¹ Na Pol, na Tuwa Tutu sorao emo naname aungne, Yesu Kristo putong naname, aungna denao ra atu Yesu Kristo ra aposel yewang. ² Na imagi ewiya gae Timoti ra hina nena, tumodiyao gabu ra awiya ni mani nana nibaung. Tutu Mama naname aungne, Yesu Kristo Tuwa naname aungna, hoamao, aungne mono, aungne eyare ge, ami ni aungne mitaise. ³ Be na baung Masedoniya yari sero nasani, ni eno ge no sewang nigasa, ge kewa awiya nupe sinena, ni Epesas nape atu mitasani, emo ena aeno ge tauyao nibaung se, be ago emo bauno eno Tuwa ra bowi gipiti nasani giro, gehiwao nigao agera ena awiya, emo bauno eno oko gipaese. ⁴ Ago unge tebetabe awiya didi nasani, bata mani agera aungna yazo ra unge gehiwao didi neya, nao awiya yore nibaung duwaese, unge ayetugao awiya kotumao agera sisigao ra unge gege ara. Unge ami ago soremai Tuwa Tutu tumodidi nasani, nupe ago eno no yari sena, awiya ago oko zawagari neya. ⁵ Arare, heme sao tauyao ra me awiya, name kotumao ingwaing re mitasani, nupe moko naname pewa yero mitai, name otao mani aratapu nasani, name tumodiyao ingwaing re naneme. ⁶ Mani ena gabu ewiya asoko yero, nao ingwaing bauta potero, ago dau mani ine yero, dau ge tebe tabe sinasani neya. ⁷ Ago dubu awiya, Tuwa Tutu ra sao tauyao ra gipao mamono yari aratapu nowa, arata ago ge no sinowi aungna zawagao agera hina aung, ago tebe tau nowa. ⁸ Arata name gari nename awiya, mani zo nu sao tauyao etetero ago yari niya, awiya nu gariniya, sao tauyao awiya nona ingwaing ara. ⁹ Name gari nename awiya, sao tauyao awiya mani ingwang waing eno oko pugaiwa, sao tauyao awiya zoma, mani sao tauyao daigaiti nasani ziyo hititi nowa, mani kotumao ingwaing aung, pasena gege nasani Tuwa bauta potero nowa, mani aiyamono mamomo dewa magayewa, mani butu dedunowa, ¹⁰ mani kuma nowa, emo emore kuma nowa,bauno baunore kuma nowa, mani soumani hungai pupunowa,gehiwao mani, mani gehiwao ge dongdoti nowa, aungne nao nomi Tuwa ra ge aungne iwo niya, sao tauyao awiya aeno pugaiwa. ¹¹ Tinawiya ge ewiya deka Tuwa ra bowige na eno pugainu na tugata nona aine ara. ¹² Na Tuwa naname Yesu Kristo eno dange sinena. Nu gigina awiya na buro awiya yao teng, ayero giro na eno putoung pugairo, na pu buro nuna aungna moko ra gaina. ¹³ Gitau awiya na bowi ge nuna ingzao emo, nupe na bowi nuna iwo nao emo nibaung, na bowi nuna eno nao meko mako yewang. Arata nu na eno hoamao gipena, no eno oko, na tumodiyao aung, zawagao aung, mitasani oungne nao meko ayero yewang. ¹⁴ Arata Tuwa ra mono zo moko nana bebungna, anasani na eno tumodiyao aungne hina aratamao ra nao, Yesu ra hina mitoiya, awiya dema na eno pugaina. ¹⁵ Yesu Kristo hosi tangi eungna yena, awiya name pasena emo bauno sorero pai ingwaing yanemese aeno bungna, pasena mani miteya aungna tame meko nibaung awiya naka na ara. Ge ewiya geme nibaung name apakana ami nigiro tumodiyari nename ami ingwaing niya. ¹⁶ Susuwa aeno, na eno hoamao gipena, nu ayero yai, otao mani ena nana tame atu giro, nao memeko doro, tumodiyao re nete nao masi paese yena. Yesu kristo deka aodiyao nao nuna name eno gipena. ¹⁷ Nu awiya Emo Tuwa be aung mitao gege mitoiya, nu oko maganoiya, mani zozo nu oko gigiwa, Tutu awiya nu gege. Yazo bowire, waegao zeyang zeyangre, apakana nuna yaise, be aung. Iyo geme. ¹⁸ Timoti mani nana, na ge tauya nibaung nina beraung ra atu pugaiti nena, gitau otu mena ni eno eniyang ge sewa mitoiya awiya, ni hinade ingwaing yasese sewa, ¹⁹ arare kotumao ingwaing aungne tumodiyao aungne awiya hingiro tauye. Ora ni ge ewiya oko ago ya bata gari nesa awiya, ni emo ena gitau, tumodiyao agera gera yewa aine yarinesa, ago awiya wang zo boya ra hitiro bezi noiya aine yewa. ²⁰ Mani awiya Himenias aungne Aleksenda ine, agoto awiya sanda ra nage pugaiwang, agoto atu hatu taungno oungne agore agoto Tuwa Tutu eno ge meko okosari neyato.