¹ Melo vele naini, ia melo nau, vele geria geulavununia auria ila noai gena irau, lewana ia rinaa velena apua. ² Namu veiama auri vairi kapulerai ealuni, pene thao amana na garo pene virigia garonai. ³ Veaina mo ia melo melo thoanai, ia alimapara gena vevaripa kimukimuri thaorai amauliwai. ⁴ Namu ora guguluna ekwarao laganinai Palau nauna euraiao, vavine apua thaona na ewalao, rova kapulenai ewalao. ⁵ Palau na eolema evawalao repana, ia rova thaona na pene vairairi pe, ia pene nau vanagiri ia nauna. ⁶ Repana mui melo nau, Palau na ia thaorai ia nauna palauna euoathao, auna egogo rageni, ''Abba, Ama.'' ⁷ Pe mui evana nori vaalu oa aumui namu, melo nau, pene melo nau, neni mui maina vele iavunai Palau thaona na. ⁸ Namu waora pege vanagi thaorai muina Palau noai goripatha, mui vaalu oa aumui veairi geria rinaa iavurai gevaimui wai namu, nori Palau gena iavuai. ⁹ Namu evana Palau pogo ripatha o Palauna mui eripamuio, thaonai wa ariapunai moira mago lavu ule veniani e melo melo geria vevaripa awawari goriparana? Mui vaaluoa aumui veairi maigo alu wai pa? ¹⁰ Muina garo e vue valivuri e lagani thoari e rigolo goriparana. ¹¹ Thau ami vevakalini mui elemuiai, verauleai thau geku ulavunu muiria wara noai ganina. ¹² Vewala anogimuini, thau pigo rakoku, repana thau mui veaimui. Thau elekuai mui noai gokepi. ¹³ Namu mui ripamui aunipara vi vina pakunai thauna,geku ma mana vali namana avara venimuio. ¹⁴ Lewana, thau auniparaku iaiana na mui veala ovo gorawaliao, thau noai goruakuo pa goilagi raavakuo. Namu muina thau govai ragekuo no Palau gena aneru apua veaina, pa no Iesu Keriso veaina. ¹⁵ Mui gemi vevanama evana ariai? Thau ave ilagi raiole, ere matharaparanai mui maa mui goro ipo thairao, thau goro venikuo. ¹⁶ Pe, thau mui gemi vekuku auna repana thauna mui thori auna auna availamuini gaurai pa? ¹⁷ Ila geve maa auni pige vai vanagimui, namu noai ganinai. Ila geririwani mui muru mui ige kouri pe ila elerai pigo vemaa au. ¹⁸ Vemaa au gau namana, ma ganirai wara nama,e nori thau mui elemuiai thaonai. ¹⁹ Nauku kimukimu mui, thau melo ewalani vi vina elekuai mapemi rage pene thao Keriso mui thao muiai pene amo. ²⁰ Geku ririwa thaonai evana mui lagamuiai para alu karoku para vairaua, repana mui thaokuai gove ononia. ²¹ Igo vailaku, goi riai rova oririwamagiani, namu rova noo vageleani? ²² Eve alo auo, Abraham nauna lualua, apua veala veveni vavine na thaona na e apua vegarawa thaona na. ²³ Veala veveni vavinena thaona na ewalao melona aunipara gena ririwana, namu vegarawa thaona na ewalao melona ia eveilagavu agio melona. ²⁴ Ethori pige veilagi magai wara eveaina,e vavine lualua na ilagavu lualua geva magairana. Apua wara Sinai golona na peve ami e ia nauna peva walari ila vaalu oa melori, e wara Hagar. ²⁵ Hagar Sinai golona Arabiai eva magaiani;e iana evana Jerusalemana eva magaiani, ia ma nauna vaalu oai gealuo. ²⁶ Namu e Jerusalema gau unai wara noai voina, gauna ia inari. ²⁷ Eve alo auo, ''Pono verele, ovaomu vagi melo noo vawala vagio; ono agi rage e verele pono makala agia melo vawala vi vina no rawalivagia; repana vawala rakwa vavineri nauri pege vogovagi namu nori vavine au kaparai gealuo vavineri.'' ²⁸ Namu mui, vewala, Isako veaina, mui wara ilagavu melori. ²⁹ Wa oranai aunipara gena ririwai ewalao auna na, Veaa Palauna thaona na ewalao auna elivuao. Egaroa mai veaiveaina. ³⁰ Veaa thorina na raaga eilagiani? ''Vaalu oa vavine na ma nauna ono uupaari. Vaalu oa vavinena nauna na vegarawa thaonai peva wala melo gena rinaa ilana pigene wareri. '' ³¹ Gauri pakurai, wala avaku, ia nori vaalu oa vavine na nauna, namu vegarawa vavinena nauna.