¹ Thau Paulo, e Timothy ia wala avari, Iesu Keriso gena veunagi aumai Palau gena ririwai, Palau gena rupu Korentoai, e Palau gena aunilimalima veaa mui maparamui Achaia alimaparana thaonai gemi. ² Palau ia amari e gera vele Iesu Keriso geria veuga e maino thaamuiai pige mia. ³ Palau, ia gera vele Iesu Keriso amana pe varagea. Venuavi maparari amana e thao vevagaua Palauna. ⁴ Palau na ia gera veaolea thaorai thaori eva gaurana rana, pe mavairi geria veaolea thaorai iana ila thaori mape vagauari. Mavairi thaori pe vagauari Palauna ia thaori evagaua rana veaina. ⁵ Keriso ia pakurai evi vio veaina, ia Keriso thaonai thao pe vevagaua. ⁶ Namu pene thaina vi vi garawaliani, thao vevagaua e nama pe mui gemi; e pene thai thaomai geva gaua rana, wa thao vevagaua wape mui gemi. Mui gemi thao vevagaua ulavununa wara eulavunu vethalevani, pene thaina garawliao vi vinai pe vi vi koukou. ⁷ Thai gemai veraramani mui elemuiai wara noai aovo aovona, repana thai ripamai vi vi gove ware veveni agirana, veaina thai gemai thao vevagaua mai gove puu agirana. ⁸ Vewala ava thai gaririwani thaonai mui mapigo ripa, Asiai raa kepi veairi garawalirao. Thai iligamai maparari geve gavu vagio, gemai mauli mai gave uamagirao. ⁹ Rova meauna vagi thamaiai geoleao wara piga warega (death sentence). Namu veraramani nori thau maaumai elemai ai gaoleao, namu Palau elenai gaoleao, repana iana mo warega evalaai rana. ¹⁰ Iana thai warega thaona na evairai maio. Gemai veraramani ia elenai gaoleao repana thai ripamai iana mo thai pene vai raimai. ¹¹ Eolema thai thaamaiai pene vawala ripa, repana gemi vevava gemi veni vuavua thaorai govalavu maini. Vogovagina Palau pige varagea thai gavumaiai, repana geria veni vuavua thaorana thaina emamilagi vewaa vewaa na garawaliao. ¹² Epe thai gemai vevaoloa gauna: Thai thaomaina eva magaiani, alimapara thaanai Palau gena veaa e iavu thaona na nori aunipara thaonekanai namu Palau gena veuga thaonai. ¹³ Pigo ripatha e pigo uamagi ripatha gauna gaalo venimuini, gave raramanini maparana pigo uamagi ripatha ¹⁴ ava vairai gouamagi ripamaio veaina, pe thai pigo vevaoloa agimai Iesu Keriso gena garoai, thaina mui mapiga vevaoloa agimui. ¹⁵ Repana thau noai aovo aovoku, thau mui elemuiai pana veamai kune, pe thoa wari wari namari lualua pigo rawaliri. ¹⁶ Geku uamagi thaonai Macedonia thao veninai pana wai ia alimui. Thaonai Macedonia na pana velavu ulewai mapana mithoa oa e avana na pigo uuku Judeai pana thao. ¹⁷ Eveaina auamagi wai thaonai thau aila veravewai pa? Aunilimalima geria uamagiai avalavuni, pe thau naini ''namu, namu'' e noaia,noai oranaimo? ¹⁸ Namu Palau ia veva aunaauna gugulu Palauna, ia ''Namu'' e ''Noaia.'' egau wau lualua vaganaimo piana thori geleri. ¹⁹ Palau nauna Iesu Keriso, Silvanus, Timothy e thauna elemuiai gavara vara agiani ia nori ''Unamu'' e ''Noaia'' ia vanagi vanagi ''Unamu'' ²⁰ Repana Palau gena ilagavu maparari thaonai gemiani gauri ila ''Unamu mo. ''Gaurai iamo thaona na ia naainia ''Amen'' Palau vewaa nai. ²¹ Evanamona, Palauna thai mui elemuiai pethori gavumai Keriso thaonai e pe gapi laai mai, ²² gena orugavu thaamaiai peolea e Veaa Palauna peveni mai thaomaiai, rogo pige wala gauri rua vila agiri iavuna eveni maio. ²³ Palau thauna agogoani pe, thau au ilagi raiku repana thau naa veamaio Korento ai ganina mui ora kamuna ia pana venimui. ²⁴ Enori mui gemi veva aunaaunai piga ala laiwa laiwa mui ulana na, namu thai muiria pe ulavunu koukou gemi verele pakunai, gemi veva aunaauna gorua kikilagio thaonai.