¹ Jud awa Mamo Siroro arida Main da buro embo edo Jeims da namenji, Toregari embo mi dao sisina Mamo Siroro arida dubobari doda Tonembari embo tapusina. ² Do ari edo bega edo dubobari awa imode badare. ³ Nato dubobari, na nato do berari mi nogo edo ito yai kaviegari da ge gani ainda be awa ito asisida tumondari ainda okain awa isira garida embo kotopu nei edera ango. ⁴ Embo nei awa undugari da ito yai torara. Embo gari ango awa embo beae. Embo gari ango awa Mamo Siroro ari awa gae edo Mamo da tonembari awa gaiae. Embo gari ango awa natokare Bajina da dao awa eoro beae edeira. ⁵ Boroko na dubo dave de imo tano gata imo bajina be gari - Bajina ainda embo awa Ijipt butu da toregosisina, ata ainda ambo da awa embo nei gebeae esitera awa amboda Mamo Siroro ari mi usibesi esisina. ⁶ Anera mane awamane da dero be ainda betae edo awamane do goroba be ainda pepeta ae. Awamane awamane da dero dave be dave awa doturitera. Mamo Siroro mi asi matawa itari asi ami bundisina muiyan da itorote; isiaro awamaneda katari iji gumbarate. ⁷ Garida da Sodom ae Gomora de butu nei jiroro ari itera ango, embo nei asisi jitabaita mi bundary edo butuda udo da itera. Ge berari tetena awa ge kariwa amboda memesi edo bouga matawa itari niao ainda tambara. ⁸ Ebata da ainda aturo ari embobo awamaneda tamu eoro dono edeira. Embomai awa Mamo Siroro ari da goroba awa jipapae edera parara da buro era embomai ainda daoda ge tedera. ⁹ Anera Maikel mi binei de ge minamina esisina Moses da tamu toredo, ata ainda yai katari bouga be awa piyae. Anera mi sisina awa bajina mi imo gido taina. ¹⁰ Ata embomai eiwa dave be edo gae nongo edo dave be edo gaetera ango ae. Wo mane da betari uduga dave itae awatedo bero usibesi edo esitera. ¹¹ Embomai awa ebata Kein da ainda ainto eite Balam da jipapa awa edo esitera etero Kola mi minamina esisina. ¹² Embomai eiwa bopu undugari, dubobari pisida ondo bondo da ondo bondo sima megaride ata imomane akuta undedera. Embomai awa poroga wai itae ango, bisi mi budo aindo edeira ango. Embomai awa yai damodamo nibe itae ango - iji tote betari ni tai mi adegari. ¹³ Embomai awa sina yawata ango bajido awamaneda megari arapada rerigedeira. ¹⁴ Embomai awa damana kotembari itae ango poroga puruta da takim bedo isimadeira ango. Adam da tuda Inok, gupusina awa karigedo sisina. Giwo! Bajina gupeira awa embo kotopu jiwaebe de da gupeira. ¹⁵ Bajina gupeira awa embo berari awa kataina. Bajina gupeira ami buroberari Mamo Siroro arida jipapa da ae edera awa budo berari arapada piaina, jimbo embo nei Bajina gae bepirigedo ainda dao da ge tedera. ¹⁶ Embomai eiwa awa ge gurari embomai edo ge jiwae be tari embomai edo awamane awa beae ambo ambo edera. Embomai awa gegurari embomai edo awamane da dave akuta eite embonei dowari embomai. ¹⁷ Ata imomane nato dubobari kotembewo ge gisibe Bajina da ambodani mi sitera. ¹⁸ Itomane yai sitera. Iji ambojido ainda embo udumbari embo awamane da jipapa topo ainda petedo gumbara. ¹⁹ Edo embo aro manamana ara embomai awa butuda kotembari topo ainda edo gupera ainda Asisi dave itae. ²⁰ Ata imo dubobaride imo akuta gigito edo visido aindo tumondari kotopu ainda petedo awa Asisi Kotopu da yai benunu teiyo. ²¹ Imo akuta Mamo da dubobarida toriyo edo doarida isiato Mamo Siroro arida Main mi ito wasiri natopo itari awa budo gumbare. ²² Embo nei doata. ²³ Embo nei niyao da ainbutera awa toregata. Edo nei do bajinabe bata adude da. Jipapa aeata gongo pisida dono gambari awa. ²⁴ Boroko embo da imo sima eira durotekae ami imo budo pararada piyaina danomi gadainyae yawa yawa badarida be. ²⁵ Mamo Siroro ari awa ito toregari embo Mamo Siroro ari da mai natokare Bajina pararade kokopi be sima ari gorobade gisibe isima edo esisina. Boroko edo mata itaina. Awara.