¹ Lau, Paulo, sibogu oi nanoimumu, Keriso ena manau bona manada daidiai. Lau na manau dekemui ai na nohomu, to bema dauhai nama noho lau na mai goadagu. ² Na noimuimu, bema lau na umui ida negadia ai, lau na gau ta garina basina gari, lau na baina goada. ³ Ena be tau-anina ena dala ai a rakamu, to emai tuari na dia tau-anina ena amo, ⁴ badina be emai tuari gaudia na dia tau-anina ena, a Dirava ena amo emaimu siahuna, kohoro irohodia. ⁵ Bona Dirava dibana e laoa ahumu gaudia iboudiai e haketodiamu, lalohadai iboudiai e guidiamu Keriso ikamonai henina ai. ⁶ Ita na baita kamonai, gwau ede ede iboudiai davadia baita heni. ⁷ Hedinarai gaudia na vada oitadia, tau ta baine eto ia na Keriso ena, ia sibona ese ma baine haeroa lou, ia hegeregerena ita danu Keriso ena. ⁸ Bema lau na emai siahu baiama heagi laia, unu na Lohiabada ese ilarebamui helaoreana, a dia iha dikamui, lau na basinama hemarai. ⁹ Egu revareva na basi oto ihagarimui dainai na tore henimuimu. ¹⁰ Momokani haida etomu ena revareva na mai metaudia bona mai siahudia, to tau-anina na manoka manoka bona ena hereva danu asi anidia. ¹¹ Mani ta ese baine haeroa, emai hereva dekemui evasimu hegeregerena, emai kara danu unu baia kara toma. ¹² Ai na asi a tomamu sibodia ehahenamomu taudia hegergeredia, sibodia eha hetohomu, asi edia laloparara bona asi aonegadia. ¹³ Basia heagi kava a Dirava ese ehenimai hahetohona benai emui ai vada ekau. ¹⁴ Emai hahetoho na asi aha lataia, enabe asi abimui dae to sivarai namona na avasi laia. ¹⁵ Emai gaukara hetoana basia heagilaia, aha eromu, emui abidadama na lalomui baine tubu hetoana do baine daudau. ¹⁶ Bena unu kahadia tanodia ai sivarai namo do baia harorolaia, a idauna ta ena gaukara basia heagilaia. ¹⁷ A ta baine heagi, ia ese Lohiabada lalonai baine heagi. ¹⁸ Badina be sibona ehahenamomu tauna na sibona namona basine gwauraia a Lohiabada ese ehanamoamu tauna hari.