¹ Lau, Paulo, sibogu umui na noimuimu, Keriso ena manau bona manada daidiai. Lau na manau dekemui ai na nohomu, to bema dauhai nama noho lau na mai goadagu! ² Na noimuimu, bema lau na umui ida negadia ai, lau na gau ta garina basina gari, lau na baina goada ena be haida ese egwauraimaimu ai na tauani ena dala ai arakamu. ³ Ena be tau-anina ena dala ai a rakamu, to emai tuari na dia tau-anina ena amo, ⁴ badina be emai tuari gaudia na dia tau-anina ena, a Dirava ena amo emaimu siahuna, kohoro irohodia bona helogo dika dia alaodia ahumu, ⁵ bona Dirava idibanai e laoa ahumu gaudia iboudiai e haketodiamu, lalohadai iboudiai e guidiamu Keriso ikamonai henina ai. ⁶ Bona aina hegaegae ini gwau ede-ede, iboudiai davadia baia heni ela bona emui kamonai na baine guguru. ⁷ Ini evaramu gaudia na vada oitadiamu. Bema ta baine eto ia na Keriso ena, ia sibona ese ma baine haeroa lou, ia hegeregerena ita danu Keriso ena. ⁸ Bema lau na emai siahu baiama heagi laia, unu na Lohiabada ese ilarebamui helaoreana, a dia iha dikamui, lau na basinama hemarai, ⁹ egu revareva na basi oto ihagarimui dainai na tore henimuimu. ¹⁰ Momokani, haida etomu, "ena revareva na mai metaudia bona mai siahudia, a tau-anina na manoka, bona ena hereva danu asi anidia." ¹¹ Mani ta ese baine haeroa, ena be ai na dia umui ida, to emai hereva na revareva ai dekemui evasimu, bona bema dekemui ai danu unu baiama kara toma. ¹² Ai na asi a tomamu sibodia ehahenamomu taudia hegeregeredia, to sibodia e hahetohomu, sibodia e hahegeregeremu, bona asi edia laloparara. ¹³ Ai na, ede heto, Basia heagi kava a Dirava ese ehenimai hahetohona benai emui ai vada ekau. ¹⁴ Emai hahetoho na asi aha-lataia, ena be asi abimui dae to sivarai namona na avasi laia. ¹⁵ Emai gaukara hetoana basia heagilaia, aha eromu, emui abidadama na lalomui baine tubu hetoana do baine daudau. ¹⁶ Bena unu kahadia tanodia ai sivarai namo do baia harorolaia, a idauna ta ena gaukara basia heagilaia. ¹⁷ A ta baine heagi, ia ese Lohiabada lalonai baine heagi. ¹⁸ Badina be sibona ehahenamomu tauna na sibona namona basine gwauraia a Lohiabada ese ehanamoamu tauna hari.