¹ Rigolo kapana na vaivai mulirai, thau e Barnabas magave rage waio Jerusalemai, Taitus thauna avaiauao. ² Thau averageo maavanagi apuna pakunai,e Keriso valina vevavua auri elerai avara vara agiawai gauna ulanana. Vele apuriapuri geregari athori venithao, pige ripa vethaleva thau nori, auleo kaliai. ³ Lewana Taitus ia thau lagakuai,e ia mai Greek auana nee vailao peritome egapio. ⁴ Wapa auri geve amaio vevuniai gemi rune maiwai, Iesu Keriso gena iavu thaina gathoa agia gaunai. Ila geria ririwa thaonai thai pige vaulavunu mai ila geria, ⁵ mamanai noai gave ilagi raio pe, vali namana auna auna na mui elemuiai pene mia kikilagi. ⁶ Namu vele kakamuri,(ila raa ulavunu gerogothao, thau noai geku thori wanai, Palau nori velemo geriana ethaoni)-auri thauna ailagirana noai geria thori thau elekuai. ⁷ Veaina mo ila, geripao thau vali namana evaikuo, roaigeve peritome auri ularana, Petero veaina, ia vali namana evevailiga agiawai geve peritome auri elerai. ⁸ Palau, Petero thaonai eulavunuo peritome auri evailiga rana veaina thau elekuai mai eulavununia vevaavua auri ularana. ⁹ James, Cephas, e Ioane, ila rupu gena kearepa, Palau gena vewaa geia iliathao thau elekuai, koukou iavuna maparana thau Barnabas goi geveni maio. Ila genamuao ila pige thao peritome auri elerai, thai piga thao vevaavua auri elerai. ¹⁰ Ila geria ririwa apuna mo geoleao lealea, auri piga valavuri, repana thauna uluvunu athoa agiao gauna wara, lealea auri pana thoa ia aliri. ¹¹ Namu, Cephas Antioch ai eveamaio thaonai, thau na vilanai ailagi raavao repana ia eleao. ¹² Aunilimalima vairi James elena na gevamio, Cephas vevaavua auria ila geganiganiwai geiathao. Namu Cephas elenai geveamaio ia ethoa gerevagio vevaavua auri elerana. Ia ekalio repana geririwa wai peritome pige gapi. ¹³ Jews aunilimalima ri mapararia mai, epagi oleanai gethoa auo. Barnabas mai mage vai veviliao geria pagi alarai. ¹⁴ Thauna aithao thaonai, mila olemari nori vali namana gena tharaparai gethoao, thauna ila vilarai Cephas raava raavao, '' Pene goi Jew aumu namu vevaavua auri veaina omaulinia,e nori Jew veaimu, vevaavua auri goina ovailarana Jew veairi raa pegere mauli iwa?'' ¹⁵ Ia awalao Jews lalana eilagiani nori vevaavua galama auri; ¹⁶ Namu ia ripari, auapua rova ulavunu na peene ole vathakwa na, veva auna auna mo Iesu Keriso thaonana. Ia maina veva auna auna Iesu Keriso thaonana arawaliao pe ia pene veole vethalevari, nori rova ulavununa thaonana. Rova ulavununa auapua peene veole vathakwa. ¹⁷ Namu pene, ia avewalavini pe veole vathakwa Keriso thaonai, ia maina galama auri pe, Keriso na galama eva ragea ni pa?auna auna vagi noaia. ¹⁸ Pene thauna gau waua avaravani, ava rua laaiwaiani thau aripani thau rova auaala ravana. ¹⁹ Rova thaonai thau pana warega rova gena,pe thau Palau gena pana mauli. ²⁰ Thau Keriso goi gave satauro. Thau evana nori thau amaulini namu Keriso thau thaokuai emaulini. Mauli thauna evana auniparai amauliagiani wara, veva auna aunai Palau nauna thaonai, ia thau eulamagikuo e maauna evevenio thau pakukuai. ²¹ Palau vewaana thauna naa ole gerevagiani, pene thakwa thakwa rova thaona na pere veamai, neni Keriso gena warega noai ganina.