¹ Bama heagi na namo, to asi anina. To Lohiabada enai na matahanai bona iha hedinaraina herevadia hari baina gwauraidia hedinarai. ² Lau dibagu tau ta Keriso lalonai, ia na lagani gwauta-hani vada ela-ia be taunimanima lalonai, lau na asi dibagu, eiava taunimanima murimurinai, lau na asi dibagu, Dirava sibona mai dibana una tau na edae laia Paradaiso ihatoina lalonai. ³ Bona lau mai dibagu una tau, tau-anina lalonai eiava tau-anina murimurinai, lau na asi dibagu, Dirava sibona mai dibana, ⁴ ia na edae laia Paradaiso lalonai bona ekamonai herevadia na taunimanima ese basie hereva laidia diba. ⁵ Una tau dainai lau na baina heagi. To lau sibogu daiguai na basina heagi, a egu manoka-manoka hari. ⁶ Bema lau baina ura heagi, lau na basina kavakava, badina launa hereva momokani baina hereva laia. To launa na heveri taomu ini gau amo, bona ta be, lau basine lalohadai laigu bada, a egu ai oitamu gaudia bona okamonaimu gaudia hari. ⁷ Una dainai lau na basina hekokoroku, egu mata-hanai dainai, a gini-gini tauanigu ai egwadaia vareai- una na satani ena hesiai tauna (aneru) lau baine ha hisihisigu, lau baina hekokoroku garina. ⁸ Nega ha-toi Lohiabada na noia una gau na egu amo baine abia oho. ⁹ To ia ese ehamaorogu eto "egu harihari-bada na oi emu ai baine davana, badina be manoka-manoka ai lau egu siahu na herea." Lau na mai moalegu ida egu manoka-manoka baina heagilaia, bena Keriso ena siahu na lau egu ai baine mia. ¹⁰ Una dainai Keriso baina hamoalea egu manoka-manoka lalodiai, hegwau heniai, kerere ai, hahedika negadiai bona dika iboudiai lalodiai, badina be na manok-manokamu neganai, na goadamu. ¹¹ Launa vada na kava-kava! emui hahegugu dainai, a umui ese na boma hanamogu. Lau na ene "Apostolo-hereadia" se hereagumu, ena be lau na gau ta lasi. ¹² Momokani Apostolo toadia, toa badadia umui lalomui ai ekara hesiriuva, toa bona hoa karadia. ¹³ Edena dalai umui na sehaeromui namonamo dubu haida padadiai, a lau ese umui na asi naha metaumui? ina kerere amo baruhagu nege. ¹⁴ Aitaia, lau na hegaegae nega ihatoina ma baina vasi dekemu, bona basina ha metaumui. Badina lau na umui emui ai gauta asina tahuamu, to umui hari. Badina be natu ese tama bona sina edia basie habou. ¹⁵ Hari-hari launa mai moalegu ida tau-anigu baina heni bona baina heni guguru umui laumamui daidiai. Bema lau ese baina lalokau henimui bada, umui ese lau be ba lalokau henigu maragi a? ¹⁶ Bema unu baine heto neganai, dia lau ese umui asina ha metaumuimu, to dibaka taugu dainai mahutamui ai name davarimui. ¹⁷ Be, dekemui na siaidia vasi taudia ese eme hadibagu a? ¹⁸ Tito na noia baine vasi dekemui, bona tadikaka ta danu ia ida nasiaidia. Tito ese edibaganimui a? ai be lauma tamona lalonai asi a rakamu a? ai be ae gabu tamona lalonai asi a rakamu a? ¹⁹ Umui ese olaloamu ai raruosi na umui emui amo ahelao ahumu a? ai na Dirava vairanai bona Keriso lalonai a herevamu, ini gau iboudiai, emai lalokau taumui, umui iha goada laimui. ²⁰ Launa na garimu, bema ba vasimu neganai baina vasi davarimui, dia lau egu ura hegeregerenai bona lau danu umui ese bavasi davarigu dia umui emui ura hegeregerenai, bena heai, mama, gwau tubu, badu, a heparara, hahebade koikoi, maumau, hekokoroku, bona hahebadu karadia. ²¹ Bema launa baina vasi lou neganai, egu Dirava ese baine ha maragi-maragigu vairamui ai, bona karadika taudia hutuma taidia baina tai, badina be edia mata bodaga, heuda hanai, edia lebu-lebu karadia amo, asie helalo-kerehaimu daidiai.