko, Télalaké ko pifé Kéke tétutëte, 15 Nafe teweko Kebatéfa tékéjujute. 16 Téba hapaüng: Simon ïng (batiüng ïng Kéfa Petrus), 17 Zebedeus kökéke Yakobus pa Yohanes (telaka batiüng Télakéfa Boanerges, pénapëpë "Koru Hahangke)", 18 Andreas Filipus, Bartolomeus, Matius, Tomas, Alpius kokeke Yakobus, Tadeus, Simon keba Zelot, 19 pa Yudas Iskariot Kekenaki.

Kuasa Yesus Berasal dari Allah (Mat. 12:22-32; Luk. 11:14-23; 12:10)
20 Yesus keketi pai, pa tebanawofa teleko hongra teTata tëtete. 21 Yesus Makepareke pii teri, téteke Tékéko kétume,"Ténike tahang teete". 22 Téba Ahli Taurat teja Yerusalem tee, "Kébatéfa Beelzebul", pa "Kébatéfa rëbe Tébaté Kekaju". 23 Yesus kélëngko Pikélëngko, "anara Kébatéfa ing Kebatefa kékajujukalé?". 24 Anara bamérang taküeté, baméïng nafëka. 25 Anara pai také, païng nafëka. 26 Anara Kébatefa kéwo kékaka kale, anara taküeïng, kenafëka, iäng kéwa. 27 Kebanafë jakëke bau këlëlëkalé anara kéba akélé umpa jatakélëlëlë. Akélé umpa jatakele pa iang. 28 Nimënilé, téba nëletéïng kejojolé. 29 Baüng anara bapo Kénaki keïng kéwawalé. 30 Ahli Taurat téni, "kébatéfa Keketing".
Keluarga Yesus yang Sesungguhnya (Mat. 12:46-50; Luk. 8:19-21)
31 Yesuske make pa léténgképa tére pa palo. Ténike tébameïng Kéténini. 32 Tébanawo tepajoko Ketume, teni, "Mekape, Memapa teba letememe téareté pëngwe Metéjuete. 33 Pa Yesus kélëng, "kéïng téba anipa téba lengte Nine. 34 Pa Kékalëngtë tebameïng Kététéïng Kelenawa tébamëté nihowe Keïngwe, "Aninine pa téba lëngte Nine awe! 35 Ba Ainine pinake keleleile, Kebänglëtëngnine, peba lëtënine, pa ani Nine.