¹ Pol Mamo da buro embo Siroro arida jipapada, edo Timoti natokare namenji, ² Gebe ari nanonamenji aimi kaimi Kolosae itera ainda. Tonembari imonde mane itare, edo bega siroro ari natokare Mamo da yaida edo gumaina. ³ Nakare Siroro ari ategara, natokare bajina da Mamo, edo iji berari imo awatedo benunu tedenakare. ⁴ Ito tumondari Mamo da yai da awa nakare ingitera, edo aimi kaimi Siroro ari amboambo edera awa dubo budeta. ⁵ Dubobari eiyawa imonde isira ainda be awa dave ito utuda sia ari isira. Imo ge eiyawa ge moka, Mamo da ge ainda doda awa ⁶ ito yai da gumbira. Mamo da ge eiwa be eira edo butu berari da babodeira. Buro engo awa ito doda dango dero budedevira iji da imo Siroro ari da tonembari ge moka da doda isari awa ingido ambo ambo edeta ango de. ⁷ Eiyawa ge moka Epaphras da yai da gositeta, natokare dubobari embo, embo awa natokare buro embo davebe Mamo da yaida. ⁸ Itomane dubobari asisi da awa Epaphras mi esiri arapa esiri gositenakare. ⁹ Dubobari emi esiri, nakare imo benunu tari dowae ge eiyawa ingidena kare angode. Nakare benunu tedera imo ainda jiro gari berari dubogari edo asisi da arapa arimi beda arate. ¹⁰ Nakare benunu tedera imo ainto Mamo da jipapada atate. Nakare benunu tedera wasiri dave awa ito yaida dero barate edo imo Siroro arida jirogari da badatate. ¹¹ Nakare benunu tera imo gorobari piarate ainda jitarida gorobada. ¹² Nakare benunu tera yawayawa de mamo ategatate amimi esiri ito isipapo pararada isira awa arapa esira. ¹³ Siroro ari mi nakare munya da awa budo pisiri ainda dubobari Mai da dero dave ainda ainbusitenakare, ¹⁴ amimi nakare jimbo bebegae da udegosisina, jimbo bebegae kotembedo dowari. ¹⁵ Embo awa siroro ari jisimi gae ainda kariwara, utu de butude da kopiri bera. ¹⁶ Amimi esiri roviravi berari siroro esisina, utu da edo butu da, jisi mi gari edo jisi mi gae ainde. Anumba kotopu tako, gisi jijiegari da itari dero tako, gisi jijiegari tako embomai bibain ri, roviravi berari awa amimi esisina edo roviravi awa aindara. ¹⁷ Embo awa roviravi berari da kopiri, edo embo ainda toda roviravi berari dada jiari isima edera. ¹⁸ Embo awa tamonda kopiri ra, Mamo tumonde baing ari tamonda. Bebetegari itera ainda embo awa tuturo edo kopiri ra, awatedo roviravi berari itera ainda dero kopiri be awa ainda ra. ¹⁹ Siroro ari dubo dave esisina ainda roviravi berari ainda doda itorote, ²⁰ edo ainda Mai jigama edo roviravi berari esiri kokopi esitera. Sororo ari bega burisina ainda ainda orega kotopu da ororo mi. Siroro ari roviravi berari akuta esiri kokopi esitera, roviravi berari butuda tako utuda awa. ²¹ Iji dade, imomane dango siroro arida yaida embo evebe awa, edo ainda gitopo kotembari da edo wasiri bebegae da. ²² Ata boroko awa imomane esiri kokopi etewa ainda pisida betari mi. Imomane ari kotopu, bekuma itae, edo wasiri bebegae ainda doda, ²³ imo tumondari da mata pepeta eta, edo ge moka da iteta, ge moka ingeta awa ambo ambo eta. Eiyawa ge moka embo berari butuda itera ainde pipisitera. Eiyawa ge moka na, Pol, gumundo ainda buro embo esitena. ²⁴ Boroko na yawayawa ena nato memesi imomane awatedo taputena, edo pisida sireno beda esisina Mamo da tamo awatedo, awa tamo kotopura. ²⁵ Na awa tamo kotopu einda buro ari embo, Siroro arimi buro eiyawa namonde pipisisina imomane awatedo, Siroro arida ge awa ano dero barate. ²⁶ Eiyawa gebe undugari embomai aoda gupera ainda yaida. Ata boroko esiri arapa esira embomai Siroro ari gebe edera ainda yaida. ²⁷ Eiyawa awamane da yaida Siroro ari mi dave ainda jitari da isira awa embo etene da yaida awa ari arapa arate jipapa esisina, awa ainda mai imonde da isira, jitarida tumondari. ²⁸ Embo einda dao jionokane eridedevira. Nakare embomai awa toregedera, edo embo berari dubo garida atopasidera, ango aro embo berari Mamo da yaida gumborote. ²⁹ Awatedo na buro okain be edena ainda goroba nato yaida isira ainda petedo.