1
Daka roma gami gamika vara, eduge auka besube koita nagatera auka iaga inuhati biavara.
2
Eduge auka nitabata gahare mati bia gahare gahava iau derikehe ge auka uma, ate au Mame vani roiare ei.
3
E dainehe no ni gami aviehe noka vata vadaka o magurihe noki uiege.
4
Eduge vani be oroganei Dirava raki au Moe besugi auki magi vagatanahe aena derikahe guruanu.
5
Au onakinera aena derikahe uiare maguir gahi gevare no idigei noka au gamuhe gahisa.
6
Iaka au gamuhe dainehe, Dirava raki au Moe Horuve besugi ni uhura, eraki to roma, "Di Mame, di Mame."
7
Eige aka beta besubesu koita vara, edube aka au moera, eigera Rohi Bauge raki iaga inuhati a moimoara.
8
Eduge subuta ge aka Dirava dibane veite eige aki Dirava nune iau besube koitave goinu.
9
Negu ge aka Dirava dibanera, se akamu Dirava dibane goinu, edube orenaki ge a mati hero veite renu maka veite iaganiva goinu. Ana mati iau aena derikehe gaitana me misa.
10
Akamu vani mati bata isage mati nega mati tau aki erageima!
11
Daka iai dainehe ge daka sigoima badiva di meve ia ruga ge ahake goima.
12
Di ogo nanuhea, imimi vara da nagate gahiahe, da tage ia nagate goinu, iaka da daure gahiga veitera.
13
Eduge iama dibana gahisa ahata maka dika dainehege ora di ganaive, daki hari mage iani mi oroganu.
14
Di ahata make dikave dainehe iaki da daure gahiga veite se da besibe gahiga veitera. Iai mageve da orogane ia gagae kine ramu erehuta daka Dirava aneruve se Iesu Keriso nagate.
15
Mage bina orei genu? Daki ia boriti gahigeima edubena ia, iai nie dari gevare idigi da moimanu.
16
Ga riaga ia boriti gahigevene dainehe ia bina da inara gaha?
17
Koita vire iai gaharahe ragohare iaka iau kasihegahisa maka mage ve veite. Iauka ia bakugevege iaka iau gahra ragohisa.
18
Iaga mage dainehe ia uhukorahi ragoharera magera beta da ia ruta uiera ei.
19
Di gamuhea detu magi nagate dana huhu nagisa ate Keriso iaia gagae goiare ei.
20
Da gaharahe vara ia ganivara dana so ia ruta goiar, di eraravage nune gahare, iai dainehe tage daki uhukorahi vima.
21
Da boriti gahiahe iana aena derikahu usa romena ia, iana aena gava ihihi veitenu.
22
Ga aena vara roma Aberahamo gamuhea abu, bera au besubesu magiva gei auki guruanu, bera au magi riaga ge auki guruanu.
23
Besubesu magi va moe ra ahatamakava ge auki guruanu.
24
Iaga o noma anai mage gahis. Magi o iabara iaga abu iauki gagae koigevenu, bera sinai nimu magivara eige au gamuhea iabara besubesu gahavaia era Hagar.
25
Hagar ra Sianai nimu Arabi uhura mati negu tau o Ierusalema va ihehe ge auki gaage goinu, au gamuhe iau vagahe mati iau ruta ge auna besubesu meva kisa.
26
Vava uiare Ierusalema vara magera, auka ni neinera.
27
Ga aena va ramu ronu. Hegiri, ragohiare gamika veite magivaia. Itakumu, nigo ragi, bara ragi, hegiri ragohiare badinavara iaka beta gamimi huh be ragira vara, oro magiva gamikavara dadaga vara, a magi mobote gamika dadaga veite.
28
Di ogonanuhe iaka Isako nagate, ominuo uhura gamiva iabara.
29
Vani eige ahatamakava guruane raki Horu aena uhura guruanedaure gahanu, negubutu maguri ragare nagate.
30
Eduge Buka aena negubutu esegena au roma? Besubesu magi e mati au moe Iabara gahe ote besubesu magi e moe ra beta negu magi mobore moe mageve mimivara.
31
Di ogonahuea e dainehe noka beta besubesu magi e gamuhe iabara noka magi mobore iabara