¹ Gisijiari da owe dubobari otao Gaius da yai, dubo burena ge moka da doda. ² Dubobari otao, benunu tena berari karu itae imodeda dave be aimborote, garida ito asisi dubo dave eira da ango. ³ Na dubodave bajinabe ena awa iji da nanonamenji ge moka tato gainteto gupera awatedo, garida inemi gemoka da ainto edo eta ango. ⁴ Na dubo dave bajinabe edo engo awa nei itae, da nato kinapeina gemoka da ainto ero ingido ena ango awa. ⁵ Dubobari otao, tumondari ito awa iwata eiyo iji da ito nanonamenji edo ito etega embo da yai. ⁶ Oiya awekawe dubo budo ge teteto ingido engitera ainda yai. Inemi davebe edo mamo siroro arida begata be isira ainda pieyo idegore awamaneda pepeta da, ⁷ ainda be awa etene embo ambo rorae daro bae ata dao akuta akuta be budo idegotera awatedo. ⁸ Nakare embomai gari engo awa banakare edo nakare gumundo awamanede da gemoka da buro embobo anakare. ⁹ Na nato atukawetu da yai owe eiwa ena, ata Deotrephes, itera ainda gisibe itain evira embo ami nakare bae doturisina. ¹⁰ Ata na gumana gido awa, ami ro eite, ge pitawapatawa site mina mina eira awa tanugaina. Buro ango eiya awa edo inono ae edo awa nanonamenji aimi dao nanonamenji nei burera awa giu deroda dodo budo pieuri idegedesitera. ¹¹ Dubobari otao asisi beae mi ro eira awa eote ata dave eyo. Aimi dave eira embo awa Mamoda topo; embo aimi jimbo eira embo awa Mamo gae. ¹² Demetrius awa embo berari da yai gemoka tarigari embo Mamo mi gosisina. Nakare ge tarigari embo daedo, edo imomane gotewa natokare wasirida kiki awa gebe. ¹³ Na roviravi jiwaebe jiwedo itomane yai piana, ata na owe jiwari roviravi jigama edo itomane yai owe jiwayae. ¹⁴ Ata na imomane gana ango jisi etena itena, edo jisi minagara eite ge minatara anakare. ¹⁵ Bega imodemane itare. Otataomi imomane ategotera. Natokare otatao ounda itera awa dao da goteite ategewo.